ଜବଲପୁର,୨୪।୭: ଦେଶରେ ମହାମାରୀ କରୋନା ଯୋଗୁ ବିଭିନ୍ନ କ୍ଷେତ୍ରରେ ପ୍ରଭାବ ପଡ଼ିଛି। ଏପରିକି ସମ୍ପର୍କରେ ମଧ୍ୟ ଫାଟ ସୃଷ୍ଟି ହେଉଥିବା ଘଟଣା ସାମ୍ନାକୁ ଆସୁଛି। କିନ୍ତୁ ମଧ୍ୟପ୍ରଦେଶରୁ ସମ୍ପର୍କର ଏକ ଭିନ୍ନ ରୂପ ଦେଖିବାକୁ ମିଳିଛି। କରୋନାରେ ସ୍ବାମୀଙ୍କ ମୃତ୍ୟୁ ହେବାରୁ ତାଙ୍କ ସ୍ତ୍ରୀ ପିପିଇ କିଟ୍ ପିନ୍ଧି ତାଙ୍କର ଅନ୍ତିମ ସଂସ୍କାର କରିଥିବା ଜଣାପଡ଼ିଛି। ଏହି ଦୃଶ୍ୟକୁ ଦେଖିଲେ ଯାକାହାର ବି ଆଖିରେ ଲୁହ ଆସିଯିବ। ସୂଚନାଯୋଗ୍ୟ, ଜବଲପୁରର ବିଜୟନଗରରେ ରହୁଥିବା ୬୨ ବର୍ଷୀୟ ଜଣେ ବୃଦ୍ଧ ନିକଟରେ କରୋନାରେ ଆକ୍ରାନ୍ତ ହୋଇଥିଲେ। ଏହାପରେ ତାଙ୍କୁ ଜବଲପୁର ମେଡିକାଲ କଲେଜରେ ଭର୍ତ୍ତି କରାଯାଇଥିଲା। ତେବେ ଚିକିତ୍ସାଧିନ ଅବସ୍ଥାରେ ତାଙ୍କର ବୁଧବାର ଦେହାନ୍ତ ହୋଇଛି। ଉକ୍ତ ବୃଦ୍ଧଙ୍କ ନିଜର କେହି ସନ୍ତାନ ନ ଥିବା ବେଳେ କରୋନାଜନିତ ମୃତ୍ୟୁ ହୋଇଥିବାରୁ ତାଙ୍କର ଶେଷକୃତ୍ୟ ପାଇଁ କେହି ସମ୍ପର୍କୀୟ ମଧ୍ୟ ଆସି ନ ଥିଲେ। ଶେଷରେ ବାଧ୍ୟ ହୋଇ ମୃତ ବୃଦ୍ଧଙ୍କ ସ୍ତ୍ରୀ କରୋନାର ସମସ୍ତ ପ୍ରୋଟୋକଲକୁ ପାଳନ କରିବା ସହ ପିପିଇ କିଟ୍ ପିନ୍ଧି ସ୍ବାମୀଙ୍କ ଅନ୍ତିମ ସଂସ୍କାର କରିଥିଲେ। ଆଉ ଏହି କାର୍ଯ୍ୟରେ ତାଙ୍କୁ ହସ୍ପିଟାଲର ସ୍ବାସ୍ଥ୍ୟକର୍ମଚାରୀ ସାହାଯ୍ୟ କରିଥିଲେ। ସେହି ମୁହୂର୍ତ୍ତ ଅତ୍ୟନ୍ତ ଭାବପ୍ରବଣ ଥିଲା। କରୋନା କାଳରେ ଯେଉଁଠି ନିଜ ଲୋକ ହାତ ଛାଡ଼ି ଦେଉଛନ୍ତି ସେଇଠି ସ୍ତ୍ରୀଙ୍କ ଏଭଳି କାର୍ଯ୍ୟ ସମସ୍ତଙ୍କ ପାଇଁ ପ୍ରେରଣାଦାୟୀ ହେବା ସହ ପ୍ରଂଶସାଯୋଗ୍ୟ।
