ନୂଆଦିଲ୍ଲୀ,୧୬।୧୨: ଦିନିକିଆ ଅଧିନାୟକତ୍ୱରୁ ହଟାଯିବା ପରେ ବିରାଟ କୋହଲି ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ଏକ ଖବରଦାତା ସମ୍ମିଳନୀ କରିଥିଲେ। ଏଥିରେ ସେ ଅନେକ ବିସ୍ଫୋରକ କଥା ପ୍ରକାଶ କରିଥିଲେ। ବିରାଟ କୋହଲି ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ବିବୃତ୍ତିକୁ ମିଥ୍ୟା ପ୍ରମାଣ କରିଥିଲେ। ଗାଙ୍ଗୁଲି କହିଥିଲେ ଯେ, ମୁଁ ବିରାଟ କୋହଲିଙ୍କୁ ଟି -୨୦ ଅଧିନାୟକତ୍ୱ ଛାଡିବାକୁ ମନା କରିଛି। କିନ୍ତୁ ସେ କାର୍ଯ୍ୟଭାର ହେତୁ ପଦ ଛାଡିଥିଲେ। ଗାଙ୍ଗୁଲିଙ୍କ ମନ୍ତବ୍ୟ ଉପରେ କୋହଲି କହିଥିଲେ ତାଙ୍କୁ ଟି -୨୦ ଅଧିନାୟକତ୍ୱ ଛାଡିବାକୁ କେହି ଅଟକାଇ ନାହାଁନ୍ତି। ଏବେ ଏନେଇ ପୂର୍ବତନ ଭାରତୀୟ ଅଧିନାୟକ ସୁନୀଲ ଗାଭାସ୍କର ନିଜ ମତ ଦେଇଛନ୍ତି। ସେ କହିଛନ୍ତି, ସୌରଭ ଗାଙ୍ଗୁଲିଙ୍କୁ ମନ୍ତବ୍ୟରେ କାହିଁକି ପାର୍ଥକ୍ୟ ଅଛି ବୋଲି ପଚରାଯିବା ଉଚିତ। ସେ ହିଁ ପ୍ରକୃତ ସତ କ’ଣ କହିପାରିବେ। ଏପର୍ଯ୍ୟନ୍ତ କାହିଁକି ଚୁପ୍ ଅଛନ୍ତି ବୋଲି ଗାଭାସ୍କର ପ୍ରଶ୍ନ କରିଛନ୍ତି। ସୁନୀଲ ଗାଭାସ୍କର ଏହା ମଧ୍ୟ କହିଛନ୍ତି, ଯୋଗାଯୋଗରେ ସର୍ବଦା ଏକ ସ୍ପଷ୍ଟ ରେଖା ରହିବା ଆବଶ୍ୟକ। ଚୟନ କମିଟିର ସଭାପତି ଆସି ଖେଳାଳିଙ୍କୁ ଜଣାନ୍ତୁ କାହିଁକି ଚୟନ କରାଗଲା ଏବଂ କାହିଁକି କରାଗଲା ନାହିଁ।
ଟେଷ୍ଟ ଅଧିନାୟକ ବିରାଟ କୋହଲି ଏହା ସ୍ପଷ୍ଟ କରିଛନ୍ତି ଯେ, ଯେତେବେଳେ ମୁଁ ଟି -୨୦ ଅଧିନାୟକତ୍ୱ ଛାଡିଥିଲି, କେହି ମୋତେ ରୋକି ନ ଥିଲେ। ସମସ୍ତେ ଏହାକୁ ଠିକ୍ ବୋଲି କହିଥିଲେ। ପରେ ବିସିସିଆଇକୁ କହିଥିଲି ମୁଁ ଦିନିକିଆ ଏବଂ ଟେଷ୍ଟ ଅଧିନାୟକ ଜାରି ରଖିବାକୁ ଚାହୁଁଛି। କିନ୍ତୁ ଯଦି ଚୟନକର୍ତ୍ତା ଅନ୍ୟ କାହାକୁ ଉପଯୁକ୍ତ ଭାବନ୍ତି ତେବେ ସେମାନେ ନିଷ୍ପତ୍ତି ନେଇପାରନ୍ତି ବୋଲି କହିଥିଲି। କିନ୍ତୁ ଡିସେମ୍ବର ୮ରେ ହଠାତ୍ ଚୟନକର୍ତ୍ତା ଦିନିକିଆ ଅଧିନାୟକ ପଦରେ ମୁଁ ଆଉ ରହିବି ନାହିଁ ବୋଲି ମୋତେ କହିଥିଲେ। ତାଙ୍କୁ ଦିନିକିଆ ଅଧିନାୟକ ପଦରୁ ହଟାଯିବା ପାଇଁ ପୂର୍ବରୁ କୁହାଯାଇ ନ ଥିଲା ବୋଲି କୋହଲି କହିଛନ୍ତି।