ଭୋପାଳ,୧୭ା୬: ମଧ୍ୟପ୍ରଦେଶର ଗ୍ବାଲିଅର୍ ଜିଲାରୁ ଏକ ଆଶ୍ଚର୍ଯ୍ୟଜନକ ଖବର ଜାଣିବାକୁ ମିଳିଛି। ଉତ୍ତରପ୍ରଦେଶର ଦୁଇ ଲୁଟେରା କନ୍ୟା ଗ୍ବାଲିଅରର ଦୁଇ ଭାଇଙ୍କୁ ବିବାହ କରିଥିଲେ। ୩ ଲକ୍ଷ ଟଙ୍କାର ସୁନାଗହଣା ଏବଂ ନଗଦ ଦେଢ଼ ଲକ୍ଷ ଟଙ୍କା ନେଇ ମାତ୍ର ୪ ଦିନ ପରେ ଦୁହେଁ ପଳାଇ ଯାଇଥିଲେ। ଠକେଇର ଶିକାର ହୋଇଥିବା ଦୁଇ ଭାଇ ସହାୟତା ପାଇଁ ପୋଲିସକୁ ନିବେଦନ କରିଛନ୍ତି। ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ସୂଚନାଯୋଗ୍ୟ, ଗ୍ବାଲିଅରର ଥାଟିପୁର ଅଞ୍ଚଳରେ ରହୁଥିବା ସମ୍ପର୍କୀୟ ଭାଇ ଭରତ ଗୁପ୍ତା ଏବଂ ରୋହିତ ଗୁପ୍ତା ଉତ୍ତରପ୍ରଦେଶର ଗୋରଖପୁରର ଅଞ୍ଜଳି ଏବଂ ସଞ୍ଜନାଙ୍କୁ ବିବାହ କରିଥିଲେ। ରୋହିତ ଏବଂ ଭରତଙ୍କ ସମ୍ପର୍କ ସେମାନଙ୍କ ପିଉସୀ ପୁଅଙ୍କ ମାଧ୍ୟମରେ ହୋଇଥିଲା। ପିଉସୀଙ୍କ ପୁଅ ବଣ୍ଟି ଗୁପ୍ତା ବନ୍ଧୁ ଜେଟୁ ଏବଂ ଲାଲୁଙ୍କ ମାଧ୍ୟମରେ ଏହି ବିବାହ ହୋଇଥିଲା। ଦୁଇ ଭାଇଙ୍କ ୯ ଜୁନ୍ରେ ନିର୍ବନ୍ଧ ହୋଇ ୧୧ ଜୁନ୍ରେ ବିବାହ ହୋଇଥିଲା।
ବିବାହ ପରେ ଜୁନ୍ ୧୫ରେ ଯେତେବେଳେ ଭରତ ଡ୍ୟୁଟିରେ ହାଇକୋର୍ଟ ଯିବା ପାଇଁ ପ୍ରସ୍ତୁତ ହେଲେ ସ୍ତ୍ରୀ କହିଥିଲେ ସନ୍ଧ୍ୟାରେ ଶୀଘ୍ର ଘରକୁ ଫେରି ଆସିବ। ରୋହିତ ଚାଲିଯିବା ପରେ ତାଙ୍କ ମା’ ଏବଂ ବଡ଼ ଭଉଣୀ ଘରେ ଥିଲେ। ଏହି ସମୟରେ ସଞ୍ଜନା ଏବଂ ଅଞ୍ଜଳି ଘରୁ ପଳାଇବାର ସୁଯୋଗ ପାଇଥିଲେ।
ଦୁହେଁ ଘରୁ ଟଙ୍କା ଓ ଅଳଙ୍କାର ନେଇ ବାହାରି ଯାଇଥିଲେ। ଅଭିଯୁକ୍ତ ଦୁଇ ମହିଳା ଘର ବାହାରେ ତାଲା ପକାଇ ଦେଇଥିଲେ। ପରେ ମା’ ଭରତଙ୍କୁ ଫୋନ୍ କରି ପୂରା ଘଟଣା ଜଣାଇଲେ ତାଙ୍କ ପାଦତଳୁ ମାଟି ଖସିଗଲା। ଭରତ ତାଙ୍କ ସ୍ତ୍ରୀଙ୍କ ମୋବାଇଲକୁ ଫୋନ୍ କଲେ। ପ୍ରଥମେ ଏଥିରେ କୌଣସି ଉତ୍ତର ଆସି ନ ଥିଲା। ତା’ପରେ ମୋବାଇଲ ସୁଇଚ୍ ଅଫ୍ ହୋଇଗଲା।
ଭରତଙ୍କ ଅଭିଯୋଗ ଭିତ୍ତିରେ ପୋଲିସ ଏକ ମାମଲା ରୁଜୁ କରିଛି। ପୋଲିସ ଉଭୟଙ୍କ ଆଧାର କାର୍ଡ ଯାଞ୍ଚ କରିଛି। ଆଧାରକାର୍ଡରେ ଅଭିଯୁକ୍ତ ମହିଳାମାନଙ୍କର ଠିକଣା ଜଣଙ୍କର ଉତ୍ତରପ୍ରଦେଶର ମହାରାଜଗଞ୍ଜ ଏବଂ ଅନ୍ୟ ଜଣଙ୍କର ପରାସଖଣ୍ଡ ବରଗଡ଼ଓ୍ବା ହରିୟାଣା ବୋଲି ଲେଖାଯାଇଛି। ପୋଲିସ ବର୍ତ୍ତମାନ ଆଧାରକାର୍ଡ ଏବଂ ମୋବାଇଲ ନମ୍ବର ସାହାଯ୍ୟରେ ଲୁଟେରା କନ୍ୟା ଦ୍ୱୟଙ୍କୁ ଧରିବା ପାଇଁ ପ୍ରୟାସ ଜାରି ରଖିଛି।