ମୁମ୍ବାଇ,୨୪ ।୨: ମହାରାଷ୍ଟ୍ର ସରକାରରେ ମନ୍ତ୍ରୀ ଥିବା ନୱାବ ମଲିକଙ୍କ ଗିରଫକୁ ନେଇ ରାଜନୀତି ତାପମାତ୍ରା ବଢିବାରେ ଲାଗିଛି । ଏହା କେବଳ ମହାରାଷ୍ଟ୍ର ନୁହେଁ ବରଂ ଉତ୍ତର ପ୍ରଦେଶ ଓ ପଶ୍ଚିମ ବଙ୍ଗରେ ଏହାର ପ୍ରଭାବ ଦେଖିବାକୁ ମିଳିଲାଣି । ଅର୍ଥାତ୍ ଦେଶର ପୂର୍ବରୁ ପଶ୍ଚିମ ପର୍ଯ୍ୟନ୍ତ ଲମ୍ବିଲାଣି ନୱାବଙ୍କ ମାମଲା । ନୱ୍ୱାବ ବୁଧବାର ପ୍ରଥମ ରାତି ଇଡି କାର୍ଯ୍ୟାଳୟରେ କାଟିଥିବା ବେଳେ ଗୁରୁବାର କିନ୍ତୁ ସଡ଼କରେ ରାଜନୀତିର ଉଷ୍ମତା ଖେିବାକୁୁ ମିଳିବ । ଏହାକୁ ନେଇ ଗୋଟିଏ ପଟେ ଏନ୍ସିପି ଓ ଏହାର ସମର୍ଥକ ଥିବା ବେଳେ ଅନ୍ୟପଟେ ଭାରତୀୟ ଜନତା ପାର୍ଟି(ଭାଜପା) ।
ମହାବିକାଶ ଅଘାଡିର ନେତା ଗୁରୁବାର ମୁମ୍ବାଇରେ ପ୍ରଦର୍ଶନ କରି ନୱାବ ମଲିକଙ୍କ ଗିରଫକୁ ବିରୋଧ କରିବେ ତ ଅନ୍ୟପଟେ ଭାଜପା ନୱାବ ମଲିକଙ୍କ ଇସ୍ତଫା ଦାବି କରି ପ୍ରଦର୍ଶନ କରିବ । କାରଣ ନୱାବ ଉଦ୍ଧବ ସରକାରରେ ମନ୍ତ୍ରୀ ରହିଛନ୍ତି । ଏବେ ନୱାବଙ୍କ ଇସ୍ତଫାକୁ ନେଇ ଏନସିପି ଓ ଭାଜପା ମଧ୍ୟରେ ଲଢେଇ ଆରମ୍ଭ ହୋଇଗଲାଣି । ସୂଚନାଯୋଗ୍ୟ, ମନି ଲଣ୍ଡରିଂ ମାମଲାରେ ନୱାବ ମଲିକଙ୍କୁ ମାର୍ଚ୍ଚ ୩ ପର୍ଯ୍ୟନ୍ତ ଇଡି ହେଫାଜତକୁ ପଠାଇ ଦିଆଯାଇଛି ।
