ମେଣ୍ଟ ଚର୍ଚ୍ଚାରେ ଲାଗୁନି ବିରାମ । ଲୋକେ ପଛେ ଗପି ଗପି ଥକି ପଡିଲେଣି। ହେଲେ ମେଣ୍ଟ ଆଜି ହେବ କାଲି ହେବ କହି କେବେ ହେବ ତାହା ନେଇ ଚର୍ଚ୍ଚା ଲାଗି ରହିଛି। ତେବେ
ଗତକାଲି 5T ଅଧ୍ୟକ୍ଷ ତଥା ବିଜେଡି ନେତା ଭିକେ ପାଣ୍ଡିଆନଙ୍କ ବୟାନ ପରେ ଆଜି ମେଣ୍ଟ ନେଇ ଇସାରା ଦେଇଛନ୍ତି ଅମିତ ଶାହା।
ଜାତୀୟ ଗଣମାଧ୍ୟମରେ ସାକ୍ଷାତକାର ଦେଇ ପାଣ୍ଡିଆନ କହିଛନ୍ତି, ରାଜ୍ୟାବସୀଙ୍କ ବୃହତ୍ତର ସ୍ବାର୍ଥକୁ ଦୃଷ୍ଟିରେ ରଖି ନିଷ୍ପତ୍ତି ନିଆଯିବ। କେନ୍ଦ୍ରରେ ମୋଦି ଆଉ ଓଡିଶାରେ ନବୀନ ପଟ୍ଟନାୟକ କ୍ଷମତାକୁ ଆସିବେ। ତେବେ ଏକ ଜାତୀୟ ଗଣମାଧ୍ୟମର କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉତ୍ତରାଧିକାରୀ କିଏ ହେବେ ସେ ନେଇ ମଧ୍ୟ ବଡ ବୟାନ ଦେଇଛନ୍ତି ପାଣ୍ଡିଆନ ।
ତେବେ ପାଣ୍ଡିଆନଙ୍କ ପୂର୍ବରୁ ଜାତୀୟ ଗଣମାଧ୍ୟମ କାର୍ଯ୍ୟକ୍ରମକୁ ଯୋଗଦେଇ ମେଣ୍ଟ ସମ୍ପର୍କରେ କହିଥିଲେ ଅମିତ ଶାହା। ଆଗାମୀ ନିର୍ବାଚନରେ ଭାଜପା ଉଭୟ ଲୋକ ସଭା ଓ ବିଧାନ ସଭାରେ ଭଲ ପ୍ରଦର୍ଶନ କରିବ ବୋଲି ଶାହ କହିଛନ୍ତି । ଶାହଙ୍କ ଅନୁସାରେ, ବର୍ତ୍ତମାନ ସମୟ ହାଡକୋର ରାଜନୀତିର । ଯେଉଁଥିରେ ଫିଲୋଶୋପି ବା ଦର୍ଶନ ନ ଥାଏ ବରଂ ହାରଜିତ୍ର ଗଣିତ ରହିଥାଏ । ଦଳର ବିଚାରଧାରା ସହିତ ବୁଝାମଣାର କଥା ରହିଥାଏ। ତେଣୁ ଦଳର ବିଚାରାଧାରା ଓ ବିଜୟ ସମ୍ଭାବନା ଭିତରେ ସମନ୍ବୟ ରଖି ମେଣ୍ଟ ସହଯୋଗୀ ବଛାଯାଇଥାଏ ବୋଲି ଶାହ କହିଛନ୍ତି ।
ଶାହାଙ୍କ ବୟାନ ଏବେ ରାଜ୍ୟ ଓ ଜାତୀୟ ରାଜନୀତି ସରଗରମ କରିଛି। ସେ କହିଛନ୍ତି, ଏବେ ସେ ମେଣ୍ଟ ନେଇ ଅଧିକ କିଛି କହିପାରିବେନି । କାରଣ ଓଡ଼ିଶାରେ ଭାଜପାର ଅଗାମୀ ରଣନୀତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ଥିର କରିବେ । କିନ୍ତୁ ଆଗାମୀ ନିର୍ବାଚନରେ ଉଭୟ ଲୋକ ସଭା ଓ ବିଧାନ ସଭାରେ ଭାଜପାର ଭଲ ପ୍ରଦର୍ଶନ କରିବ।
ତେବେ ବିଗତ ସବୁ ବୟାନ ପରେ ଆଜି ମେଣ୍ଟ ନେଇ ଖୋଲା ସଙ୍କେତ ଦେଇଛନ୍ତି ଅମିତ ଶାହା। ଆଜି ଅର୍ଥାତ୍ ବୁଧବାର ଅମିତ ଶାହ କହିଛନ୍ତି, ‘ମେଣ୍ଟ ହେବ କି ନାହିଁ ତାହା ଭାଜପା ରାଷ୍ଟ୍ରୀୟ ଅଧ୍ୟକ୍ଷ ନିଷ୍ପତ୍ତି ନେବେ । କିନ୍ତୁ ଏ ନେଇ ବର୍ତ୍ତମାନ ସୁଦ୍ଧା କେଣସି ଚୂଡାନ୍ତ ଆଲୋଚନା ହୋଇନାହିଁ । କିନ୍ତୁ ଓଡ଼ିଶାରେ ଭାଜପାର ଶକ୍ତି ପୂର୍ବାପେକ୍ଷା ଯଥେଷ୍ଟ ବଢିବ । ଓଡ଼ିଶାର ଜନତାଙ୍କ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରତି ଅଜସ୍ର ଭଲ ପାଇବା ରହିଛି । ଓଡ଼ିଶାରେ ଲୋକ ସଭା ଓ ବିଧାନ ସଭା ସିଟ ଯଥେଷ୍ଟ ବଢିବ । ଏପରିକି ରାଜନୈତିକ ବିଶେଷଜ୍ଞଙ୍କ ସମସ୍ତ ଆକଳନ ବି ଭୁଲ ହୋଇଯିବ ।’
ଓଡ଼ିଶାରେ ଭାଜପା ଏକାକୀ ସରକାର ଗଠନ କରିବ କି ପ୍ରଶ୍ନରେ ଅମିତ ଶାହ କହିଛନ୍ତି, ‘ପ୍ରଥମେ ଏହା ସ୍ପଷ୍ଟ ହୋଇ ଯାଉ କି ଓଡ଼ିଶାରେ ଆମେ ମେଣ୍ଟ କରିବୁ କି ଏକା ଲଢିବୁ । ଏହା ପରେ ପରବର୍ତ୍ତୀ ନିଷ୍ପତ୍ତି ନିଆଯିବ । ଯଦି ମେଣ୍ଟ ନ ହୁଏ ତେବେ ଆମେ ନିହାତି ଭାବେ ସରକାର ଗଠନ କରିବାକୁ ପ୍ରୟାସ କରିବୁ ।’