କୋଷାଗୁମୁଡ଼ା, ୨୧।୧୨(ଡି.ଏନ୍.ଏ.): ଚଳିତ ବର୍ଷ ଆରମ୍ଭରୁ ଦେଖାଦେଇଛି ଖରିଫ ଧାନମଣ୍ଡିରେ ଅବ୍ୟବସ୍ଥା। ପ୍ରଥମ ଦିନରୁ ଧାନମଣ୍ଡିରେ ଅଚଳାବସ୍ଥା। ଉଠିପାରିନାହିଁ ମଣ୍ଡିରୁ ଚାଷୀଙ୍କ ଧାନ। ବିଭାଗ ମିଲର୍ସଙ୍କୁ ସୁହାଇଲା ଭଳି ଧାନ ବିକ୍ରି ପାଇଁ ଚାଷୀଙ୍କୁ ବାଧ୍ୟ କରୁଥିବା ଅଭିଯୋଗ ଆଣିଛନ୍ତି ଚାଷୀ। କୁଇଣ୍ଟାଲ ପିଛା ୫ରୁ ୬ କି.ଗ୍ରା. କଟ୍ନିକୁ ବିରୋଧକରି ୨ଦିନ ହେବ ମଣ୍ଡିରେ ପଡ଼ିରହିଛି ଚାଷୀଙ୍କ ଧାନ। କଟ୍ନି ଛଟ୍ନିକୁ ନେଇ ଚାଷୀ ମିଲର୍ସ ମୀମାଂସା ନ ହୋଇ ଦେଖାଦେଇଛି ବିବାଦ। ଫଳ ସ୍ବରୂପ ରାସ୍ତାକୁ ଓହ୍ଲାଇବାକୁ ବାଧ୍ୟ ହୋଇଛନ୍ତି ନବରଙ୍ଗପୁର ଜିଲା କୋଷାଗୁମୁଡ଼ା ବ୍ଲକ ବଡ଼ଆମ୍ବଡ଼ା ଚାଷୀ।
କୋଷାଗୁମୁଡ଼ା ଲ୍ୟାମ୍ପ୍ସ ଅଧୀନ ବଡ଼ଆମ୍ବଡ଼ା ମଣ୍ଡିରେ ସପ୍ତାହର ସୋମବାର ଓ ମଙ୍ଗଳବାର ବଡ଼ଆମ୍ବଡ଼ା, ସାନଆମ୍ବଡ଼ା, ବିଞ୍ଜିଲି, ଉକିଆପାଲି ପଞ୍ଚାୟତର ଚାଷୀମାନଙ୍କ ଧାନ ବିକ୍ରି ପାଇଁ ଧାର୍ଯ୍ୟ କରାଯାଇଛି। ସୋମବାର ୧୭୧ ଚାଷୀଙ୍କ ମୋଟ ୧୫୨୫୦ ପ୍ୟାକେଟ ଧାନ ବିକ୍ରି ପାଇଁ ବଡ଼ଆମ୍ବଡ଼ା ମଣ୍ଡିରେ ପଡ଼ିଥିଲା। ଚାଷୀମାନଙ୍କୁ ମିଲର୍ସମାନେ ଧାନର ମାନ ଏଫ୍ଏକ୍ୟୁ ନ ଥିବା କହି କଟ୍ନି ଛଟ୍ନି ବାବଦରେ କୁଇଣ୍ଟାଲ ପିଛା ୫ରୁ ୬ କିଲୋ କାଟିବାକୁ କହିଥିଲେ। ଚାଷୀମାନେ ୨ କିଲୋ କଟ୍ନି ପାଇଁ ରାଜି ହୋଇଥିଲେ ମଧ୍ୟ ମିଲର୍ସମାନେ ଏଥିରେ ରାଜି ହୋଇ ନ ଥିଲେ। ଏନେଇ ଚାଷୀ ବିଭାଗୀୟ ଅଧିକାରୀଙ୍କୁ ଅଭିଯୋଗ କରିବା ପରେ ମଧ୍ୟ ବିଭାଗୀୟ ଅଧିକାରୀ ଚାଷୀଙ୍କୁ ସହଯୋଗ କରିବା ପରିବର୍ତ୍ତେ ମିଲର୍ସଙ୍କୁ ସୁହାଇବା ଭଳି ପଦକ୍ଷେପ ଗ୍ରହଣ କରୁଥିବା ଚାଷୀମାନେ ଅଭିଯୋଗ କରିଛନ୍ତି। ଧାନବିକ୍ରି ପାଇଁ ମିଲର୍ସ ଓ ଚାଷୀଙ୍କ ମଧ୍ୟରେ କୌଣସି ମୀମାଂସା ହୋଇ ନ ପାରି ବାଧ୍ୟହୋଇ ସମସ୍ତ ଚାଷୀ କୋଷାଗୁମୁଡା-ବରଗାଁ ରାସ୍ତାକୁ ଓହ୍ଲାଇ ଦିନ ୧୧ଟାରୁ ଅବରୋଧ କରିଥିଲେ। ଅପରାହ୍ନରେ ଅତିରିକ୍ତ ଜିଲା ଯୋଗାଣ ଅଧିକାରୀ ଦୁର୍ଗା ମାଝି ଓ ବ୍ଲକ ଯୋଗାଣ ନିରୀକ୍ଷକ ରାଜେଶ ଶବର, ବଡ଼ଆମ୍ବଡା ଫାଣ୍ଡି ପୋଲିସ ଘଟଣାସ୍ଥଳକୁ ଯାଇ ଧାନର ମାନ ପ୍ରଥମେ ବିଶ୍ଳେଷଣ କରିବା ପରେ ବିକ୍ରି ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ବହୁ ବୁଝାଶୁଝା କରିଥିଲେ। ପରେ ଚାଷୀମାନେ ରାସ୍ତାରୁ ହଟିଯାଇଥିଲେ। ପରେ ଚାଷୀମାନଙ୍କ ଧାନର ମାନ ମଧ୍ୟ ପରୀକ୍ଷା କରିଥିଲେ। ଏବେ ଯାଏ କିନ୍ତୁ ଧାନମଣ୍ଡିରେ ରହିଛି। ଚାଲିଥିବା ଅବ୍ୟବସ୍ଥା ଯଦି ଶୀଘ୍ର ସମାଧାନ ନ ହୁଏ ତେବେ ଆଗାମୀ ଦିନରେ ଚାଷୀ ବଡ଼ଧରଣର ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।