କୁହାଯାଏ, ଚେଷ୍ଟା କଲେ ସଫଳତା ନିଶ୍ଚେ ମିଳେ। ଏହାର ନିଚ୍ଛକ ଉଦାହରଣ ବିହାରର ୨୪ ବର୍ଷୀୟା ସମ୍ପ୍ରିତି ଯାଦବ। କଠିନ ପରିଶ୍ରମ ବଳରେ ସେ ଗୁଗଲରେ ଚାକିରି ପାଇଛନ୍ତି। ଏକ ସମୟ ଥିଲା ଯେତେବେଳେ ସମ୍ପ୍ରତି କ୍ରମାଗତ ୫୦ ସାକ୍ଷାତକାର ପରେ ଚାକିରି ପାଇବାରେ ବିଫଳ ହୋଇଥିଲେ। ତେବେ ଏଭଳି ବିଫଳତା ପରେ ମଧ୍ୟ ସମ୍ପ୍ରିତି ହାର ମାନି ନ ଥିଲେ। ଆଜି ତାଙ୍କୁ ଚାରୋଟି କମ୍ପାନୀରୁ ଅଫର୍ ଅଛି। କେବଳ ଏତିକି ନୁହେଁ, ଗୁଗଲ ତାଙ୍କୁ ବାର୍ଷିକ ୧.୧୦ କୋଟି ଟଙ୍କା ପ୍ୟାକେଜ ମଧ୍ୟ ଦେଇଛି। ସମ୍ପ୍ରିତ ଏହାକୁ ଗ୍ରହଣ କରିଛନ୍ତି। ଏହି ସଫଳତା ପରେ ତାଙ୍କ ଘରେ ଖୁସିର ଲହରୀ ଖେଳିଯାଇଛି । ସମ୍ପ୍ରିତି ଫେବୃୟାରୀ ୧୪ରୁ ଗୁଗଲରେ କାମ କରିବା ଆରମ୍ଭ କରିବେ। ସେ ଦିଲ୍ଲୀ ଟେକ୍ନୋଲୋଜି ୟୁନିଭରସିଟିରୁ କମ୍ପ୍ୟୁଟର ସାଇନ୍ସରେ ବି.ଟେକ ଡିଗ୍ରୀ ହାସଲ କରିଛନ୍ତି।
ଗୁଗଲରେ ଚାକିରି ପାଇବା ସମ୍ପ୍ରତିଙ୍କ ପାଇଁ ଏତେ ସହଜ ନ ଥିଲା। ଏଥିପାଇଁ ସେ ୯ ରାଉଣ୍ଡ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ଏହି ସମସ୍ତ ରାଉଣ୍ଡରେ ସମ୍ପ୍ରତି ପ୍ରଶ୍ନର ସଠିକ ଉତ୍ତର ଦେଇଥିଲେ। ଏହା ପରେ ହିଁ ସମ୍ପ୍ରିତି ଗୁଗଲରୁ ଏତେ ବଡ ପ୍ୟାକେଜ ସହିତ ଏକ ଚାକିରି ଅଫର୍ ପାଇଲେ। ମାଇକ୍ରୋସଫ୍ଟ କମ୍ପାନୀରୁ ସମ୍ପ୍ରିତଙ୍କର ଏକ ଚାକିରି ଅଫର ମଧ୍ୟ ଥିଲା। ଗୁଗୁଲର ସାକ୍ଷାତକାର ପାଇଁ ସେ କଠିନ ପରିଶ୍ରମ କରିଛନ୍ତି ବୋଲି ସମ୍ପ୍ରିତି କହିଛନ୍ତି। ପ୍ରତ୍ୟେକ ରାଉଣ୍ଡରେ ତାଙ୍କ ଉତ୍ତରରେ ଅଧିକାରୀମାନେ ସନ୍ତୁଷ୍ଟ ହୋଇଥିଲେ। ସମ୍ପ୍ରିତି କୁହନ୍ତି,ଯଦି ତୁମେ କିଛି ବଡ କରିବାକୁ ଚାହୁଁଛ, ତେବେ ସର୍ବପ୍ରଥମେ ତୁମର ଲକ୍ଷ୍ୟ ସ୍ଥିର କର। ଏହା ପରେ, ସମାନ ଲକ୍ଷ୍ୟ ଅନୁଯାୟୀ ତୁମର ପ୍ରସ୍ତୁତି ସହିତ ଅଗ୍ରଗତି କର, ତୁମେ ନିଶ୍ଚିତ ଭାବରେ ସଫଳତା ପାଇବ। ସମ୍ପ୍ରିତି ପିଲାଦିନରୁ ଏକ ସ୍ବପ୍ନ ଦେଖିଥିଲେ ଯେ ସେ ଗୁଗଲର ଲଣ୍ଡନ ଅଫିସରେ କାମ କରିବାର ସୁଯୋଗ ପାଇବେ। ଏବେ ତାଙ୍କ ସ୍ବପ୍ନ ସତ ହେବାକୁ ଯାଉଛି।