ନୂଆଦିଲ୍ଲୀ,୨୬।୨: କଂଗ୍ରେସର ପୂର୍ବତନ କଂଗ୍ରେସ ସଭାପତି ସୋନିଆ ଗାନ୍ଧୀ କଂଗ୍ରେସ ଅଧିବେଶନରେ ଦେଇଥିବା ଭାଷଣ ପରେ ସେ ଖୁବ୍ଶୀଘ୍ର ରାଜନୀତିରୁ ଅବସର ନେବା ନେଇ କଳ୍ପନାଜଳ୍ପନା ଆରମ୍ଭ ହୋଇଥିଲା। ବର୍ତ୍ତମାନ ଏହି କଳ୍ପନାଜଳ୍ପନାକୁ ସୋନିଆ ଗାନ୍ଧୀ ପ୍ରତ୍ୟାଖ୍ୟାନ କରିଛନ୍ତି। କଂଗ୍ରେସ ମୁଖପାତ୍ର ଅଲକା ଲାମ୍ବା ରବିବାର ସୋନିଆଙ୍କ ପକ୍ଷରୁ କହିଛନ୍ତି ଯେ, ସେ କେବେ ଅବସର ନେଇ ନାହାଁନ୍ତି ଏବଂ ଆଗକୁ ମଧ୍ୟ ନେବାର ଯୋଜନା ନାହିଁ।
୮୫ତମ କଂଗ୍ରେସ ସମ୍ମିଳନୀର ଶେଷ ହେବା ପରେ ଅଳକା କହିଛନ୍ତି ଯେ, ଗଣମାଧ୍ୟମ ସୋନିଆ ମ୍ୟାଡାମଙ୍କ ଭାଷଣକୁ ଭୁଲ ବ୍ୟାଖ୍ୟା କରିବା ବନ୍ଦ କରିବା ଉଚିତ। ଯେତେବେଳେ ମୁଁ ତାଙ୍କୁ ଏହି ଖବର ବିଷୟରେ କହିଲି, ସେ ହସି ହସି କହିଲେ ମୁଁ କେବେ ଅବସର ନେଇ ନାହିଁ କିମ୍ବା ମୁଁ ଅବସର ନେବାକୁ ଯାଉନାହିଁ। ତେଣୁ ତାଙ୍କ ଭାଷଣରୁ ଏଭଳି ଅନର୍ଥ ନ କରିବାକୁ ଗଣମାଧ୍ୟମକୁ ଅନୁରୋଧ କରିଛନ୍ତି।
ସୂଚନାଯୋଗ୍ୟ, କଂଗ୍ରେସ ସମ୍ମିଳନୀରେ ସୋନିଆ କହିଥିଲେ, ଭାରତ ଯୋଡା ଯାତ୍ରା ସହିତ ମୋର ଇନିଂସ ଶେଷ ହୋଇଛି। କିଛି ଗଣମାଧ୍ୟମ ରିପୋର୍ଟରେ ତାଙ୍କ ବିବୃତ୍ତି ରାଜନୀତିରୁ ଅବସର ନେବା କଥା ବିଷୟ ଧରି ନିଆଯାଇଛି। ଯାହାକୁ କଂଗ୍ରେସ ମଧ୍ୟ ଅସ୍ବୀକାର କରିଛି।