ଖୋର୍ଦ୍ଧା,୧ା୩(ପ୍ରଭାତ ପାଣିଗ୍ରାହୀ):ଭୁବନେଶ୍ୱର ସଂସଦୀୟ କ୍ଷେତ୍ରରୁ ଦୀର୍ଘବର୍ଷ ଧରି ବିଜେଡି ପ୍ରାର୍ଥୀ ଜିତି ଆସୁଥିବା ବେଳେ ୨୦୧୯ ନିର୍ବାଚନରେ ଭାଜପାରୁ ଅପରାଜିତା ଷଡ଼ଙ୍ଗୀ ଏମ୍ପି ହୋଇଥିଲେ। ୨୦୨୪ ଲୋକ ସଭା ନିର୍ବାଚନରେ ଅପରାଜିତା ଭାଜପାରୁ ପୁଣି ପ୍ରାର୍ଥୀ ହେବେ ବୋଲି କୁହାଯାଉଛି। ଯଦି ସେ ପ୍ରତିଦ୍ୱନ୍ଦ୍ୱିତା କରନ୍ତି, ତାଙ୍କୁ କିଏ ଟକ୍କର ଦେବେ ତାହାକୁ ନେଇ ଚର୍ଚ୍ଚା ହେଉଛି। ଶୁଣିବାକୁ ମିଳୁଛି ବିଜେଡିରୁ କୋଠାବାଡ଼ି ଓ ନିର୍ମାଣ ଶ୍ରମିକ ବୋର୍ଡ ଅଧ୍ୟକ୍ଷା ଶ୍ରୀମୟୀ ମିଶ୍ର ପ୍ରାର୍ଥୀ ହୋଇପାରନ୍ତି। ସେପଟେ କଂଗ୍ରେସ କୁଆଡ଼େ ଭୁବନେଶ୍ୱର ସଂସଦୀୟ କ୍ଷେତ୍ର ଉପରେ ନଜର ପକାଇଲାଣି। ଯଦିଓ ଆଗାମୀ ନିର୍ବାଚନରେ ଦଳ କାହାକୁ ଏଠାରୁ ପ୍ରାର୍ଥୀ କରିବ ସ୍ଥିର ହୋଇ ନାହିଁ, ତେବେ ବରିଷ୍ଠ ନେତା ସୁରେଶ ରାଉତରାୟଙ୍କୁ ପ୍ରୋଜେକ୍ଟ କରୁଥିବା ଆଲୋଚନା ହେଉଛି। ସେଥିଲାଗି ସୁରେଶ କୁଆଡ଼େ ବିଧାନସଭାକୁ ବାଏ କହି ଭାବବିହ୍ବଳ ହୋଇଥିଲେ। ପାର୍ଲାମେଣ୍ଟକୁ ସୁରେଶଙ୍କୁ ପଠାଇବା ପାଇଁ ଦଳ ଭିତିରିଆ ପ୍ରସ୍ତୁତି ଆରମ୍ଭ କରିଥିବା ଜଣାପଡ଼ୁଛି। ସୁରେଶ ଜଟଣୀ ନିର୍ବାଚନମଣ୍ଡଳୀରୁ ୬ଥର ବିଧାୟକ ହୋଇଥିବା ବେଳେ ଥରେ ମନ୍ତ୍ରୀ ହୋଇଥିଲେ। ସୋସିଆଲ ମିଡିଆରେ ସେ ସର୍ବାଗ୍ରେ ଚର୍ଚ୍ଚାରେ ରହୁଥିବା ବେଳେ ସରକାରଙ୍କୁ ବିଭିନ୍ନ ପ୍ରସଙ୍ଗରେ ସମାଲୋଚନା କରି ଗଣମାଧ୍ୟମର ଶିରୋନାମା ପାଲଟିଥାନ୍ତି।
ଅପରପକ୍ଷରେ ଚାରିଆଡ଼େ ଏବେ ବିଜେଡି ଏବଂ ଭାଜପାରେ ଦଳୀୟ ଟିକେଟକୁ ନେଇ ଗୋଷ୍ଠୀ କନ୍ଦଳ। ଖୋର୍ଦ୍ଧା, ବେଗୁନିଆ, ଜଟଣୀ, ଏକାମ୍ର ସବୁଠି ଏହା ଜଳଜଳ ଦେଖାଗଲାଣି। ଏହାକୁ ଦୃଷ୍ଟିରେ ରଖି ଭାଜପା ଓ ବିଜେଡିକୁ କଂଗ୍ରେସରୁ ଏକମାତ୍ର ସୁରେଶ ଟକ୍କର ଦେଇପାରିବେ ବୋଲି ଚର୍ଚ୍ଚା ହେଉଛି। ଏପରିକି ଅସନ୍ତୁଷ୍ଟ ବିରୋଧୀଙ୍କ ଭୋଟ ମଧ୍ୟ ତାଙ୍କୁ ମିଳିବା ସମ୍ଭାବନା ଅଧିକ। ପ୍ରାର୍ଥତ୍ତ୍ୱକୁ ନେଇ ଚାଲିଥିବା ଆଲୋଚନାକୁ ସୁର ଖଣ୍ଡନ କରିଥିବା ବେଳେ ଭାଜପାର ଅସନ୍ତୁଷ୍ଟ କର୍ମୀ କୁଆଡ଼େ ଅପରାଜିତାଙ୍କୁ ହରାଇବା ପାଇଁ ସୁରେଶଙ୍କୁ ସମର୍ଥନ କରିପାରନ୍ତି ବୋଲି କୁହାଯାଉଛି। ଅପରାଜିତାଙ୍କ ବିରୋଧରେ ଅସନ୍ତୁଷ୍ଟ ଦଳୀୟ କର୍ମୀ ସ୍ବର ଉତ୍ତୋଳନ କରିବାରେ ଲାଗିଛନ୍ତି। ପୁଣି ଅତୀତରେ ଅପରାଜିତା ବିଭିନ୍ନ ପ୍ରସଙ୍ଗରେ ଶଣ୍ଢୁଆସି ଆକ୍ରମଣ କରି ରାଜ୍ୟ ସରକାରଙ୍କୁ ଅସ୍ତବ୍ୟସ୍ତ କରି ପକାଇଛନ୍ତି। କୌଣସି ପ୍ରକାରେ ବିଜେଡି ଏଥର ଅପରାଜିତାଙ୍କୁ ହରାଇବା ପାଇଁ କାଉଣ୍ଟଡାଉନ୍ ଆରମ୍ଭ କରିଦେଇଥିବା ଆଲୋଚନା ହେଉଛି।