ନୂଆଦିଲ୍ଲୀ, ୨୯।୭: ପସନ୍ଦର ସେଲିବ୍ରିଟିଙ୍କୁ ଜୀବନରେ ଥରେ ହେଉନା କାହିଁକି ଭେଟିବାକୁ ସବୁ ପ୍ରଶଂସକଙ୍କ ସ୍ବପ୍ନ ଥାଏ। ଏପରିକି କେତେଜଣ ଭାଗ୍ୟଶାଳୀ ବ୍ୟକ୍ତି ଥାଆନ୍ତି ଯିଏକି ନିଜର ପସନ୍ଦର ସେଲିବ୍ରିଟିଙ୍କୁ ଅତି ନିକଟରୁ ଭେଟିବାର ସୁଯୋଗ ପାଇଥାନ୍ତି। ସେହି ଭାଗ୍ୟଶାଳୀ ପ୍ରଶଂସକଙ୍କ ମଧ୍ୟରୁ ଜଣେ ହେଉଛନ୍ତି ମହମ୍ମଦ ଶାହବ। ନିକଟରେ ଶାହବ ପାକିସ୍ତାନ କ୍ରିକେଟ୍ ଦଳର ଷ୍ଟାର୍ ବୋଲର ହାରିସ ରୌଫ୍ଙ୍କୁ ଅତି ନିକଟରୁ ଭେଟିବାର ସୁଯୋଗ ପାଇଥିଲେ। ଏହାପରେ ହାରିସଙ୍କ ସହ ସେଲ୍ଫି ନେଇଥିଲେ ଶାହବ। ତେବେ ସେ ଜାଣିବାକୁ ଚାହିଁଲେ ଯେ ଇଂଲଣ୍ଡ ଗସ୍ତ ଲାଗି ହାରିସ କାହିଁକି ପାକିସ୍ତାନ ଦଳରେ ସାମିଲ ହୋଇନାହାନ୍ତି। ଏଥିଲାଗି ଶାହବ ଗୁଗ୍ଲରେ ସର୍ଚ୍ଚ କରିଥିଲେ। ସର୍ଚ୍ଚ ସମୟରେ ଶାହବ ଯାହା ଜାଣିଲେ ସେଥିରେ ତାଙ୍କ ଖୁସି ବେଶୀ ସମୟ ତିଷ୍ଠି ପାରି ନ ଥିଲା। ଯେଉଁ କ୍ରିକେଟର୍ଙ୍କ ସହ ସେଲ୍ଫି ଉଠାଇଛନ୍ତି ତାଙ୍କୁ କରୋନା ହୋଇଛି ବୋଲି ସେ ଜାଣିବାକୁ ପାଇଲେ। କରୋନା ପଜିଟିଭ ଚିହ୍ନଟ ହୋଇଥିବା ଯୋଗୁ ପାକିସ୍ତାନ କ୍ରିକେଟ୍ ବୋର୍ଡ ହାରିସଙ୍କୁ ଇଂଲଣ୍ଡ ଗସ୍ତ ଲାଗି ଘୋଷିତ ପାକିସ୍ତାନ ଦଳରୁ ବାଦ୍ ଦେଇଥିଲା। ହାରିସଙ୍କ ସମେତ ୬ଜଣ ପାକିସ୍ତାନ ଖେଳାଳି କରୋନା ଚିହ୍ନଟ ହେବାରୁ ଇଂଲଣ୍ଡ ଗସ୍ତରୁ ବାଦ୍ ପଡ଼ିଥିଲେ।