କେନ୍ଦୁଝର/ପାଟଣା,୨୬।୧୦(ସ୍ବ.ପ୍ର.): କାଳୀପୂଜା ବା ଦୀପାବଳିକୁ ଅନେକେ ବାଣ ଫୁଟାଇ, ବିଭିନ୍ନ ପ୍ରକାର ଆଲୋକରେ ସଜାଇ ପାଳନ କରିଥାନ୍ତି। କୁଡୁମୀ ତଥା ଅନ୍ୟ କେତେକ ଆଦିବାସୀ ସମ୍ପ୍ରଦାୟର ଲୋକମାନେ ଏହାକୁ ଧୁମ୍ଧାମ୍ରେ କୃଷିଭିତ୍ତିକ ବାନ୍ଦନା ପରବ ଭାବେ ପାଳନ କରିଛନ୍ତି। ଏହାକୁ ମଧ୍ୟ ଗୋବର୍ଦ୍ଧନ ବା ହାତୀ ଲେଖେନ ପରବ କୁହାଯାଏ। ୩ ଦିନ ଧରି ପାଳିତ ହେଉଥିବା ଏହି ପର୍ବ ଦୀପାବଳି ଅବସରରେ ଆରମ୍ଭ ହୋଇଛି। ପ୍ରଥମ ଦିନ ଗୋଠ ପୂଜା, ଦ୍ୱିତୀୟ ଦିନ ଗୁହାଳ ପୂଜା ଓ ତୃତୀୟ ଦିନକୁ ବୁଢ଼ୀ ବାନ୍ଦନା ଓ ଗୋରୁ ଖୁଣ୍ଟା ଭାବେ ପାଳନ କରାଯାଇଥାଏ। ମଙ୍ଗଳବାର ସୂର୍ଯ୍ୟୋପରାଗ ଥିବାରୁ ବୁଧବାର, ଗୁରୁବାର ଦ୍ୱିତୀୟ ଓ ତୃତୀୟ ଦିନ ପୂଜା ସମ୍ପନ୍ନ ହେବ ବୋଲି ସମ୍ପ୍ରଦାୟର ପୂଜାରୀ(ଦେହୁରୀ) ସୂଚନା ଦେଇଛନ୍ତି।
ପାଳସପଙ୍ଗା ପଞ୍ଚାୟତର ମୁରୁସୁଅଁା ଗ୍ରାମରେ ପ୍ରଥମ ଦିନର ପୂଜା ଅନୁଷ୍ଠିତ ହୋଇଯାଇଛି। ପୂର୍ବରୁ ସମସ୍ତେ ନିଜ ଘରକୁ ମାଟିରେ ଲିପାପୋଛା କରି ନୂତନ ରଙ୍ଗ କରିଥିଲେ। ବଳଦ ଓ ପଣ୍ଡାଙ୍କୁ ଖୁଣ୍ଟରେ ବାନ୍ଧି ନେତୃତ୍ୱ ନେବାର ତାଲିମ ଦିଆଯାଇଥିଲା। ଗ୍ରାମ ପଡ଼ିଆରେ ଗ୍ରାମର ଦେହୁରୀ ଅନନ୍ତ ମହାନ୍ତ ଅଣ୍ଡା ରଖି ପ୍ରଥମେ ପୂଜାର୍ଚ୍ଚନା କରିଥିଲେ। ଉକ୍ତ ଅଣ୍ଡା ଉପରେ ଗୋରୁମାନଙ୍କୁ ଏକତ୍ରିତ ଛଡ଼ାଯାଇଥିଲା। ଯେଉଁ ଗୋରୁ ଅଣ୍ଡା ମାଡ଼ିଥିଲା ତାକୁ ପୂଜାର୍ଚ୍ଚନା କରାଯିବା ସହ ଗୋରୁ ମାଲିକଙ୍କୁ ଫୁଲମାଳ ପିନ୍ଧାଇ କାନ୍ଧରେ ବସାଇ ଗ୍ରାମ ପରିକ୍ରମା କରାଯାଇଥିଲା। ସେହିପରି କୃଷି କାର୍ଯ୍ୟରେ ସହାୟକ ଯନ୍ତ୍ରପାତି ହଳ, ଲଙ୍ଗଳ, ଜୁଆଳି, ମଇ, ଟ୍ରାକ୍ଟର, ପାୱାର ଟିଲର ଆଦିକୁ ବନ୍ଦାପନା କରିଥିଲେ। ୯ ଗୋଟି ପ୍ରାକୃତିକ ଶକ୍ତି ଯଥା-ଗରାମ/ଜାହିର ମାଇଁ, ଧରମ ଦେଉତା, ବସମତା, ଗରୟା, ଗୋସାଇଁ ରାଇ, ବଳ ପାହାଳ, ବାନସିନୀ, କୁଦ୍ରା ଓ ବାଘୁତଙ୍କୁ ୯ ଗୋଟି କୁକୁଡ଼ା ସମର୍ପଣ କରି ଆରାଧନା କରିଥିଲେ। ମଙ୍ଗଳବାର ସୂର୍ଯ୍ୟୋପରାଗ ପଡ଼ୁଥିବାରୁ ବୁଧବାର ଘରଗୁଡିକରେ ଗୁହାଳ ପୂଜା, ବୁଢ଼ୀ ବାନ୍ଦନା ଓ ଗୋରୁ ଖୁଣ୍ଟା ପୂଜା ପରବର୍ତ୍ତୀ ଦିନରେ ହେବ ବୋଲି ଦେହୁରୀ ମହାନ୍ତ କହିଛନ୍ତି। ପର୍ବରେ ନିଜସ୍ବ କୁଡୁମି ଦେହୁରୀ/ମହତୋ ଗୋପନରେ ପୂଜା କରିବାର ସାମାଜିକ ବ୍ୟବସ୍ଥା ରହିଛି। ଏଥିସହ ଘରେ ମୁଖିଆ ମଧ୍ୟ ପୂଜା କରିଥାନ୍ତି। ଘରେ ଘରେ ପିଠାପଣା, ଆମିଷ ଆଦି ସ୍ବାଦିଷ୍ଟ ଖାଦ୍ୟ ପ୍ରସ୍ତୁତ କରିଥାନ୍ତି। ନୂଆ ଲୁଗା ପିନ୍ଧି, ପିଠାପଣା ଖାଇ, ନାଚ ଗୀତ କରି ଦିନଟିକୁ କଟାଇଥାନ୍ତି ବୋଲି ପାଳସପଙ୍ଗା ଗ୍ରାମର ପୂର୍ଣ୍ଣଚନ୍ଦ୍ର ମହାନ୍ତ କୁହନ୍ତି।