ଜୟପୁର,୧୮ା୨(ପି.ଟି.): ହରିୟାଣାରେ ଏକ କାର୍ରୁ ୨ ମୁସଲମାନଙ୍କ ପୋଡ଼ିଯାଇଥିବା ମୃତଦେହ ମିଳିବା ଘଟଣାରେ ପୋଲିସ ଶୁକ୍ରବାର ଜଣେ ଅଭିଯୁକ୍ତଙ୍କୁ ଗିରଫ କରିଛି। ହରିୟାଣା ନୁହ ଜିଲାର ଫିରୋଜପୁର ଝିର୍କା ଅଞ୍ଚଳର ରିଙ୍କୁ ସାଇନି(୩୨)ଙ୍କୁ ଜେରା ପରେ ଗିରଫ କରାଯାଇଛି। ଟ୍ୟାକ୍ସି ଡ୍ରାଇଭର ସାଇନି ଗୋସୁରକ୍ଷା କର୍ମୀମାନଙ୍କ ଗୋଷ୍ଠୀ ସହ ସମ୍ପୃକ୍ତ ଥିବା ପୋଲିସ କହିଛି। ଏତଲାରେ ସାଇନିଙ୍କ ସମେତ ୫ ଅଭିଯୁକ୍ତଙ୍କ ନାଁ ରହିଛି। ସେମାନଙ୍କ ବିରୋଧରେ ଆଇପିସିର ଧାରା ୧୪୩(ବେଆଇନ ଭାବେ ଏକତ୍ର ହେବା), ୩୬୫(ଅପହରଣ), ୩୬୭(ଅପହରଣ ପରେ ଗଭୀର ଆଘାତ ଦେବା) ଏବଂ ୩୬୮(ବନ୍ଧକ ରଖିବା)ରେ ମାମଲା ରୁଜୁ ହୋଇଛି। ଅନ୍ୟମାନଙ୍କୁ ଖୁବ୍ଶୀଘ୍ର ଗିରଫ କରାଯିବ। ସେମାନେ ବଜରଙ୍ଗ ଦଳ ସହ ସମ୍ପୃକ୍ତ ବୋଲି ମୃତକଙ୍କ ପରିବାର ସଦସ୍ୟ କହିଛନ୍ତି।
ଗୋସୁରକ୍ଷା କର୍ମୀମାନେ ୨ ମୁସଲମାନଙ୍କୁ ଅପହରଣ କରିନେଇଥିବା ଅଭିଯୋଗ ହୋଇଥିଲା। ତେବେ ଅପହରଣକାରୀ ଗୋସୁରକ୍ଷା କର୍ମୀ ଥିଲେ କି ନାହିଁ ତାହାର ତଦନ୍ତ ଚାଲିଥିବା ପୋଲିସ କହିଛି। ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଘଟଣାର ନିନ୍ଦା କହିବା ସହ ଅପରାଧୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଲାଗି ପୋଲିସକୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି। ରାଜସ୍ଥାନ ଭରତପୁର ଜିଲା ଘାଟମିକା ଗ୍ରାମର ନାସିର(୨୫) ଏବଂ ଜୁନେଦ୍ ଓରଫ ଜୁନା (୩୫)ଙ୍କୁ ବୁଧବାର ଅପହରଣ କରାଯାଇଥିବାବେଳେ ଗୁରୁବାର ସକାଳେ ସେମାନଙ୍କ ମୃତଦେହ ଭିଓ୍ବାନିରେ ଏକ ଦଗ୍ଧ କାର୍ ଭିତରୁ ମିଳିଥିଲା। ବଜରଙ୍ଗ ଦଳର କର୍ମୀମାନେ ସେମାନଙ୍କୁ ଅପହରଣ କରିଥିଲେ ବୋଲି ପରିବାର ଅଭିଯୋଗ କରିଥିଲା।