ଜମନକିରା,୭ା୧୧(ଡି.ଏନ.ଏ.): ପ୍ରଶାସନର ପ୍ରତିଶ୍ରୁତି ପାଇବା ପରେ ସୋମବାର ଜମନକିରା ବ୍ଲକ ଆଦିବାସୀ ସମ୍ପ୍ରଦାୟ ପକ୍ଷରୁ କରାଯାଇଥିବା ରାସ୍ତାରୋକୋ ନିଷ୍ପତ୍ତିକୁ ସ୍ଥଗିତ ରଖାଯାଇଛି। ସୂଚନା ଅନୁସାରେ, ବ୍ଲକର ଡିମିରିମୁଣ୍ଡା ଛକ ରାସ୍ତାପାର୍ଶ୍ୱରେ କେତେକ ଆଦିବାସୀ ପରିବାର ଜମି ଅଧିଗ୍ରହଣ କରିଥିଲେ। ଆଦିବାସୀଙ୍କ କହିବା ଅନୁଯାୟୀ ସରକାର ସେମାନଙ୍କୁ ଜଙ୍ଗଲ ଜମି ପଟ୍ଟା ପ୍ରଦାନ କରିଛନ୍ତି।
ଏପରିସ୍ଥଳେ ପ୍ରାୟ ୪-୫ ମାସ ତଳେ ପ୍ରଶାସନ ପକ୍ଷରୁ ସେହି ସ୍ଥାନରେ ଏକ ମାର୍କେଟ କମ୍ପ୍ଲେକ୍ସ ତିଆରି ପାଇଁ ଅନୁମତି ଦେଇଥିଲେ। ଫଳରେ ଜନୈକ ଠିକାଦାର ଗତ ୨୩ ତାରିଖରେ କାମ ଆରମ୍ଭ କରିଥିଲେ। ହେଲେ ଆଦିବାସୀ ପରିବାର ଏହାକୁ ବିରୋଧ କରିଥିଲେ। ଫଳରେ କାର୍ଯ୍ୟରତ ଶ୍ରମିକ ଓ ଆଦିବାସୀ ପରିବାର ମଧ୍ୟରେ ପାଟିତୁଣ୍ଡ ହୋଇଥିଲା। ଏପରିକିି ହାତାହାତି ପର୍ଯ୍ୟନ୍ତ କଥାଯାଇଥିଲା। ପରେ ଆଦିବାସୀ ପରିବାର ଏ ନେଇ କୁଚିଣ୍ଡା ଥାନାରେ ଏତଲା ଦେଇଥିଲେ। ହେଲେ ପୋଲିସ ପକ୍ଷରୁ ପଦକ୍ଷେପ ନିଆ ନ ଯିବାରୁ ଆଦିବାସୀମାନେ ପୂର୍ବ ନିଷ୍ପତ୍ତି କ୍ରମେ ସୋମବାର କୁଚିଣ୍ଡା-ଦେବଗଡ଼ ରାସ୍ତା ଅବରୋଧ କରିବାକୁ ସଜବାଜ ହୋଇଥିଲେ।
ଖବର ପାଇ କୁଚିଣ୍ଡା ଉପଜିଲାପାଳ ବିଭୂତି ଭୂଷଣ ନାୟକ, ଜମନକିରା ତହସିଲଦାର, ଅତିରିକ୍ତ ତହସିଲଦାର, କୁଚିଣ୍ଡା ଏସ୍ଡିପିଓ ପ୍ରମୁଖ ପହଞ୍ଚି ଆଦିବାସୀ ପରିବାର ସହ ଆଲୋଚନା କରିଥିଲେ। କାଗଜପତ୍ର ଯାଞ୍ଚ ପରେ ସେମାନଙ୍କୁ ନ୍ୟାୟ ଦିଆଯିବ ବୋଲି ପ୍ରତିଶ୍ରୁତି ଦେବାରୁ ରାସ୍ତାରୋକୋ ଆନ୍ଦୋଳନକୁ ସ୍ଥଗିତ ରଖାଯାଇଛି। ତେବେ ନ୍ୟାୟ ନ ମିଳିଲେ କୁଚିଣ୍ଡା ଉପଖଣ୍ଡର ସମସ୍ତ ଆଦିବାସୀ ସମ୍ପ୍ରଦାୟ ଅନ୍ୟାୟ ବିରୋଧରେ ଲଢେଇ କରିବେ ବୋଲି ନେତୃତ୍ୱ ନେଉଥିବା କୁଚିଣ୍ଡା ପୂର୍ବତନ ବିଧାୟକ ବୃନ୍ଦାବନ ମାଝି ଚେତାବନୀ ଦେଇଛନ୍ତି।