ଜଟଣୀ,୨୭।୫(ଡି.ଏନ୍.ଏ.): ବାତ୍ୟା ୟାସ୍ ପରେ ଖୋର୍ଦ୍ଧା ରୋଡ୍ ରେଳମଣ୍ଡଳ (ଜଟଣୀ) ପକ୍ଷରୁ ପୁନରୁଦ୍ଧାର କାର୍ଯ୍ୟ ତ୍ୱରାନ୍ବିତ କରାଯାଇଛି। ବାତ୍ୟା ଯୋଗୁ କ୍ଷୟକ୍ଷତିକୁ ରୋକିବା ନିମନ୍ତେ ଟ୍ରେନ୍ ଚଳାଚଳ, ବିଭିନ୍ନ ବନ୍ଦରଗୁଡ଼ିକରେ ମାଲ ପରିବହନ ପାଇଁ ମାଲ୍ଗାଡି ଚଳାଚଳ ବନ୍ଦ କରିବା ସହ ପ୍ରଭାବିତ ପ୍ରାଇଭେଟ୍ ସାଇଡି୍ଂର ପୁନରୁଦ୍ଧାର ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିଥିଲା। ଏହି ପରିପ୍ରେକ୍ଷୀରେ ଯାଜପୁର-କେନ୍ଦୁଝରରୋଡ-ରାଣିତାଲ ବିଭାଗ, ଭଦ୍ରକ-ଧାମରା ବନ୍ଦର ବିଭାଗ, କଟକ-ପାରାଦୀପ ବିଭାଗ ଏବଂ ହରିଦାସପୁର-ପାରାଦୀପ ପ୍ରଭାବିତ ଅଞ୍ଚଳଗୁଡିକରେ ଥିବା ରେଳ ଟ୍ରାକ୍ ଯାଞ୍ଚ କରାଯାଇଛି। ବାତ୍ୟା ପ୍ରଭାବରେ ପାଣିରେ ବୁଡ଼ିଯାଇଥିତ୍ବା ରେଳ ଟ୍ରାକ୍ଗୁଡିକର କ୍ଷୟକ୍ଷତି ଯାଞ୍ଚ କରିବା ନିମନ୍ତେ ରେଳ ଟ୍ରାକ୍ ପାଟ୍ରୋଲିଂ କରାଯାଇ ମରାମତି କାର୍ଯ୍ୟ ଚାଲିଛି। ଏହାସହ ସିଗ୍ନାଲ ସିଷ୍ଟମ ଏବଂ ପ୍ୟାନେଲ କାର୍ଯ୍ୟର ଯାଞ୍ଚ ଚାଲିଥିବା ବେଳେ ସମ୍ପୃକ୍ତ ବିଭାଗଗୁଡ଼ିକ ପକ୍ଷରୁ ସମ୍ପୂର୍ଣ୍ଣ ଟ୍ରାକ୍ ଏବଂ ଓଭରହେଡ୍ ବିଦ୍ୟୁତୀକରଣ ଫିଟ୍ନେସ ସୁନିଶ୍ଚିତ ହେବାପରେ ଗାଡିଚଳାଚଳ ସ୍ବାଭାବିକ ହେବ ବୋଲି ସୂଚନା ପ୍ରଦାନ କରାଯାଇଛି। ବାତ୍ୟା ସମୟରେ ଖୋର୍ଦ୍ଧା ରୋଡ୍ ମଣ୍ଡଳ, ଭଦ୍ରକ, ଯାଜପୁର-କେନ୍ଦୁଝର ରୋଡ ଏବଂ ଭୁବନେଶ୍ୱର ଇତ୍ୟାଦି ରେଳ ଷ୍ଟେଶନରେ ଅଟକି ଥିବା ଅସହାୟ ଲୋକଙ୍କୁ ରେଳ ପ୍ରଶାସନ ପକ୍ଷରୁ ଖାଦ୍ୟ, ପାନୀୟ ପ୍ରଦାନ କରାଯାଇଥିବା ସମୟରେ ଭୁବନେଶ୍ୱର ମାରଓ୍ବାଡି ଯୁବ ମଞ୍ଚ, ସେଭ୍ ଆଓ୍ବାର ସୋଲ, ଭୁବନେଶ୍ୱର ଏବଂ କନ୍ଦାହାତ ଏସ୍ଏଚ୍ଜି ଏବଂ ବ୍ୟାସ ସେନା-ଯାଜପୁର ସ୍ବେଚ୍ଛାସେବୀ ସଂଗଠନ ପକ୍ଷରୁ ଯାତ୍ରୀ ଏବଂ ଅସହାୟମାନଙ୍କୁ ରନ୍ଧାଖାଦ୍ୟ ପ୍ରଦାନ କରାଯାଇଥିଲା। ଖବର ଲେଖାହେବା ବେଳକୁ ଖୋର୍ଦ୍ଧାରୋଡ୍ ରେଳମଣ୍ଡଳ ସାଧାରଣ ଟ୍ରେନ୍ ଚଳାଚଳ ନିମନ୍ତେ ପ୍ରସ୍ତୁତ ହୋଇଯାଇଥିବା ରେଳ ପ୍ରଶାସନ ପକ୍ଷରୁ ସୂଚନା ଦିଆଯାଇଛି।