କୋଲକାତା,୩୧।୧୦: ପଶ୍ଚିମବଙ୍ଗର ଅଲିପୁରଦାର ଜିଲାର ସପିଂ ମଲରେ ଚକୋଲେଟ୍ ଚୋରି କରିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଜଣେ କଲେଜ ଛାତ୍ରୀ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ଜୟଗାଓଁ ପୋଲିସ ଷ୍ଟେଶନ ଅନ୍ତର୍ଗତ ସୁଭାସ ପାଲୀସ୍ଥିତ ଘରୁ ରବିବାର ଝଲନ୍ତା ଅବସ୍ଥାରେ ଏକ ମୃତଦେହ ଉଦ୍ଧାର କରାଯାଇଥିଲା। ସେ ତୃତୀୟ ବର୍ଷର ଛାତ୍ରୀ ଥିଲେ। ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଚାଲିଛି ବୋଲି ଜୟଗାଓଁ ପୋଲିସ କହିଛି।
ସୂଚନାଯୋଗ୍ୟ, ରବିବାର ଛାତ୍ରୀ ଜଣଙ୍କ ତାଙ୍କ ଭଉଣୀଙ୍କ ସହ ସେହି ଅଞ୍ଚଳର ଏକ ସପିଂ ମଲକୁ ଯାଇଥିଲେ। ସେଠରେ ସେ ଚକୋଲେଟ୍ ଚୋରି କରି ଧରାପଡିଯାଇଥିଲେ। ତେବେ ସେ ଧରାପଡିଯିବା ପରେ ଚକୋଲେଟ୍ର ମୂଲ୍ୟ ଦେଇ ଷ୍ଟୋର କର୍ତ୍ତୃପକ୍ଷଙ୍କ ନିକଟରେ କ୍ଷମା ମାଗିଥିଲେ। ହେଲେ ଦୋକାନରେ ଥିବା ଲୋକମାନେ ଏହି ଘଟଣାର ଏକ ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ଶେୟାର କରିଥିଲେ। ଯାହା ପରବର୍ତ୍ତୀ ସମୟରେ ଭାଇରାଲ ହୋଇଥିଲା। ଏହି ଅପମାନକୁ ସହ୍ୟ କରି ନ ପାରି ଏଭଳି ଚରମ ନିଷ୍ପତ୍ତି ନେଇଥିବା ମୃତ ଛାତ୍ରୀଙ୍କ ବାପା କହିଛନ୍ତି। ଅନ୍ୟପଟେ, ଏହି ଘଟଣାକୁ ନେଇ ସ୍ଥାନୀୟ ଲୋକେ ସପିଂ ମଲ ବାହାରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏଥିସହ ଭିଡିଓ ପ୍ରସ୍ତୁତ କରି ଅନ୍ଲାଇନରେ ଶେୟାର କରିଥିବା ଲୋକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଥିବା ସୂଚନା ମିଳିଛି।