ନୂଆଦିଲ୍ଲୀ,୨୮।୬: ସୋସିଆଲ ମିଡିଆରେ ଭେଦଭାବକୁ ନେଇ ଏକ ଯୁକ୍ତି କିଛିଦିନ ତଳେ ଦେଖିବାକୁ ମିଳିଥିଲା। ଏଥିରେ ବିୟୁଟି ପ୍ରଡକ୍ଟ ପ୍ରସ୍ତୁତକାରୀ କମ୍ପାନୀ କଳା-ଗୋରା ମଧ୍ୟରେ ଭେଦଭାବ କରୁଛନ୍ତି ବୋଲି ଆଲୋଚନା ହୋଇଥିଲା। ଏହାକୁ ନେଇ କେତେଜଣ ୟୁଜର୍ସ ଫେୟାରନେସ୍ କ୍ରିମ ବ୍ୟବହାର ନ କରିବାକୁ ଅନୁରୋଧ କରିଥିଲେ । ଏହାକୁ ଦେଖି ଏବେ କିଛି କମ୍ପାନୀ ‘ଫେୟାର’ ଶବ୍ଦ ହଟାଇ ଦେବା କଥା ଚିନ୍ତା କରୁଛନ୍ତି। ସୋସିଆଲ ମିଡିଆରେ ଚାଲିଥିବା ଏହି ଆଲୋଚନାକୁ ଦେଖି ଫ୍ରାନ୍ସ କମ୍ପାନୀ ଲରିୟଲ ମଧ୍ୟ ଏକ ବଡ ନିଷ୍ପତ୍ତି ନେଇଥିବା ଜଣାପଡିଛି। କମ୍ପାନୀ କହିଛି ସ୍କିନ କେୟାର ସମ୍ବନ୍ଧିତ ତା’ର ସାମଗ୍ରୀରୁ କଳା, ଗୋରା, ହାଲ୍କା ଭଳି ଶବ୍ଦ ହଟାଇ ଦେବ। ସୂଚନାଯୋଗ୍ୟ, ଏହାପୂର୍ବରୁ ମଧ୍ୟ ୟୁନିଲିଭରର ଲୋକପ୍ରିୟ ବ୍ରାଣ୍ଡ ଫେୟାର ଆଣ୍ଡ ଲଭଲି ତା’ର ପ୍ରଡକ୍ଟରୁ ଫେୟାର ଶବ୍ଦ ହଟାଇବାକୁ ଘୋଷଣା କରିଥିଲା। ଏପରି ଏକ ଆଲୋଚନା ପରେ ଏବେ ସ୍କିନ କେୟାର ସମ୍ବନ୍ଧିତ ପ୍ରଶାଧନ ସାମଗ୍ରୀ ପ୍ରସ୍ତୁତ କରୁଥିବା କମ୍ପାନୀ ଗୁଡିକ ଉପରେ ଚାପ ରହିଥିବା କୁହାଯାଉଛି। ଆହୁରି ମଧ୍ୟ ଆଲୋଚନା ହେଉଛି କି ଆମେରିକାରେ କଳାଗୋରା ଭେଦଭାବକୁ ନେଇ ଆରମ୍ଭ ହୋଇଥିବା ଆନ୍ଦୋଳନ ଏବେ କିଛି ଦେଶକୁ ବ୍ୟାପି ସାରିଛି। ଏହାକୁ ନେଇ ଲରିୟଲ କମ୍ପାନୀ କହିଛି ଚର୍ମର ରଙ୍ଗ ବଦଳିବା ଅର୍ଥାତ୍ ଗୋରା ହେବାକୁ ନେଇ ଯେଉଁ ଆପତ୍ତି ହେଉଛି ତାକୁ ସେ ସ୍ବୀକାର କରି ଏବେ ସେ ତା’ର ପ୍ରଡକ୍ଟରୁ ‘ହ୍ବାଇଟନିଂ’, ‘ଫେୟାର’ ଭଳି ଶବ୍ଦ ହଟାଇ ଦେବ।