ଚିତ୍ରକୋଣ୍ଡା,୧୫।୧୦: ଆଦିବାସୀ ଅଧ୍ୟୁଷିତ ମାଲକାନଗିରି ଜିଲା ଚିତ୍ରକୋଣ୍ଡା ବ୍ଲକ ଅଧୀନ ୧୮ ପଞ୍ଚାୟତ ମଧ୍ୟରୁ ହାତଗଣତି ଦୁଇ ତିନୋଟି ପଞ୍ଚାୟତକୁ ଛାଡିଦେଲେ ଅନ୍ୟ ସମସ୍ତ ପଞ୍ଚାୟତ ସମେତ ଅନେକ ଗ୍ରାମ ଦୂରଦୂରାନ୍ତ ପାଣିଘେର, ବିଚ୍ଛିନ୍ନ ପାହାଡ଼ ପର୍ବତ, ଦୁର୍ଗମ ଉପାନ୍ତ ଇଲାକାରେ ଅବସ୍ଥିତ। ଉକ୍ତ ଅଞ୍ଚଳରେ ମାଓବାଦୀ କାର୍ଯ୍ୟକଳାପ ସକ୍ରିୟ ଥିବାରୁ ପ୍ରଶାସନିକ ଅଧିକାରୀଙ୍କ ପରିଦର୍ଶନରେ ବ୍ୟତିକ୍ରମ ଦେଖାଦେଇଛି। ଏଭଳି ସ୍ଥିତିରେ ବର୍ତ୍ତମାନର କାର୍ଯ୍ୟରତ ଗୋଷ୍ଠୀ ଉନ୍ନୟନ ଅଧିକାରୀ(ବିଡିଓ) ରଘୁନାଥ ମୁଣ୍ଡାରୀ ଦୁର୍ଗମ ଉପାନ୍ତ ଅଞ୍ଚଳରେ ପହଞ୍ଚି ଲୋକଙ୍କ ସମସ୍ୟା ପଚାରି ବୁଝିଛନ୍ତି।
କାର୍ଯ୍ୟରେ ଯୋଗଦେବାର ୪ ମାସ ମଧ୍ୟରେ ପ୍ରାୟତଃ ୧୮ଟି ପଞ୍ଚାୟତକୁ ପରିଦର୍ଶନ କରି ଲୋକଙ୍କ ମୌଳିକ ଆବଶ୍ୟକତାକୁ ପ୍ରାଧାନ୍ୟ ଦେବା ନେଇ ସେ ଅଣ୍ଟା ଭିଡ଼ିଛନ୍ତି। ଶୁକ୍ରବାର ସମ୍ପୃକ୍ତ ବିଡିଓ ପାପୁଲୁରୁ ପଞ୍ଚାୟତ ଅନ୍ତର୍ଗତ ବୁରୁଡାମ୍ମା, ନାଗଲୁରୁ, କରସେଲବନ୍ଧ, କତାଗୁଡା ସମେତ ୫ଟି ଆଦିବାସୀ ଅଧ୍ୟୁଷିତ ଅଞ୍ଚଳ ଗସ୍ତ କରି ଲୋକଙ୍କ ଆବଶ୍ୟକତା ଯଥା ରାସ୍ତା, ପାନୀୟ ଜଳ, ବିଦ୍ୟୁତ୍, ଅଙ୍ଗନୱାଡ଼ି କେନ୍ଦ୍ରର କାର୍ଯ୍ୟ ସହ ସରକାରୀ ସ୍ତରରେ ଥିବା ମୌଳିକ ସୁବିଧା ସୁଯୋଗ ସମ୍ପର୍କରେ ଲୋକଙ୍କ ସହ ଆଲୋଚନା କରିଥିବା ସାମ୍ନାକୁ ଆସିଛି। ସବୁଠାରୁ ରୋଚକ କଥା ହେଲା, ଜଣେ ପ୍ରଶାସନିକ ଅଧିକାରୀ ଲୋକଙ୍କ ଅଭାବ ଅସୁବିଧା ସମ୍ପର୍କରେ ଅବଗତ ହେବା ପାଇଁ ପାହାଡ଼ ପର୍ବତଘେରା ଦୁର୍ଗମ ପଥରେ ୧୭ କି.ମି. ଚାଲିକି ଯିବା ବର୍ତ୍ତମାନ ଚର୍ଚ୍ଚାର ବିଷୟ ହୋଇଛି।
ବିଡିଓଙ୍କ ଗସ୍ତ ବେଳେ ସହାୟକ ଯନ୍ତ୍ରୀ ସୂର୍ଯ୍ୟ ପ୍ରକାଶ ବେହେରା, କନିଷ୍ଠ ଯନ୍ତ୍ରୀ ବିବେକାନନ୍ଦ ଜାନି, ବ୍ଲକ ଉପାଧ୍ୟକ୍ଷ ପଦ୍ମନାଭ ଦାନୀ, ପାପୁଲୁରୁ ସରପଞ୍ଚ ନରସିଂହ ନାୟକଙ୍କ ସହ ଗ୍ରାମ ରୋଜଗାର ସେବକ ଭକ୍ତରାମ ମାଣ୍ଡି ମଧ୍ୟ ଯାଇଥିଲେ। ବିଡିଓଙ୍କ ଏଭଳି ଗସ୍ତକୁ ସ୍ଥାନୀୟ ଜନସାଧାରଣ ପ୍ରଶଂସା କରିଛନ୍ତି।