ନୂଆଦିଲ୍ଲୀ,୧୫ା୨(ପି.ଟି.): ଅଲିମ୍ପିକ୍ସ ପଦକ ବିଜେତା ରେସ୍ଲର ସାକ୍ଷୀ ମଲିକ୍ ଓ ବଜରଙ୍ଗ ପୁନିଆ ପୁନର୍ବାର ଆନ୍ଦୋଳନକୁ ଓହ୍ଲାଇବାକୁ ଧମକ ଦେଇଛନ୍ତି। ମଙ୍ଗଳବାର ୟୁନାଇଟେଡ ଓ୍ବାଲର୍ଡ ରେସ୍ଲିଂ(ୟୁଡବ୍ଲ୍ୟୁଡବ୍ଲ୍ୟୁ) ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ଉପରୁ ନିଲମ୍ବନ ଆଦେଶକୁ ହଟାଇ ଦେଇଥିଲା। ତେବେ ଡବ୍ଲ୍ୟୁଏଫ୍ଆଇ ସଭାପତି ସଞ୍ଜୟ ସିଂ ଅନୈତିକ ଉପାୟ ଅବଲମ୍ବନ କରି ଏହି ଆଦେଶ ହଟାଇଛନ୍ତି ବୋଲି ଉଭୟ ଅଭିଯୋଗ କରିଛନ୍ତି। ସଞ୍ଜୟ ସିଂ ଅନୈତିକ ଉପାୟରେ ବାସନ୍ଦାଦେଶ ଉଠାଇଥିବା ବେଳେ ଏହା ବିରୋଧରେ ଆଉ ଥରେ ଧାରଣାକୁ ଓହ୍ଲାଇବୁ ବୋଲି କହିଛନ୍ତି ସାକ୍ଷୀ ମଲିକ୍ ଓ ବଜରଙ୍ଗ ପୁନିଆ। ବିଦାୟୀ ସଭାପତି ବ୍ରିଜ୍ଭୂଷଣ ଶରଣ ସିଂଙ୍କ ବିିରୋଧରେ ଯୌନ ଶୋଷଣ ଅଭିଯୋଗ ଆଣି ବିକ୍ଷୋଭ ପ୍ରଦର୍ଶନ କରିଥିବା ୩ କୁସ୍ତିଯୋଦ୍ଧା ବଜରଙ୍ଗ ପୁନିଆ, ଭିନେଶ ଫୋଗଟ ଓ ସାକ୍ଷୀ ମଲିକଙ୍କ ପ୍ରତି କୌଣସି ବାଛବିଚାର ନ କରିବା ଲାଗି ଜାତୀୟ ମହାସଂଘଠାରୁ ଗ୍ୟାରେଣ୍ଟି ଦାବି କରିଥିଲା ୟୁଡବ୍ଲ୍ୟୁଡବ୍ଲ୍ୟୁ। ଠିକ୍ ସମୟରେ ନିର୍ବାଚନ କରାଇ ନ ଥିବାରୁ ୟୁଡବ୍ଲ୍ୟୁଡବ୍ଲ୍ୟୁ ଗତ ଅଗଷ୍ଟ ୨୩ରେ ଡବ୍ଲ୍ୟୁଏଫ୍ଆଇକୁ ସସ୍ପେଣ୍ଡ କରିଥିଲା।
ଏ ସମ୍ପର୍କରେ କ୍ରୀଡ଼ାମନ୍ତ୍ରୀ ଅନୁରାଗ ଠାକୁର କିଛି ପ୍ରତିକ୍ରିୟା ପ୍ରକାଶ କରିବାକୁ ମନା କରି ଦେଇଛନ୍ତି। ଅନ୍ୟପକ୍ଷରେ ସାକ୍ଷୀ ମଲିକ୍ କହିଛନ୍ତି , ମୁଁ ରେସ୍ଲିଂରୁ ଅବସର ନେଇ ସାରିଛି ମାତ୍ର ବ୍ରିଜ୍ଭୂଷଣ ଓ ତାଙ୍କ ସମର୍ଥକଙ୍କ ଉପସ୍ଥିତି ମୋ ପାଇଁ ଗ୍ରହଣୀୟ ନୁହେଁ। ପୂର୍ବରୁ ଜାରି ରହିଥିବା ଆମର ଆନ୍ଦୋଳନ ସାମୟିକ ବନ୍ଦ ରହିଛି। ଆବଶ୍ୟକ ପଡିଲେ ୨-୪ ଦିନ ମଧ୍ୟରେ ଏହାକୁ ପୁନର୍ବାର ଆରମ୍ଭ କରିବୁ ବୋଲି ସେ କହିଛନ୍ତି। ବ୍ରିଜ୍ଭୂଷଣ ଓ ତାଙ୍କ ସମର୍ଥକଙ୍କୁ ରେସ୍ଲିଂ ମହାସଂଘରୁ ନ ହଟାଇବା ଯାଏ ଏହି ଲଢ଼େଇ ଜାରି ରହିବ ବୋଲି କହିଥିଲେ ସାକ୍ଷୀ। ଉଭୟ ବଜରଙ୍ଗ ଓ ସାକ୍ଷୀ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ଭିଡିଓ ଜରିଆରେ ଏହି ବାର୍ତ୍ତା ଦେଇଥିଲେ। ବଜରଙ୍ଗ ପୁନିଆ କହିଥିଲେ, ନିର୍ବାଚନରେ ବ୍ରିଜଭୂଷଣ କିମ୍ବା ତାଙ୍କ ପରିବାରରୁ କେହି ଅଂଶଗ୍ରହଣ କରିବେ ନାହିଁ ବୋଲି ପ୍ରତିଶ୍ରୁତ ଦେଇଥିଲେ। ତେବେ ୨-୩ ଦିନ ପୂର୍ବରୁ ବ୍ରିଜ୍ଭୂଷଣଙ୍କ ପୁଅ ଉତ୍ତରପ୍ରଦେଶ ରେସ୍ଲିଂ ସଂଘର ସଭାପତି ନିର୍ବାଚିତ ହୋଇଛନ୍ତି।