ଲଣ୍ଡନ/ନୂଆଦିଲ୍ଲୀ,୨୦।୫: ପୃଥିବୀରେ କରୋନା ସଂକ୍ରମଣ ଯୋଗୁ ସ୍ଥିତି ସଙ୍କଟ ଜନକ ହେବାରେ ଲାଗିଛି। ଏପରିସ୍ଥଳେ ପୃଥିବୀ ଉପରେ ପୁଣି ନୂଆ ବିପଦ ମାଡ଼ି ଆସୁଛି। ଆଣ୍ଟାର୍କଟିକାରେ ଏକ ବିରାଟକାୟ ହିମଖଣ୍ଡ ଭାଙ୍ଗିଯାଇଛି। ଏହାର ଲମ୍ବ ୧୭୫ କିଲୋମିଟର ହୋଇଥିବାବେଳେ ପ୍ରସ୍ଥ ୨୫ କିଲୋମିଟର ରହିଛି। ଏହାର କ୍ଷେତ୍ରଫଳ ୪,୩୨୦ ବର୍ଗ କିଲୋମିଟର ବୋଲି ପରିବେଶ ବିଜ୍ଞାନୀ ସୂଚନା ଦେଇଛନ୍ତି। ଜଳବାୟୁ ପରିବର୍ତ୍ତନ ଯୋଗୁ ନୁହେଁ ପ୍ରାକୃତିକ କାରଣରୁ ଏହା ଭାଙ୍ଗିଥିବା ବ୍ରିଟେନ୍ର ଆଣ୍ଟାର୍କଟିକା ସର୍ଭେ ଦଳର ବୈଜ୍ଞାନିକ ଲୋରା ଗେରିଶ୍ ଟୁଇଟ୍ କରି ସୂଚନା ଦେଇଛନ୍ତି। ଏହାର ନାମକରଣ ଏ-୭୬ ଭାବେ କରାଯାଇଛି। ଆଣ୍ଟାର୍କଟିକାର ପଶ୍ଚିମ ଭାଗରେ ଥିବା ରୋନ୍ନେ ଆଇସ୍ ସେଲ୍ଫ୍ରୁ ଏହା ଭାଙ୍ଗିଥିବା ୟୁରୋପିଆନ୍ ମହାକାଶ ଏଜେନ୍ସିର ସାଟେଲାଇଟ୍ ଫଟୋ ଚିତ୍ରରୁ ଜଣାପଡ଼ିଛି। ଏହି ହିମଖଣ୍ଡ ଭାଙ୍ଗିବା ନେଇ ପୃଥିବୀରେ ଆତଙ୍କ ଖେଳି ଯାଇଛି। ଏହା ତରଳିଲେ ସମୁଦ୍ର ଜଳସ୍ତର ୨୦୦ଫୁଟ ବୃଦ୍ଧି ପାଇବ। ଫଳରେ ଉପକୂଳ ଅଞ୍ଚଳରେ ଥିବା ବହୁ ସହର ପାଣିରେ ବୁଡ଼ିଯିବାର ଆଶଙ୍କା ସୃଷ୍ଟି ହୋଇଛି। ପ୍ରତ୍ୟକ୍ଷ ଭାବେ ସମୁଦ୍ର ଜଳସ୍ତର ଉପରେ ଏହାର ପ୍ରଭାବ ନ ପଡ଼ିଲେ ବି ଅପ୍ରତ୍ୟକ୍ଷ ଭାବେ ଜଳସ୍ତର ପ୍ରଭାବିତ ହେବ ବୋଲି ଲୋରା ଗେରିଶ୍ କହିଛନ୍ତି। ନେଚର ପତ୍ରିକା ରିପୋର୍ଟ ଅନୁସାରେ ୧୮୮୦ ମସିହାଠାରୁ ଗତ ୧୪୧ ବର୍ଷ ମଧ୍ୟରେ ସମୁଦ୍ର ଜଳସ୍ତର ୯ ଇଞ୍ଚ ବଢ଼ିଛି। ଜଳସ୍ତରର ଏକ ତୃତୀୟାଂଶ ପାଣି ଆଣ୍ଟାର୍କଟିକାର ହିମଖଣ୍ଡ ତରଳିବାରୁ ସୃଷ୍ଟି ହୋଇଥିବା ଏଥିରେ ଉଲ୍ଲେଖ କରାଯାଇଛି।
