ଭୁବନେଶ୍ୱର,୧୭।୪(ବ୍ୟୁରୋ): ରାଜଧାନୀରେ ଲୁଟେରାଙ୍କ ଆତଙ୍କ ବଢ଼ିଯାଇଥିବାବେଳେ ମହିଳାଙ୍କ ସୁରକ୍ଷା ପାଇଁ ବନ୍ଦ ହୋଇଯାଇଥିବା ପିଙ୍କ୍ ଅଟୋ ସେବା ପୁଣି ଆରମ୍ଭ ହେବାକୁ ଯାଉଛି। ଭୁବନେଶ୍ୱର ଏବଂ କଟକରେ ଆରମ୍ଭ ହୋଇଥିବା ଏହି ସେବା ପୁନଃ କାର୍ଯ୍ୟକାରୀ କରିବାକୁ ଯୋଜନା କରାଯାଉଛି। ଏଥିପାଇଁ ପରିବହନ ବିଭାଗର ସଚିବ ମଧୁସୂଦନ ପାଢୀ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀଙ୍କୁ ଚିଠି ଲେଖି ଏହି ସେବା ପୁନଃ ଚାଲୁ କରିବାକୁ କହିଛନ୍ତି।
ସୂଚନାଯୋଗ୍ୟ, ବିଶେଷ କରି ମହିଳାମାନେ ପୁରୁଷଙ୍କ ସହ ଗୋଟିଏ ଅଟୋରେ ବସି ଯାତ୍ରା କରିବାବେଳେ ନାନା ଅସୁବିଧାର ସମ୍ମୁଖୀନ ହେଉଥିଲେ। ଏପରିକି ଅଟୋ ଚାଳକ ଓ ପୁରୁଷ ଯାତ୍ରୀଙ୍କ ସହ ଯାଉଥିବାବେଳେ ମହିଳା, ଛାତ୍ରୀମାନେ ଲୁଟ, ଅସଦାଚରଣ ଶିକାର ହେଉଥିଲେ। ଏହାକୁ ଦୃଷ୍ଟିରେ ରଖି ୨୦୧୪ ଜୁନ ୨୭ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୁବନେଶ୍ୱରରେ ପିଙ୍କ୍ ଅଟୋ ସେବା ଆରମ୍ଭ କରିଥିଲେ। ପ୍ରଥମ ପର୍ଯ୍ୟାୟରେ ୨୦୦, ଦ୍ୱିତୀୟରେ ୧୦୦ ଏବଂ ତୃତୀୟ ପର୍ଯ୍ୟାୟରେ ୫୦ଟି ଅଟୋ ଚଳାଚଳ କରିଥିଲା। ସହରରେ ୪୫୦ରୁ ଅଧିକ ପିଙ୍କ ଅଟୋ ଚଳାଚଳ କରିବାକୁ କମିଶନରେଟ ପୋଲିସ ପକ୍ଷରୁ ଯୋଜନା କରାଯାଇଥିଲା। ଏହି ଅଟୋର ଚାଳକଙ୍କୁ କମିଶନରେଟ ପୋଲିସ ପକ୍ଷରୁ ସ୍ବତନ୍ତ୍ର ପରିଚୟ ପତ୍ର ଦେବା ସହ ଚାଳକଙ୍କ ଲାଇସେନ୍ସ, ମାନସିକ ଅବସ୍ଥା, ପରିବାରର ଇତିହାସ ଓ ଆପରାଧିକ ତଥ୍ୟକୁ ତନଖି କରାଯାଇ ସେମାନଙ୍କୁ ସ୍ବତନ୍ତ୍ର ତାଲିମ ଦିଆଯାଇଥିଲା। ରାଜଧାନୀର ବରମୁଣ୍ଡା ଓ ମାଷ୍ଚର କ୍ୟାଣ୍ଟିନ୍ ଓ କିଟ୍ ଛକରେ ଏହାର ଟିକେଟ୍ କାଉଣ୍ଟର ଖୋଲାଯାଇଥିଲା। ବୁକିଂ କାଉଣ୍ଟରରେ ଦୀର୍ଘ ସମୟ ଧରି ଛିଡ଼ାହୋଇ ଫର୍ମ ପୂରଣ କରିବା ପାଇଁ ପଡୁଥିବାରୁ ଏହାକୁ ଯାତ୍ରୀମାନେ ପସନ୍ଦ କରି ନ ଥିଲେ। ଫଳରେ ଅଟୋ ଚାଳକଙ୍କୁ ଯାତ୍ରୀ ମିଳିବା କଷ୍ଟ ହୋଇପଡ଼ିଥିଲା। ପରେ୨୦୧୮ରୁ ଏହି ସେବା ବନ୍ଦ ହୋଇଯାଇଥିଲା।