ମାଧପୁର,୧୮ା୯(ଡି.ଏନ୍.ଏ.): ଜୀବନ ଜୀବିକା ଲାଗିଛି ବାଜିରେ। ଦୁଇ ଓଳା ଦୁଇମୁଠା ଦାନା ଯୋଗାଡ଼ ପାଇଁ ଅନୁଗୋଳ ଜିଲା ଆଠମଲ୍ଲିକ ଅଞ୍ଚଳରୁ ପ୍ରବାସୀମାନେ ପୁଣି ଭିଟାମାଟି ଛାଡ଼ି କର୍ମଭୂମି ମୁହାଁ ହୋଇଛନ୍ତି। କାରଣ ଲକ୍ଡାଉନ ପରେ ରୋଜଗାର ହରାଇ ନିଜ ନିଜ ଘରକୁ ଫେରିଥିବା ପ୍ରବାସୀ ପରିବାର ସହିତ ଦୁର୍ବିସହ ଜୀବନ କାଟୁଛନ୍ତି। ରାଜ୍ୟ ସରକାର କର୍ମ ସଂସ୍ଥାନ ଯୋଗାଇବାରେ ବିଫଳ ହେବାରୁ ସେମାନେ ବାଧ୍ୟ ହୋଇ ଘରୁ ଗୋଡ଼ କାଢ଼ିଛନ୍ତି। କୌଣସି ଦୁର୍ଘଟଣା ଆଉ ଅଘଟଣକୁ ଖାତିର ନାହିଁ। କେବଳ ପେଟ ପୋଷିବା ଚିନ୍ତା ବାରମ୍ବାର ବସ୍ ଦୁର୍ଘଟଣା ଖବରକୁ ଭୁଲି ପୁଣି ତାମିଲନାଡୁ,ହାଇଦ୍ରାବାଦ, ସୁରଟ, ଗୁଜୁରାଟ ଏବଂ ମହାରାଷ୍ଟ୍ର ଭଳି ଅନ୍ୟ ରାଜ୍ୟକୁ ଫେରିବା ଆରମ୍ଭ କରିଛନ୍ତି। ସେମାନଙ୍କୁ ନେବାପାଇଁ ପ୍ରତି ଗାଁରେ ବସ୍ ଲାଗୁଥିବାର ଦେଖିବାକୁ ମିଳୁଛି। ବାରମ୍ବାର ବସ୍ ଦୁର୍ଘଟଣା ହେତୁ ସରକାର କିଛି ବନ୍ଦୋବସ୍ତ କରିବେ ବୋଲି ଆଶା କରାଯାଉଥିଲା। ଆଉ ଶ୍ରମିକ ବା ପ୍ରବାସୀମାନେ ମଧ୍ୟ ବସ୍ରେ ଯିବାକୁ ଅମଙ୍ଗ ହେବେ ବୋଲି ଆଶା କରାଯାଉଥିଲା। ହେଲେ ସ୍ଥିତି ଯେମିତିକୁ ସେମିତି। ସରକାର ଗୋଟିଏ ପଟେ କର୍ମସଂସ୍ଥାନ ଯୋଗାଇବାରେ ବିଫଳ ହେଇଥିବା ବେଳେ ଅନ୍ୟ ପଟେ ପ୍ରବାସୀମାନେ ବିପଦସଙ୍କୁଳ ଭାବରେ ବସ୍ରେ ଏତେ ଏତେ ବାଟ ଯାଉଥିବାର ଦେଖିବାକୁ ମିଳୁଛି। ପ୍ରତିଦିନ ଆଠମଲ୍ଲିକ ଅଞ୍ଚଳକୁ ଶତାଧିକ ପ୍ରବାସୀଙ୍କୁ ନେବା ପାଇଁ ବସ୍ ଅସୁବିଧା ବେଳେ ମାଲିକମାନଙ୍କ ସ୍ଥାନୀୟ ଏଜେଣ୍ଟ ସେମାନଙ୍କ ସହିତ ଯୋଗାଯୋଗ କରି ବାହାର ରାଜ୍ୟକୁ ନେବାପାଇଁ ରାଜି କରାଉଥିବା ଦେଖିବାକୁ ମିଳୁଛି। ଏହା ସହିତ ହାତ ଖର୍ଚ୍ଚ ଏବଂ ଅଗ୍ରୀମ ଟଙ୍କା ମଧ୍ୟ ଦେଉଥିବା ଜଣାପଡ଼ିଛି। ଲକ୍ଡାଉନ ସମୟରେ ସେମାନଙ୍କୁ ଫେରାଇ ଆଣିବାକୁ ପ୍ରଶାସନ ଯେତିକି ତତ୍ପର ଦେଖାଉଥିଲା ବର୍ତ୍ତମାନ ଆଉ ତାହା ନାହିଁ। ଏଠି ନିଯୁକ୍ତିର କୌଣସି ବ୍ୟବସ୍ଥା ନାହିଁ ଏତେଦିନ ରହିଲା ପରେ ଟଙ୍କାଟିଏ ରୋଜଗାର ହେଇପାରିଲା ନାହିଁ। ତେଣୁ ବାଧ୍ୟ ହୋଇ ପୁଣି କର୍ମସ୍ଥଳୀକୁ ଫେରିବାକୁ ପଡୁଛି ବୋଲି ପ୍ରବାସୀମାନେ କହିଛନ୍ତି।