ମସ୍କୋ, ୧୩।୪ : ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧକୁ ୪୮ ଦିନ ବିତିଛି। କିନ୍ତୁ ଏତେ ଦିନ ପରେ ମଧ୍ୟ ରୁଷିଆର ସେନା ପଛଘୁଞ୍ଚା ଦେଇ ନାହାନ୍ତି କିମ୍ବା ୟୁକ୍ରେନ୍ ରାଜଧାନୀ କ୍ୱିଭ୍କୁ ଦଖଲ କରିବାରେ ସକ୍ଷମ ହୋଇ ନାହାନ୍ତ। ରୁଷିଆ ବାରମ୍ବାର ଆଣବିକ ଆକ୍ରମଣର ଧମକ ମଧ୍ୟ ଦେଇଛି।
ରାଷ୍ଟ୍ରପ୍ରତି ଭ୍ଲାଡ଼ିମିର ପୁଟିନ ଅନେକ ଥର କହିଛନ୍ତି ଯେ ଯଦି ଆମେରିକା ଏବଂ ପାଶ୍ଚାତ୍ୟ ଦେଶ ୟୁକ୍ରେନକୁ ସାହାଯ୍ୟ ଜାରି ରଖନ୍ତି ତେବେ ଏହାର ପରିଣାମ ଭୟଙ୍କର ହୋଇପାରେ। ବର୍ତ୍ତମାନ ପୁଟିନଙ୍କୁ ବେଲାରୁଷର ଏକଛତ୍ରବାଦୀ ଶାସକ ଆଲେକ୍ସଜାଣ୍ଡାର୍ ଲୁକାଶେଙ୍କୋଙ୍କ ସହିତ ଏକ ଫଟୋରେ ନ୍ୟୁକ୍ଲିୟର ବ୍ରିଫକେସ ସହିତ ଦେଖିବାକୁ ମିଳୁଛି। ନ୍ୟୁକ୍ଲିୟର ବ୍ରିଫକେସ ସହିତ ପୁଟିନଙ୍କ ଫଟୋ ପୁଣି ଥରେ ଦେଖାଯିବାରୁ ଏବେ ଆଣବିକ ଆକ୍ରମଣ ସହିତ ତୃତୀୟ ବିଶ୍ୱଯୁଦ୍ଧ ଆଶଙ୍କା ବଢ଼ାଇ ଦେଇଛି।
ଆକାର ଅନୁସାରେ ରୁଷ ହେଉଛି ବିଶ୍ୱର ବୃହତ୍ତମ ଦେଶ ଏବଂ ଆଣବିକ ଅସ୍ତ୍ରଶସ୍ତ୍ର କ୍ଷେତ୍ରରେ ରୁଷର ମଧ୍ୟ ବିଶ୍ୱବ୍ୟାପୀ ମାନ୍ୟତା ରହିଛି। ଏଥି ସହିତ, ୟୁକ୍ରେନ ଆକାର ଅନୁଯାୟୀ ବିଶ୍ୱର ୪୫ ତମ ଦେଶ । ରୁଷିଆର ସୈନିକମାନେ ଏକ ଛୋଟ ଦେଶକୁ କାବୁ କରିବାକୁ ଦୀର୍ଘ ସମୟ ନେଉଛନ୍ତି, ଯାହା ପୁଟିନଙ୍କ ଚିନ୍ତାକୁ ବଢ଼ାଉଛି।
ତେବେ ଆମେରିକା ଏବଂ ପାଶ୍ଚାତ୍ୟ ଦେଶମାନଙ୍କ ସାହାଯ୍ୟରେ ୟୁକ୍ରେନ ରୁଷିଆକୁ କଡ଼ା ଟକ୍କର ଦେଉଛି। ଏହି ଦେଶଗୁଡିକରୁ ଅତ୍ୟାଧୁନିକ ଅସ୍ତ୍ରଶସ୍ତ୍ରର ଆର୍ଥିକ ସହାୟତା ତଥା ସାମଗ୍ରୀ ଯୋଗାଣ ହେତୁ ୟୁକ୍ରେନ ସୈନ୍ୟମାନେ ରୁଷିଆର ବହୁକ୍ଷତି ଘଟାଉଛନ୍ତି। ଏହା ପୁଟିନଙ୍କ ପାଇଁ ଚିନ୍ତା ଏବଂ କ୍ରୋଧର କାରଣ ପାଲଟିଛି।
ଡେଲିମେଲ ଅନୁଯାୟୀ ଗତ ସପ୍ତାହରେ ବେଲାରୁଷରେ ପହଞ୍ଚିଥିବା ପୁଟିନଙ୍କୁ ନ୍ୟୁକ୍ଲିୟରବ୍ରଫକେସ ଦେଖାଯାଇଥିଲା।
ଏହି ବ୍ରିଫକେସରେ ଆଣବିକ ଆକ୍ରମଣ ଏବଂ ଆଲର୍ଟ ଆଲାର୍ମ ସହିତ ସମସ୍ତ ବୈଶିଷ୍ଟ୍ୟ ରହିିଥାଏ। ବେଲାରୁଷର ଏକଛତ୍ରବାଦୀ ଶାସକ ଲୁକାଶେଙ୍କୋଙ୍କ ସହ ପୁଟିନଙ୍କ ଫଟୋ ସୋସିଆଲ ମିଡିଆରେ ଦିନକୁ ଦିନ ଭାଇରାଲ ହେବାରେ ଲାଗିଛି। ଏହି ଫଟୋଗୁଡ଼ିକରେ ପୁଟିନଙ୍କ ସହ ଠିଆ ହୋଇଥିବା ବ୍ୟକ୍ତି ତାଙ୍କ ହାତରେ ଏକ କଳା ବ୍ରିଫକେସ ଧରିଛନ୍ତି। ଯାହାକୁ ନ୍ୟୁକ୍ଲିୟର ବ୍ରିଫକେସ ବୋଲି କୁହାଯାଉଛି।
ଏହି ସ୍ବତନ୍ତ୍ର ବ୍ରିଫକେସ ରୁଷିଆର ରାଷ୍ଟ୍ରପତିଙ୍କ ପାଖରେ ଅଛି। ଏଥିରେ ଆଣବିକ କୋଡ୍ ରହିଥାଏ। କେବଳ ପୁଟିନ ଏହାକୁ ବ୍ୟବହାର କରିପାରିବେ। ରୁଷିଆର ବାସିନ୍ଦା ତଥା ଅସ୍ତ୍ରଶସ୍ତ୍ର ବିଶେଷଜ୍ଞ ଇଗୋର ସେଜେନ ବିସିସିଆଇକୁ କହିଛନ୍ତି ଯେ ଏହି ବ୍ରିଫକେସ ସର୍ବଦା ରାଷ୍ଟ୍ରପତିଙ୍କ ପାଖରେ ଥାଏ।
ଏପରିକି ଯେତେବେଳେ ସେ ଶୋଇଥାନ୍ତି, ତାଙ୍କଠାରୁ ୧୦ରୁ ୨୦ ମିଟର ବ୍ୟାସାର୍ଦ୍ଧରେ ଏହା ରହିଥାଏ। ରୁଷିଆ ଉପରେ ଆକ୍ରମଣର ଆଶଙ୍କା ହେଲେ ବ୍ରିଫକେସ ଆଲାର୍ମ ସକ୍ରିୟ ହୋଇ ଫ୍ଲାଶ ଲାଇଟ ଜଳିଥାଏ। ଯଦିଓ ଏହିପରି ଦୁଇଟି ବ୍ରିଫକେସ ପ୍ରଧାନମନ୍ତ୍ରୀ ଏବଂ ପ୍ରତିରକ୍ଷା ମନ୍ତ୍ରୀଙ୍କ ପାଖରେ ଅଛି। ମାତ୍ର ଆଣବିକ ଆକ୍ରମଣ ପାଇଁ ନିର୍ଦ୍ଦେଶ କେବଳ ରାଷ୍ଟ୍ରପତି ଦେଇପାରିବେ।