ପୁଣି ଆତଙ୍କ ଘନେଇଲା: ୩୮ ଦେଶରେ ଏକ୍ସବିବି.୧.୫ ଭାରିଆଣ୍ଟ…

ଜେନେଭା,୧୪।୧ : କରୋନା ମହାମାରୀର ଓମିକ୍ରନ ଭାରିଆଣ୍ଟର ସବ-ଭାରିଆଣ୍ଟ ଏକ୍ସବିବି.୧.୫ କୁ ଏପର୍ଯ୍ୟନ୍ତ ସର୍ବାଧିକ ଟ୍ରାନ୍ସମିସିବଲ ସବ-ଭାରିଆଣ୍ଟ ଭାବରେ ବିବେଚନା କରାଯାଉଛି। ଏକ ରିପୋର୍ଟରେ କୁହାଯାଇଛି ଯେ କିଛି ସପ୍ତାହ ମଧ୍ୟରେ ଏକ୍ସବିବି.୧.୫ ୟୁରୋପରେ ଚିନ୍ତାର କାରଣ ହେବ।

ସେଲ ପତ୍ରିକାରେ ଗତ ମାସରେ ପ୍ରକାଶିତ ଏକ ଅଧ୍ୟୟନରୁ ଜଣାପଡିଛି ଯେ ବିଏ.୨ ସବ୍‌-ଭାରିଆଣ୍ଟ ଅପେକ୍ଷା ଏକ୍ସବିବି.୧.୫ରେ ବିଦ୍ୟମାନ ଆଣ୍ଟିବଡି ଦ୍ୱାରା ପ୍ରତିହତ ହେବାର ସମ୍ଭାବନା ୬୩ ଗୁଣା କମ ଅଟେ। ଏହି ସବ୍‌-ଭାରିଆଣ୍ଟ ବର୍ତ୍ତମାନ ପର୍ଯ୍ୟନ୍ତ ୩୮ ଟି ଦେଶକୁ ବ୍ୟାପିଛି।

ଆମେରିକାରେ ମିଳିଥିବା କରୋନାର ନୂତନ ଭାରିଆଣ୍ଟର ନାମ ଏକ୍ସବିବି.୧.୫ ରଖାଯାଇଛି। ଏହା କରୋନାର ଦୁଇଟି ପ୍ରକାରର ମିଳନରୁ ପ୍ରସ୍ତୁତ। ଯେତେବେଳେ ବିଜେ ୧ ଏବଂ ବିଏମ୧.୧.୧ ନାମକ ଦୁଇଟି କରୋନା ଭାରିଆଣ୍ଟ ଏକତ୍ର ମିଳିତ ହୋଇ ଏହା ସୃଷ୍ଟି ହୋଇଛି। ଯେତେବେଳେ ଉଭୟଙ୍କ ଜେନେଟିକ ସାମଗ୍ରୀ ମିଳିତ ହେଲା ଏହା ଏକ୍ସବିବି ସୃଷ୍ଟି କରିଥିଲା। ଏହା ପରେ ଏକ୍ସବିବି ଭାରିଆଣ୍ଟ ରୂପ ବଦଳାଇ ଏକ୍ସବିବି ୧ ହେଲା। ଏହା ପରେ ଜି୨୫୦୨ଭି ସହିତ ପରିବର୍ତ୍ତନ ହୋଇ, ଏହା ଏକ୍ସବିବି.୧.୫ ଭାରିଆଣ୍ଟରେ ପରିଣତ ହୋଇଥିଲା।

ସିଡିସିର ଭାରିଆଣ୍ଟ ଟ୍ରାକର ଅନୁଯାୟୀ, ଏକ୍ସବିବି.୧.୫ ସବ-ଭାରିଆଣ୍ଟ ପ୍ରଥମେ ଅକ୍ଟୋବରରେ ଆମେରିକାରେ ଚିହ୍ନଟ ହୋଇଥିଲା। ବିଶ୍ୱ ସ୍ବାସ୍ଥ୍ୟ ସଂଗଠନ ଏକ ଦ୍ରୁତ ବିପଦ ମୂଲ୍ୟାଙ୍କନରେ କହିଛି ଯେ ୩୮ଟି ଦେଶ ଏକ୍ସବିବି.୧.୫ ମାମଲା ରିପୋର୍ଟ କରିଛନ୍ତି। ସେଥିମଧ୍ୟରୁ ୮୨ ପ୍ରତିଶତ ଆମେରିକାରେ, ୮ ପ୍ରତିଶତ ବ୍ରିଟେନରେ ଏବଂ ୨ ପ୍ରତିଶତ ଡେନମାର୍କରେ। ୟୁରୋପୀୟ ରୋଗ ନିରାକରଣ ଏବଂ ନିୟନ୍ତ୍ରଣ କେନ୍ଦ୍ର(ଇସିଡିସି) କହିଛି ଯେ ଏହାର ମଡେଲ ସୂଚିତ କରେ ଯେ ଏକ୍ସବିବି.୧.୫ ଏକ କିମ୍ବା ଦୁଇ ମାସ ମଧ୍ୟରେ ୟୁରୋପରେ ପ୍ରାଧାନ୍ୟ ବିସ୍ତାର କରିପାରେ।