ପାରାଦୀପ,୧୩।୧୧(ସ୍ବ.ପ୍ର.): ପାରାଦୀପର ମଧ୍ୟସ୍ଥଳରେ ଥିବା କଂସାରୀପାଟିଆ ନଦୀରେ ପୁଣି ପଲଥିନ ଆଡ ନିର୍ମାଣ ହେଲାଣି। ୧୫ ଦିନ ତଳେ ପ୍ରଶାସନ ପକ୍ଷରୁ ଏସବୁ ପଲିଥିନ ଆଡ଼ ଉଚ୍ଛେଦ କରାଯାଇଥିଲା। ଏବେ ନଦୀର ଅଠରବାଙ୍କିଠାରୁ ଶ୍ମଶାନ ପର୍ଯ୍ୟନ୍ତ ସୀମାରେ ୫ଟି ନୂତନ ପଲିଥିନ ଆଡ଼ ନିର୍ମାଣ କରାଯାଇଛି।
ସେପ୍ଟେମ୍ବର ୧୨ରେ ପ୍ରବଳ ବର୍ଷା ଯୋଗୁ ପାରାଦୀପ ଓ କୁଜଙ୍ଗ ଅଞ୍ଚଳ ଜଳମଗ୍ନ ହୋଇଯାଇଥିଲା। ପ୍ରାୟ ୧୫ ଦିନ ପର୍ଯ୍ୟନ୍ତ ଏକାଧିକ ଗ୍ରାମରେ ପାଣି ଜମିଥିଲା। ସେତେବେଳେ ଦେଖାଗଲା ଯେ ନଦୀର ଏକାଧିକ ଜାଗାରେ କିଛି ମତ୍ସ୍ୟଜୀବୀ ପଲିଥିନ ଯୁକ୍ତ ଆଡ଼ କରିଥିବାରୁ ବର୍ଷାପାଣି ଠିକ୍ ଭାବେ ନିଷ୍କାସନ ହୋଇପାରୁନାହିଁ। ଏସବୁ ଆଡ଼ ନିଷ୍କାସନ ଦାବିରେ ସେତେବେଳେ ସ୍ଥାନୀୟ ଲୋକେ ରାସ୍ତାରୋକୋ କରିଥିଲେ। ଏହାପରେ କୁଜଙ୍ଗ ତହସିଲ କାର୍ଯ୍ୟାଳୟ ପକ୍ଷରୁ ପାରାଦୀପ ଅଞ୍ଚଳରେ ଥିବା ସମସ୍ତ ନଦୀରୁ ଆଡ ଉଚ୍ଛେଦ କରାଯାଇଥିଲା। ମାତ୍ର କିଛିଦିନର ବ୍ୟବଧାନ ପରେ ପୁଣି ଥରେ ନଦୀରେ ଆଡ଼ ତିଆରି କରାଯାଇଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଆଗକୁ ଲଘୁଚାପଜନିତ ବର୍ଷାର ଆଶଙ୍କା ଥିବାରୁ ପୁର୍ନବାର ପାଣି ଜମିବାର ଆଶଙ୍କା ରହିଛି ବୋଲି କାଳିଆପାଟ ଗ୍ରାମର ଆଲୋକ ରାଉତ କୁହନ୍ତି। ସୂଚନାଯୋଗ୍ୟ, ପାରମ୍ପରିକ ମତ୍ସ୍ୟଜୀବୀଙ୍କୁ ନଦୀରେ ମାଛ ଧରିବା ପାଇଁ ସରକାର ଅଧିକାର ଦେଇଛନ୍ତି। ସେଥିପାଇଁ ସେମାନେ ଡିସେମ୍ବରରୁ ଜୁନ୍ ମଧ୍ୟରେ ନଦୀରେ ବାଉଁଶ ପୋତି ଜାଲ ବସାଇପାରିବେ। ଏହାପରେ ଉକ୍ତ ଆଡ଼କୁ ଉଠାଇଦେବାକୁ ପ୍ରଶାସନ ପକ୍ଷରୁ କୁହାଯାଇଛି। ମାତ୍ର କିଛି ମତ୍ସ୍ୟଜୀବୀମାନେ ଏହାକୁ ନ ମାନି ବାରମ୍ବାର ଆଡ଼ ବସାଉଛନ୍ତି ସ୍ଥାନୀୟ ଲୋକେ କହିଛନ୍ତି। ଏସମ୍ପର୍କରେ ତହସିଲଦାର ପ୍ରୀତିପର୍ଣ୍ଣା ମିଶ୍ର କହିଛନ୍ତି, ନୂତନ ଆଡ଼ ବସିବା ଘଟଣା ତାଙ୍କ ନଜରକୁ ଆସିନାହିଁ। ତେବେ ଏବିଷୟରେ ତଦନ୍ତ କରାଯାଇ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ।
