ବ୍ରହ୍ମପୁର ଅଫିସ,୧୨ା୧୨: ସହରରେ ମଶା ପ୍ରାଦୁର୍ଭାବକୁ ନେଇ ଗତ ୭ ତାରିଖରେ ବ୍ରହ୍ମପୁର ମହାନଗର ନିଗମ (ବିଇଏମ୍ସି) କାର୍ଯ୍ୟାଳୟ ପରିସରରେ ଭାଜପା କର୍ମୀ ଓ କମିଶନର ମୁହାଁମୁହିଁ ହୋଇଥିଲେ। ଶନିବାର ବିଇଏମ୍ସି କାର୍ଯ୍ୟାଳୟର କର୍ମଚାରୀଙ୍କ ପକ୍ଷରୁ ଭାଜପା ବରିଷ୍ଠ ନେତା କାହ୍ନୁ ଚରଣ ପତିଙ୍କ ସମେତ ଆଉ କେତେକ କର୍ମକର୍ତ୍ତା ଓ କର୍ମୀଙ୍କ ବିରୋଧରେ ଟାଉନ ଥାନାରେ ଏତଲା ଦିଆଯାଇଥିଲା। ରବିବାର ଭାଜପା ପକ୍ଷରୁ ଥାନାରେ ପାଲଟା ଅଭିଯୋଗ କରାଯାଇଛି। ବିଇଏମ୍ସି କମିଶନର ଜେ. ସୋନାଲ ଓ ଅନ୍ୟ ୩ କର୍ମଚାରୀଙ୍କ ବିରୋଧରେ ଗଞ୍ଜାମ ଜିଲା ଭାଜପା ପକ୍ଷରୁ ଟାଉନ ଥାନାରେ ଏତଲା ଦିଆଯାଇଛି। ବିଇଏମ୍ସି କମିଶନର ଧମକ ଦେଇଥିବା ଅଭିଯୋଗରେ ଦର୍ଶାଯାଇଛି। ଯାହାକୁ ନେଇ ଭାଜପା ଏବଂ ନିଗମ ଅଧିକାରୀ ଓ କର୍ମଚାରୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। ଭାଜପା ନେତା କାହ୍ନୁ ପତି ପ୍ରତିକ୍ରିୟାରେ କହିଛନ୍ତି, କମିଶନରଙ୍କ ଅହଙ୍କାର ବଢ଼ିଯାଇଛି। ଏହାର ଉପଯୁକ୍ତ ଜବାବ ଦିଆଯିବ। ଆବଶ୍ୟକ ସ୍ଥଳେ ଏହାକୁ ପ୍ରସଙ୍ଗ କରି ମହାନଗରରେ ଭାଜପା ଜୋରଦାର ଆନ୍ଦୋଳନ କରିବ ବୋଲି ସେ କହିଛନ୍ତି।