ପିଲାଦିନ ହେଉଛି ଖେଳକୁଦ, ମଜାମସ୍ତି କରିବାର ସମୟ। ହେଲେ ବେଳେବେଳେ କିଛି ପିଲା ଏଇ ବୟସରେ ଏମିତି କିଛି କାମ କରନ୍ତି, ଯାହାକୁ ବଡମାନେ କରିବା ଅସମ୍ଭବ। ଯେମିତିକି ଅଷ୍ଟ୍ରେଲିଆରେ ରହୁଥିବା ୧୦ ବର୍ଷୀୟା ପିକ୍ସି କର୍ଟିସ୍ ଏମିତି କାମ କରି ଦେଖାଇଛନ୍ତି ଯାହାକୁ କୌଣସି ବ୍ୟକ୍ତି କେବଳ ସ୍ବପ୍ନରେ ଭାବି ପାରିବେ। ପିକ୍ସି ଏକ ପ୍ରାଇମେରୀ ସ୍କୁଲର ଛାତ୍ରୀ। ହେଲେ ଏଇ ବୟସରେ ସେ ଫିଜେଟ୍ସ ଓ ପପିଂ ଖେଳଣା ତିଆରି କରି ବ୍ୟବସାୟ କରୁଛନ୍ତି। ବଜାରରେ ତାଙ୍କର ଏଇ ଖେଳଣାଗୁଡିକର ଚାହିଦା ଆକାଶ ଛୁଆଁ। ଏହାବାଦ ପିକ୍ସିଙ୍କ ନାମରେ ଏକ ହେୟାର ଏକ୍ସେସରୀ ବ୍ରାଣ୍ଡ ବି ଅଛି। ଯେଉଁଥିରେ ବହୁତ ସୁନ୍ଦର ସୁନ୍ଦର ହେଡବ୍ୟାଣ୍ଡ, କ୍ଲିପ୍ ଓ ଅନ୍ୟାନ୍ୟ ହେୟାର ଆକ୍ସେସରୀ ତିଆରି କରାଯାଇଥାଏ। ଏତେ କମ୍ ବୟସରୁ ପିକ୍ସିଙ୍କ ଭିତରେ ବ୍ୟବସାୟ କରିବାର ଝୁଙ୍କ ଓ ଯୋଜନା ବି ଥିଲା। ତେଣୁ ତାଙ୍କ ମା’ ତାଙ୍କୁ ସହଯୋଗ କରିଥିଲେ। ଆଉ ଖେଳଣା ବ୍ୟବସାୟ ଆରମ୍ଭ କରିଥିଲେ। ବ୍ୟବସାୟ ଆରମ୍ଭ ହେବାର ୪୮ ଘଣ୍ଟା ଭିତରେ ହିଁ ତାଙ୍କର ସବୁ ଖେଳଣା ବିକ୍ରି ହୋଇଯାଇଥିଲା। ଏଇ ବଡ଼ ସଫଳତା ତାଙ୍କୁ ଆଗକୁ ବଢିବାର ପ୍ରେରଣା ଦେଇଥିଲା। ଆଉ ମାସକ ମଧ୍ୟରେ ଟର୍ନଓଭର ୧ କୋଟି ହୋଇଯାଇଥିଲା। ଏହାପରେ ପିକ୍ସି ହେୟାର ଆକ୍ସେସରୀ ବ୍ୟବସାୟକୁ ଓହ୍ଲାଇଥିଲେ। ଯାହାର ନାଁ ସେ ପିକ୍ସି ବୋ’ ରଖିଲେ। ଏଇ ହେୟାର ବୋ’ଗୁଡିକୁ ବି ବହୁତ ପସନ୍ଦ କରାଯାଉଛି। ପିକ୍ସିଙ୍କ ନାଁରେ ଦୁଇ ଦୁଇଟି କମ୍ପାନୀ ରହିଛି। ଆଉ ସେ କୋଟି କୋଟି ଟଙ୍କା ଆୟ କରୁଛନ୍ତି। ତାଙ୍କ ମା’ ଯୋଜନା କରିଛନ୍ତି ଯେ, ପିକ୍ସି ୧୫ ବର୍ଷ ବୟସରେ ଅବସର ନେବେ।