ବେଜିଂ,୨୩ା୧୦: ଦକ୍ଷିଣ ପଶ୍ଚିମ ଚାଇନାର ସିଚୁଆନ ରାଜ୍ୟ ଲେଶାନ ସିଟିର ଜଣେ ୧୪ ବର୍ଷର ବାଳକଙ୍କ ଉଚ୍ଚତା ୭ ଫୁଟ। ଏହି ବାଳକ ବିଶ୍ୱର ସବୁଠୁ ଡେଙ୍ଗା ବାଳକ ଭାବରେ ପରିଗଣିତ ହୋଇଛନ୍ତି। ତାଙ୍କ ନାମ ରେନ୍ କିୟୁ। ରେନ୍ ତାଙ୍କ ସାଥୀମାନଙ୍କ ତୁଳନାରେ ପ୍ରାୟ ୨ ଫୁଟ ଅଧିକ।
ରବିବାର ରେନ ତାଙ୍କର ୧୪ତମ ଜନ୍ମଦିବସ ପାଳନ କରିଥିଲେ। ଏହିଦିନ ତାଙ୍କର ମାପ କରାଯାଇଥିଲା। ସେ ଏତେ ଲମ୍ବା ଯେ, ସହରର ଷ୍ଟ୍ରିଟ୍ ଲ୍ୟାମ୍ପ ସହ ସମାନ।
ରେନ୍ ଗିନିଜ ଓ୍ବାଲର୍ଡ ରେକର୍ଡ ସହିତ ବିଶ୍ୱରେ ବର୍ତ୍ତମାନ ଉଚ୍ଚତମ କିଶୋର ହେବାକୁ ଆବେଦନ କରିଛନ୍ତି। ରେନ୍ଙ୍କ ପୂର୍ବରୁ ଜଣେ ୧୬ ବର୍ଷୀୟ ଆମେରିକୀୟ ବାଳକଙ୍କ ଉଚ୍ଚତା ୭ ଫୁଟ ଥିଲା। ରେନ୍ଙ୍କ ଅଧିକ ଉଚ୍ଚତା ଯୋଗୁ ତାଙ୍କ ପାଇଁ ସ୍କୁଲରେ ସ୍ବତନ୍ତ୍ର ଡେସ୍କ, ବେଞ୍ଚ ତିଆରି କରାଯାଇଥାଏ॥ ତାଙ୍କ ଜେଜେମା ୟିୟୁ ମେ କୁହନ୍ତି, ପୂର୍ବରୁ ଠିକ୍ଠାକ୍ ଥିଲେ। ସେ ଗତ ଦୁଇ ବର୍ଷ ମଧ୍ୟରେ ବହୁତ ଲମ୍ବା ହୋଇ ଯାଇଛନ୍ତି।
ରେନ୍ କୁହନ୍ତି, ସ୍କୁଲରେ ସେ ସବୁଠୁ ଡେଙ୍ଗା ଛାତ୍ର। ଏଥିପାଇଁ ସହପାଠୀମାନେ ମଧ୍ୟ ତାଙ୍କୁ ଚିଡ଼ାଇଥାନ୍ତି। ଏକଥା ତାଙ୍କୁ ବହୁ ବିବ୍ରତ କରେ। ତେଣୁ ସେ ନିଷ୍ପତ୍ତି ନେଇଛନ୍ତି ଗିନିଜ୍ ରେକର୍ଡ କରି ଦେଖାଇବେ।
