ନୁଆଦିଲ୍ଲୀ,୩।୮ (ପି.ଟି.): କ୍ରିକେଟରେ ଖେଳାଳିଙ୍କ ବୟସ ଜାଲିଆତି ପ୍ରସଙ୍ଗରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତା’ର ଆଭିମୁଖ୍ୟ ଆହୁରି କଡ଼ା କରିଛି। ପଞ୍ଜୀକୃତ ଖେଳାଳିମାନେ ବୟସ ଜାଲିଆତି କରିଥିବା ନେଇ ନଜ ଆଡୁ ମାନିଗଲେ ସେମାନଙ୍କୁ କ୍ଷମା କରିଦିଆଯିବ ବୋଲି ସୋମବାର ବିସିସିଆଇ ତରଫରୁ ସ୍ପଷ୍ଟ କରାଯାଇଛି। କିନ୍ତୁ ଯେଉଁ ଖେଳାଳିମାନେ ଏ ସଂକ୍ରାନ୍ତରେ ଦୋଷ ଲୁଚାଇବାକୁ ପ୍ରୟାସ କରିବେ ସେମାନଙ୍କୁ ୨ ବର୍ଷ ବାସନ୍ଦ କରାଯିବ ବୋଲି ବୋର୍ଡ ସତର୍କ କରାଇ ଦେଇଛି। ବିସିସିଆଇ ଦ୍ୱାରା ଆୟାଜନ କରାଯାଉଥିବା ବିଭିନ୍ନ ବୟସବର୍ଗ ଟୁର୍ନାମେଣ୍ଟଗୁଡିକରେ ଅଂଶଗ୍ରହଣ କରୁଥିବା ଖେଳାଳିମାନଙ୍କ ପାଇଁ ଏହି ନିୟମ ୨୦୨୦-୨୧ ସେସନଠାରୁ ଲାଗୁ କରାଯାଇଛି।
ନକଲି ଜନ୍ମ ପ୍ରମାଣପତ୍ର ଦେଇ ବୟସ ଜାଲିଆତି କରିଥିବା ଖେଳାଳିମାନେ ଦୋଷ ସ୍ବୀକାର କଲେ ସେମାନଙ୍କୁ କ୍ଷମା ମିଳିବ। ବାସନ୍ଦ କରା ନ ଯାଇ ସେମାନଙ୍କୁ ପ୍ରକୃତ ବୟସବର୍ଗରେ ଖେଳିବାକୁ ସୁଯୋଗ ଦିଆଯିବ। ତେବେ ଏଥିପାଇଁ ଖେଳାଳିମାନଙ୍କୁ ସେମାନଙ୍କ ପ୍ରକୃତ ଜନ୍ମ ତାରିଖ ବିଷୟରେ ଅବଗତ କରିବାକୁ ହେବ ବୋଲି ବିସିସିଆଇ ତରଫରୁ କୁହାଯାଇଛି। କିନ୍ତୁ ଯେଉଁମାନେ ଏବେ ନିଜ ଦୋଷକୁ ସ୍ବୀକାର ନ କରିବେ ସେମାନେ ଦୁଇ ବର୍ଷ ବାସନ୍ଦ ହେବେ ଓ ସେମାନେ ବିସିସିଆଇ ଓ ରାଜ୍ୟ ଆସୋସିଏଶନଗୁଡିକ ଦ୍ୱାରା ଆୟୋଜିତ ହେଉଥିବା ଟୁର୍ନାମେଣ୍ଟରେ ଅଂଶଗ୍ରହଣ କରିବାରୁ ବଞ୍ଚିତ ହେବେ। ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ଓ ତାଙ୍କ ପୂର୍ବତନ ଦଳୀୟ ସାଥୀ ଖେଳାଳି ରାହୁଲ ଡ୍ରାଭିଡ୍ ବୟସ ଜାଲିଆତି ରୋକିବା ସପକ୍ଷରେ ମତ ଦେଇଛନ୍ତି। କ୍ରିକେଟରେ ବୟସ ଜାଲିଆତି ବରଦାସ୍ତ କରାଯିବ ନାହିଁ ବୋଲି ବୋର୍ଡ ସ୍ପଷ୍ଟ କରିଛି। ଏ ସଂକ୍ରାନ୍ତରେ ବୋର୍ଡର ନିର୍ଦ୍ଦେଶକୁ ମାନିବାକୁ ଡ୍ରାଭିଡ୍ ଖେଳାଳିମାନଙ୍କୁ ନିର୍ଦ୍ଦେଶ ଦେଇଛନ୍ତି।
