ଟ୍ରେଣ୍ଟ ବ୍ରିଜ୍,୫।୮: ସ୍ଥାନୀୟ ଟ୍ରେଣ୍ଟ ବ୍ରିଜ୍ରେ ଚାଲିଥିବା ଇଂଲଣ୍ଡ ବିପକ୍ଷ ଟେଷ୍ଟ ମ୍ୟାଚ୍ରେ ଟିମ୍ ଇଣ୍ଡିଆକୁ ଭଲ ଆରମ୍ଭ ଦେଇଥିଲେ ରୋହିତ ଶର୍ମା ଓ ଲୋକେଶ ରାହୁଲଙ୍କ ଓପନିଂ ଯୋଡ଼ି। ଦୁହେଁ ପ୍ରଥମ ଉଇକେଟ ପାଇଁ ଯୋଡ଼ିଥିଲେ ୯୭ ରନ୍। ଲାଗୁଥିଲା ଟିମ୍ ଇଣ୍ଡିଆ ସହଜରେ ପ୍ରଥମ ଇନିଂସରେ ଅଗ୍ରଣୀ ହାସଲ କରିବ।
କିନ୍ତୁ ରୋହିତ(୩୬)ଙ୍କୁ ଆଉଟ୍ କରି ଭାରତୀୟ ଦଳକୁ ପ୍ରଥମ ଝଟକା ଦେଇଥିଲେ ଓଲି ରବିନସନ। ତା’ ପରେ ଜିମ୍ମି ଆଣ୍ଡରସନ କ୍ରମାଗତ ବଲରେ ଚେତେଶ୍ୱର ପୂଜାରା (୪) ଓ ଅଧିନାୟକ ବିରାଟ କୋହଲି (୦)ଙ୍କୁ ଆଉଟ୍ କରି ଭାରତୀୟ ଦଳର ପ୍ରୟାସରେ ପାଣି ପୁରାଇ ଦେଇଥିଲେ। ଏହାପରେ ଉପଅଧିନାୟକ ଅଜିଙ୍କ୍ୟ ରାହାନେ (୫) ରନ୍ଆଉଟ୍ ହେବା ସହ ମ୍ୟାଚ୍କୁ ଫେରିଥିଲା ଘରୋଇ ଦଳ। ବର୍ଷା କାରଣରୁ ଦ୍ୱିତୀୟ ଦିନର ଖେଳକୁ ଯଥେଷ୍ଟ ପୂର୍ବରୁ ସମାପ୍ତି ଘୋଷଣା କରାଯାଇଥିଲା। ଷ୍ଟମ୍ପ ଅପସାରଣ ବେଳକୁ ଭାରତ ୪୬.୪ ଓଭରରେ ୪ ଉଇକେଟ ହରାଇ ୧୨୫ ରନ ସଂଗ୍ରହ କରିଛି। ଫଳରେ ହାତରେ ୬ ଉଇକେଟ ଥାଇ ଭାରତ ୫୮ ରନ ପଛରେ ରହିଛି। ଓପନର ଲୋକେଶ ରାହୁଲ ୫୭ ଓ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ୭ ରନ କରି ଅପରାଜିତ ରହିଛନ୍ତି। ପୂର୍ବରୁ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ୧୮୩ ରନ କର ଅଲ୍ଆଉଟ ହୋଇଥିଲା।
