ମାଲାପୁରାମ,୮।୧: କେରଳର ମାଲାପୁରାମ ଜିଲାର ତିରୁର୍ ପୁଥିଆଙ୍ଗଡ଼ି ମହୋତ୍ସବରେ ଏକ ହାତୀର ଉନ୍ମତ୍ତ କାଣ୍ଡ ଦେଖିବାକୁ ମିଳିଛି। ମହୋତ୍ସବରେ ସାମିଲ ହୋଇଥିବା ୫ ହାତୀ ମଧ୍ୟରୁ ପାକ୍କାଟୁ ଶ୍ରୀକୁଟନ୍ ନାମକ ହାତୀ ଆକ୍ରାମକ ହୋଇଯାଇଥିଲା। ସେ ସେଠାରେ ଉପସ୍ଥିତ ଥିବା ଜଣେ ବ୍ୟକ୍ତିଙ୍କୁ ଶୁଣ୍ଢରେ ଟେକି ଦୂରକୁ ଫିଙ୍ଗିଦେଇଥିଲା। ଏଥିରେ ସେ ଗୁରୁତର ଆହତ ହୋଇଥିଲେ। ତେବେ ଉତ୍ସବରେ ଉପସ୍ଥିତ ଲୋକେ ଆହତ ବ୍ୟକ୍ତିଙ୍କୁ ସହାୟତାର ହାତ ବଢ଼ାଇଥିଲେ।
ପୁଥିଆଙ୍ଗଡ଼ି ମନ୍ଦିର ଉତ୍ସବ ସମୟରେ ଶ୍ରୀକୁଟନ୍ ହାତୀ ହଠାତ୍ ଉତ୍ପାତ କରିଥିଲା। ଫଳରେ ଲୋକେ ଭୟରେ ଏଣେତେଣେ ଦୌଡ଼ିବାରେ ଲାଗିଥିଲେ। ଏହି ଘଟଣାରେ ପ୍ରାୟ ୨୦ ଜଣ ଆହତ ହୋଇଥିଲେ। ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ଗୁରୁତର ଅଛି। ଘଟଣାର ଭିଡିଓ ସାମ୍ନାକୁ ଆସିଛି।
ତେବେ ଆୟୋଜକଙ୍କ କହିବା ମୁତାବକ, ହାତୀ ଜଣଙ୍କୁ ଫିଙ୍ଗିଦେବା ପରେ ଲୋକେ ଆତଙ୍କିତ ହୋଇଯାଇଥିଲେ। ଏହାପରେ ରାତି ୨ଟା ପରେ ମାହୁନ୍ତ ହାତୀକୁ କାବୁ କରିଥିଲେ। ଫଳରେ ଅଧିକ କ୍ଷତି ହେବାରୁ ରୋକାଯାଇପାରିଥିଲା।