ପୁରୁଷୋତ୍ତମପୁର,୨୭।୯(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ତହସିଲ ଅନ୍ତର୍ଗତ ଭୀମପୁର ଗ୍ରାମର ଋଷିକୁଲ୍ୟା ନଦୀ ବାଲିଘାଟର ଲିଜ୍ ଘଟଣା ଏବେ ଅଞ୍ଚଳରେ ଏକ ପ୍ରକାର ବିବାଦୀୟ ପରିସ୍ଥିତି ସୃଷ୍ଟି କରିଛି। ଅଞ୍ଚଳର ବିଭିନ୍ନ ଗ୍ରାମର ହଜାର ହଜାର ଜନସାଧାରଣ ବାଲିଘାଟ ଲିଜ୍କୁ ତୁରନ୍ତ କାର୍ଯ୍ୟକାରୀ କରି ବାଲି ଉଠାଇବା ଲାଗି ପ୍ରଶାସନଠାରେ ଦାବି କରିଆସୁଛନ୍ତି। ହେଲେ କିଛି ବ୍ୟକ୍ତି ଏହାକୁ ବିରୋଧ କରିବା ସହ ବାଲିଘାଟ ଲିଜ୍କୁ ବନ୍ଦ କରିବା ଲାଗି ଦାବି କରୁଛନ୍ତି। ସୂଚନାଯୋଗ୍ୟ, ଗତ କିଛି ମାସ ହେଲା ଏଠାରେ ଥିବା ବିଭିନ୍ନ ବାଲିଘାଟ ବନ୍ଦ ରହିଥିବାରୁ ଲୋକଙ୍କୁ ଘର ତିଆରି କରିବାରେ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ଏଥିସହ ସରକାରଙ୍କ ପକ୍ଷରୁ ହେଉଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟମାନ ସବୁ ଏକ ପ୍ରକାର ବନ୍ଦ ହୋଇପଡିଛି। ଏହି ବାଲିଘାଟ ବନ୍ଦର ସୁଯୋଗ ନେଇ ବାଲି ମାଫିଆମାନେ ରାତାରାତି ଋଷିକୁଲ୍ୟା ନଦୀରୁ ବାଲି ଚୋରାଇ ଆଣି ହଜାର ହଜାର ଟଙ୍କାରେ ବିକ୍ରି କରୁଛନ୍ତି। ତେଣୁୁ ପ୍ରଶାସନ ତୁରନ୍ତ ଭୀମପୁରର ଏହି ବାଲିଘାଟ ଲିଜ କାର୍ଯ୍ୟକାରି କରିବା ଲାଗି ଅଞ୍ଚଳବାସୀ ଦାବି କରିଆସୁଛନ୍ତି। ମାତ୍ର ଏହି ବାଲିଘାଟ ଲିଜ୍ ହେଲେ ବର୍ଷାଦିନେ ଭୀମପୁର ଗ୍ରାମର ବନ୍ୟାପାଣି ଆସି ପଶିବା ଆଶଙ୍କା କରିବା ସହ ସ୍କୁଲ ଛାତ୍ରୀଛାତ୍ରଙ୍କ ପ୍ରତି ବିପଦ ରହିଛି ବୋଲି କିଛି ବ୍ୟକ୍ତି ଯୁକ୍ତି ବାଢ଼ିଛନ୍ତି। ଯାହାକୁ ନେଇ କିଛି ବ୍ୟକ୍ତି ଏକତ୍ରିତ ହୋଇ ମଙ୍ଗଳବାର ତହସିଲ କାର୍ଯ୍ୟାଳୟରେ ଆନ୍ଦୋଳନ କରିବା ସହ ଏକ ସ୍ମାରକପତ୍ର ପ୍ରଦାନ କରିଛନ୍ତି। ଅନ୍ୟପଟେ ଏହି ଆନ୍ଦୋଳନକୁ ଅଞ୍ଚଳବାସୀ ନାପସନ୍ଦ କରିଛନ୍ତି। ଫଳରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି।