ନୂଆଦିଲ୍ଲୀ,୧୯।୬: କେନ୍ଦ୍ର ସରକାରଙ୍କ ‘ଅଗ୍ନିପଥ’ ଯୋଜନାକୁ ବିରୋଧ କରୁଥିବା ଯୁବକଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିଶ୍ୱାସ ରଖିବାକୁ ଭାଜପା ରାଷ୍ଟ୍ରୀୟ ସଭାପତି ଜେପି ନଡ୍ଡା ଆହ୍ବାନ କରିଛନ୍ତି। ଆନ୍ଦୋଳନକୁ ଶେଷ କରିବା ଏବଂ ଆଲୋଚନାର ରାସ୍ତା ବାଛିବା ସହିତ ଯୋଜନାକୁ ବିସ୍ତୃତ ଭାବରେ ବୁଝିବା ପାଇଁ ସେ ଯୁବକମାନଙ୍କୁ ନିବେଦନ କରିଛନ୍ତି।
ନଡ୍ଡା କହିଛନ୍ତି, ମୁଁ ମୋର ଯୁବ ବନ୍ଧୁମାନଙ୍କୁ ନିବେଦନ କରିବାକୁ ଚାହୁଁଛି ଯେ ଅଗ୍ନିପଥ ଏକ ବୈପ୍ଳବିକ ଯୋଜନା। ଭାରତୀୟ ସେନାକୁ ବିଶ୍ୱ ସ୍ତରରେ ଏକ ଦୃଢ ସ୍ଥିତିରେ ରଖିବା ପାଇଁ ଏହା ଏକ ବଡ ବୈପ୍ଳବିକ ପଦକ୍ଷେପ। ଆମକୁ ଏହା ବୁଝିବାକୁ ପଡିବ। ମୁଁ ଭଲଭାବେ ଜାଣିଛି ଯୁବକଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରାଯାଉଛି। ମୁଁ ମୋର ଯୁବ ବନ୍ଧୁମାନଙ୍କୁ କହିବାକୁ ଚାହେଁ ଯେ ଆଗାମୀ ଦିନରେ ନିଜକୁ ବିଶ୍ୱ ସାମ୍ନାରେ ପ୍ରତିଷ୍ଠିତ କରିବାକୁ ହେଲେ ପ୍ରଧାନମନ୍ତ୍ରୀ ମୋଦିଙ୍କ ଉପରେ ବିଶ୍ୱାସ ରଖିବା ଉଚିତ।
ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ପକ୍ଷରୁ ଭାରତୀୟ ସେନା, ବାୟୁସେନା ଏବଂ ନୌସେନାରେ ନିଯୁକ୍ତି ପାଇଁ ଅଗ୍ନିପଥ ଯୋଜନା ଆରମ୍ଭ କରିବାକୁ ଘୋଷଣା କରାଯାଇଛି। ଏହି ଯୋଜନା ଅଧୀନରେ, ଇଚ୍ଛୁକ ଯୁବକମାନଙ୍କୁ ୪ ବର୍ଷ ପାଇଁ ସଶସ୍ତ୍ର ବାହିନୀରେ ନିଯୁକ୍ତି ଦିଆଯିବ। ଏହାକୁ ବିରୋଧ କରି ଛାତ୍ରମାନେ ରେଳ ଧାରଣା ଉପରେ ପ୍ରଦର୍ଶନ କରିଛନ୍ତି। ଏହାସହ ଟ୍ରେନ୍ରେ ନିଆଁ ଲଗାଇ ଦେଇଛନ୍ତି।