ଭୁବନେଶ୍ୱର,୬।୮: ଓଡ଼ିଶା ସରକାରଙ୍କ ସମ୍ପୂର୍ଣ୍ଣ ମାଲିକାନାରେ ପରିଚାଳିତ ‘ଓଡ଼ିଶା ମିନେରାଲ୍ ଏକ୍ସପ୍ଲୋରେଶନ କର୍ପୋରେଶନ ଲିମିଟେଡ୍ (ଓଏମ୍ଇସିଏଲ୍) ଏବଂ କନ୍ସୋର୍ଟିୟମ୍ ଏମ୍ଏସ୍ଓ ସହ ଏକ ଚୁକ୍ତିନାମା ସ୍ବାକ୍ଷର ହୋଇଯାଇଛି। ଫଳସ୍ବରୂପ ରାଜ୍ୟରେ ବିଭିନ୍ନ ଖଣିଜ ପଦାର୍ଥର ନିଲାମ ଯୋଗ୍ୟ ଖଣିଜ ଜମା ଅନୁସନ୍ଧାନକୁ ଅପ୍ଟିମାଇଜ୍ କରିବାକୁ ଦକ୍ଷିଣ ଆଫ୍ରିକା ଆଣ୍ଡ ଆଇଡିଇପିଏକ୍ସ (ଭାରତ) ଉକ୍ତ ବ୍ଲକଗୁଡିକର ତାଲିକା ପ୍ରସ୍ତୁତ କରିବ। ଓଡ଼ିଶା ସରକାରଙ୍କ ଖଣି ଓ ଇସ୍ପାତ ବିଭାଗର ପ୍ରମୁଖ ଶାସନ ସଚିବ ତଥା ଓଏମ୍ଇସିଏଲ୍ର ଅଧ୍ୟକ୍ଷ ଡି.କେ.ସିଂଙ୍କ ଅଧ୍ୟକ୍ଷତାରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଓଡ଼ିଶା ଖଣି ନିର୍ଦ୍ଦେଶକ ଦେବୀଦତ୍ତ ବିଶ୍ୱାଳ, ଓଏମ୍ଇସିଏଲ୍ର ଏମ୍ଡି ବଲୱନ୍ତ ସିଂଙ୍କ ସମେତ ଭୂବିଜ୍ଞାନ ନିର୍ଦ୍ଦେଶକ ଓଡ଼ିଶା ଏବଂ ଜିଓଲୋଜିକାଲ ସର୍ଭେ ଅଫ୍ ଇଣ୍ଡିଆର ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ। ଓଡ଼ିଶା ହେଉଛି ଏକ ଖଣିଜ ସମ୍ପଦ ଭରା ରାଜ୍ୟ ତଥାପି ରାଜ୍ୟର ବୃହତ୍ ଅଂଶ ଏପର୍ଯ୍ୟନ୍ତ ଅନୁସନ୍ଧାନ କରାଯାଇ ନାହିଁ। ଏହି ଅନୁସନ୍ଧାନ କାର୍ଯ୍ୟକ୍ରମ ଲୁକ୍କାୟିତ ଖଣିଜ ଜମା ଆବିଷ୍କାର କରିବ। ଏପରିକି ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରି ରାଜ୍ୟର ବିକାଶ ପାଇଁ ଖଣିଜ ସମ୍ପଦ ବ୍ୟବହାର କରିବାରେ ଏହା ବେଶ୍ ସାହାଯ୍ୟ କରିବ ବୋଲି ଡି.କେ. ସିଂ ମତବ୍ୟକ୍ତ କରିଛନ୍ତି। ସେହିଭଳି ବଲୱନ୍ତ ସିଂ କହିଛନ୍ତି, ଏହି ପ୍ରକଳ୍ପ ସହ ରାଜ୍ୟ ଇଚ୍ଛା କରିବ ଯେ ଆଗାମୀ ଦିନରେ ଗଠନମୂଳକ ଏବଂ ବିସ୍ତୃତ ଖଣିଜ ଉତ୍ସ ମାନଚିତ୍ର ପ୍ରାପ୍ତ କରିବାକୁ। ସେଥିପାଇଁ ଭାରତର ଭୂତତ୍ତ୍ୱ ସର୍ବେକ୍ଷଣ, ଭୂବିଜ୍ଞାନ ନିର୍ଦ୍ଦେଶାଳୟ ଏ ନେଇ ସମସ୍ତ କାର୍ଯ୍ୟ କରିବ।
ଏହି ପରିପ୍ରେକ୍ଷୀରେ ଓଏମ୍ଇସିଏଲ୍ର ନିର୍ଦ୍ଦେଶକ (ଭୂବିଜ୍ଞାନ) ଏସ୍.କେ. ସିହ୍ନା ଏହି ଚୁକ୍ତିନାମା ସ୍ବାକ୍ଷର କରିଛନ୍ତି, ଡ. ଇଆନ ହାଡନ ଏମ୍ଡି ଏମ୍ଏସ୍ଏ ଏବଂ ଏସ୍. କରୁଣାକର ରାଓ ଏମ୍ଡି ଆଇଡିପିଇଏକ୍ସଙ୍କ ଉପସ୍ଥିତିରେ ଉକ୍ତ ଚୁକ୍ତିନାମା ସ୍ବାକ୍ଷର ହୋଇଥିଲା। ଓଏମ୍ଇସିଏଲ୍ର ନିର୍ଦ୍ଦେଶକ (ଅର୍ଥ) ବି.ବି. ପାଣିଙ୍କ ସମେତ ଓଡ଼ିଶା ସରକାରଙ୍କ ଖଣି ଓ ଇସ୍ପାତ ବିଭାଗର ଅଧିକାରୀମାନେ ଉପସ୍ଥିତ ଥିଲେ। ସେହିପରି ଏସ୍ଟିସି ଦଳରୁ ଡ. ଆଶ୍ଲି ଜନ୍ସନ, କ୍ରେଗ୍ ବ୍ଲେନ୍ ଏବଂ ଧ୍ରୁବା ଜ୍ୟୋତି ନାଥ ଉପସ୍ଥିତ ଥିଲେ।