କେନ୍ଦୁଝର, ୨୧।୮(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା କୃଷି ବିଭାଗ ଫର୍ଟିଲାଇଜର ସ୍କ୍ବାର୍ଡ ପକ୍ଷରୁ ସୋମବାର ସଦର ବ୍ଲକ ଅନ୍ତର୍ଗତ ପଦ୍ମପୁର ବଜାରରେ ଥିବା ସାର ବିକ୍ରୟ କେନ୍ଦ୍ର ଉପରେ ଚଢାଉ କରାଯାଇଥିଲା। ଚଢାଉ ବେଳେ ଅଧିକାରୀମାନେ ଅଧିକ ଦରରେ ୟୁରିଆ ସାର ବିକ୍ରି ହେଉଥିବା ଜାଣିବାକୁ ପାଇଛନ୍ତି। ତେଣୁ ଜଣେ ଦୋକାନୀଙ୍କୁ କାରଣ ଦର୍ଶାଅ ନୋଟିସ ଦିଆଯାଇଛି। ସମ୍ପୃକ୍ତ ଦୋକାନୀଙ୍କୁ ୩ ଦିନ ମଧ୍ୟର କୈଫିୟତ ତଲବ ନ କଲେ ଆଇନ ଅନୁସାରେ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି। ଏପରିକି ଉପସ୍ଥିତ ଚାଷୀଙ୍କୁ ଠିକ୍ ଦରରେ ସାର ବିକ୍ରୟ କରିବା ନେଇ ଅଧିକାରୀମାନେ ନିର୍ଦ୍ଦେଶ ଦେଇଥିଲେ। ବିନା ଲାଇସେନ୍ସରେ ବିହନ ବିକ୍ରେତା ବ୍ରିଦେଶ ମୁଖାର୍ଜୀଙ୍କ ଦୋକାନ ବନ୍ଦ କରାଯିବା ସହ ତାଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଏପରି କି ଅଧିକାରୀମାନେ ସାର ବିକ୍ରେତାଙ୍କଠାରୁ ସଂଗ୍ରହ କରାଯାଇଥିବା ପଟାସ୍ ସାରର ନମୁନା ଭୁବନେଶ୍ୱର ସ୍ଥିତ ପରୀକ୍ଷାଗାରକୁ ପଠାଇଛନ୍ତି।
ଚଢାଉ ବେଳେ ଅନ୍ୟ କେତେଜଣ ଦୋକାନ ବନ୍ଦ କରି ଲୁଚି ପଳାଇ ଥିବା ଜଣାପଡିଛି। ଦୀର୍ଘ ଦିନ ହେଲା ପଦ୍ମପୁର ଅଞ୍ଚଳରେ ୟୁରିଆ ସାର ଅଧିକ ଦରରେ ବିକ୍ରି ହେଉଥିବା ନେଇ ଚାଷୀମାନେ ଅଭିଯୋଗ କରି ଆସୁଥିଲେ। ଅଭିଯୋଗକୁ ଭିତ୍ତି କରି ଏହି ଚଢାଉ କରାଯାଇଥିଲା।
ପର୍ଯ୍ୟାୟ କ୍ରମେ ଅନ୍ୟ ବ୍ଲକରେ ମଧ୍ୟ ଚଢାଉ କରାଯିବ ବୋଲି ଜିଲାସ୍ତରୀୟ ଫର୍ଟିଲାଇଜର ସ୍କ୍ବାର୍ଡ ସଦସ୍ୟ ରବିନ୍ଦ୍ର ନାଥ ସାହୁ ସୂଚନା ଦେଇଛନ୍ତି। ଏହି ଚଢାଉ ପରେ କେନ୍ଦୁଝରର ଡିଲରମାନଙ୍କ ମଧ୍ୟରେ କୋକୁଆ ଭୟ ଖେଳିଯାଇଛି।
ଚଢାଉରେ ସହକାରୀ କୃଷି ନିର୍ଦ୍ଦେଶକ ରବିନ୍ଦ୍ର କୁମାର ସାହୁ, ବ୍ଲକ କୃଷି ଅଧିକାରୀ ସୁଶାନ୍ତ ପଣ୍ଡା, କେନ୍ଦୁଝର ସହକାରୀ କୃଷି ଅଧିକାରୀ ଲକ୍ଷ୍ମୀଦେବୀ ଶର୍ମା, ଏସ୍ଆଇ ହେରଫନା ହଁାସଦା, ଏସ୍ଆଇ ବିଜୟ କୁମାର ଗୋଚ୍ଛାୟତ ପ୍ରମୁଖ ଉପସ୍ଥିତ ଥିଲେ। ଏନେଇ ମୁଖ୍ୟ ଜିଲା କୃଷି ଅଧିକାରୀ ମିହିର କୁମାର ସାହୁ କହିଛନ୍ତି, ଏଭଳି ଚଢାଉ ନିୟମିତ କରାଯାଇ ଲାଇସେନ୍ସ, ଷ୍କକ ଏବଂ ଦର ତାଲିକା ମରାଯାଇଛି କି ନାହିଁ ଯାଞ୍ଚ କରାଯିବ।
