ଚମ୍ପୁଆ,୨୦ା୧(ଡି.ଏନ୍.ଏ): କୃଷି ଓ କୃଷକର ଉନ୍ନତି ପାଇଁ ରାଜ୍ୟ ସରକାର ଏବଂ କେନ୍ଦ୍ର ସରକାର ଅନେକ ଯୋଜନା ପ୍ରଣୟନ କରୁଛନ୍ତି। କୃଷି ଜାତ ଦ୍ରବ୍ୟ ଅମଳ ବୃଦ୍ଧି ନିମନ୍ତେ ଆଧୁନିକ ଯନ୍ତ୍ରପାତି ସବ୍ସିଡ୍ ମାଧ୍ୟମରେ ଚାଷୀଙ୍କୁ ପ୍ରଦାନ କରୁଛନ୍ତି। ମାତ୍ର ଚାଷ ଓ ଚାଷୀଙ୍କୁ ସଫଳତାର ବାଟ ଦେଖାଉଥିବା ଚମ୍ପୁଆ କୃଷି ବିଭାଗରେ କର୍ମଚାରୀ ଅଭାବ କାରଣରୁ ଯୋଜନାର ସଫଳ ରୁପାୟନ ମିଳି ପାରୁନାହିଁ।
ଯେ, ଚମ୍ପୁଆ, ଯୋଡ଼ା, ଝୁମ୍ପୁରା ବ୍ଲକ୍କୁ ନେଇ ଗଠିତ ଉକ୍ତ କୃଷି ଜିଲା ଉପରେ ୬୧ ପଞ୍ଚାୟତର ୪୨୯ଟି ଗାଁର ଚାଷୀ ନିର୍ଭର କରି ଆସୁଛନ୍ତି। ଉଭୟ ରବି ଓ ଖରିପ୍ ଋତୁରେ ଚମ୍ପୁଆ ବ୍ଲକ୍ରେ ୨୧ ହଜାର ୯୫୮ ହେକ୍ଟର, ଝୁମ୍ପୁରା ବ୍ଲକ୍ରେ ୨୩ ହଜାର ୯୫୫ ହେକ୍ଟର ଓ ଯୋଡ଼ା ବ୍ଲକ୍ରେ ୧୩ ହଜାର ୨୭୭ ହେକ୍ଟରକୁ ମିଶାଇ ୫୯୧୯୦ ହେକ୍ଟର ଜମିରେ ଚାଷ କାର୍ଯ୍ୟ କରାଯାଉଛି। ମାତ୍ର ବିଭାଗରେ ୩ ବ୍ଲକ୍ କୃଷି ଅଧିକାରୀ ପଦବୀ ଖାଲି ପଡ଼ିଛି। ସହକାରୀ କୃଷି ଅଧିକାରୀ ୬ ଜଣଙ୍କ ସ୍ଥାନରେ ୫ କାମ କରୁଛନ୍ତି। ସେହିପରି ୧୮ଜଣ କୃଷି ଅଧିଦର୍ଶକ ବଦଳରେ ୧୬ ରହିଥିବା ବେଳେ ଭି.ଏ.ଡବ୍ଲ୍ୟୁ ୨୭ ସ୍ଥାନରେ ୯ ଜଣ କାର୍ଯ୍ୟ କରୁଛନ୍ତି। ସେହିପରି ୧ଟି ସେକ୍ସନ ଅଫିସର ପଦରେ କେହି ନ ଥିବା ବେଳେ ୩ ସିନିୟର ଆସିଷ୍ଟାଣ୍ଡ ପଦବୀରେ ୨ ଜଣ ଅଛନ୍ତି। ଏପରିକି କାର୍ଯ୍ୟାଳୟରେ ଥିବା ସରକାରୀ ଗାଡ଼ି ଦୀର୍ଘ ଦିନରୁ ଅଚଳ ଅବସ୍ଥାରେ ପଡ଼ିରହିଛି। କର୍ମଚାରୀ ଅଭାବ କାରଣରୁ ସରକାରଙ୍କର କାଳିଆ, ବଳିଆ, ଏନଏଫଏସଏମ୍ ସ୍କିମ୍ ପ୍ରୋଗ୍ରାମ ଆଦି କାର୍ଯ୍ୟକୁ ଆଡ୍ଜେଷ୍ଟ କରି କରାଯାଉଥିବା ଜଣାଯାଇଛି। ଏ ନେଇ କୃଷି ଜିଲା ଅଧିକାରୀ ମନୋରଞ୍ଜନ ମଣ୍ଡଳ କହିଛନ୍ତି, କର୍ମଚାରୀ ଅଭାବରୁ କାର୍ଯ୍ୟକ୍ଷେତ୍ରରେ ସମସ୍ୟା ଉପୁଜୁଛି। ଅନ୍ୟ କର୍ମଚାରୀମାନଙ୍କ ଦ୍ୱାରା ଏହାକୁ ସମାପନ କରାଯାଉଥିବା ସେ କହିଥିଲେ।