ଭୁବନେଶ୍ୱର,୧।୧୨(ବ୍ୟୁରୋ): କୃଷି ଓ କୃଷକ ସଶକ୍ତୀକରଣ ବିଭାଗର ୧୪୩ କୋଟି ୬୫ ଲକ୍ଷ ୩୫ ହଜାର ଟଙ୍କା ଏବଂ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗର ୧୪ କୋଟି ୮୧ ଲକ୍ଷ ୫୨ ହଜାର ଟଙ୍କାର ଅତିରିକ୍ତ ଖର୍ଚ୍ଚ ଦାବି ବିଧାନସଭାରେ ଗୃହୀତ ହୋଇଛି । କୃଷିମନ୍ତ୍ରୀଙ୍କ ତରଫରୁ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ ଏହି ଖର୍ଚ୍ଚଦାବିକୁ ବୁଧବାର ଗୃହର ଅନୁମୋଦନ ପାଇଁ ଉପସ୍ଥାପନ କରିଥିଲେ।
ଖର୍ଚ୍ଚଦାବି ଆଲୋଚନା ବେଳେ ବିରୋଧୀ କଂଗ୍ରେସ ଓ ଭାଜପା ସଦସ୍ୟମାନେ ଶିକ୍ଷକ ଆନ୍ଦୋଳନ ନେଇ ବାଚସ୍ପତିଙ୍କ ପୋଡିୟମ ସମ୍ମୁଖରେ ପ୍ରବଳ ହୋହଲ୍ଲା କରିଥିଲେ। ଗୃହର ସୁପରିଚାଳନା ପାଇଁ ବାଚସ୍ପତି ସର୍ବଦଳୀୟ ବୈଠକ ଡାକିଥିଲେ ମଧ୍ୟ ପରିସ୍ଥିତି ସ୍ବାଭାବିକ ହୋଇପାରି ନ ଥିଲା। ପାଟିତୁଣ୍ଡ ମଧ୍ୟରେ ବିଭାଗର ଖର୍ଚ୍ଚଦାବି ଗୃହୀତ ହୋଇଥିଲା।
ହୋହଲ୍ଲା ମଧ୍ୟରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ କହିଛନ୍ତି, ରାଜ୍ୟରେ ଧାନ, ବିରି, ମାଣ୍ଡିଆ ଏବଂ ଡାଲିଜାତୀୟ ଫସଲର ଅମଳ ବୃଦ୍ଧି ପାଇଛି । ମତ୍ସ୍ୟ ଓ ପଶୁପାଳନ କ୍ଷେତ୍ରରେ ଏସ୍ଏଚଜି ମହିଳାମାନଙ୍କୁ ସାମିଲ କରାଯାଇଛି । ୫-ଟି ଓ ମୋ ସରକାର ମାଧ୍ୟମରେ ଚାଷୀମାନଙ୍କୁ ବିହନଠାରୁ ଆରମ୍ଭ କରି ବିଭିନ୍ନ ସେବା ଯୋଗାଇବାରେ ତ୍ୱରିତ ପଦକ୍ଷେପ ନିଆଯାଉଛି। ଏହି ଖର୍ଚ୍ଚଦାବି ଆଲୋଚନାରେ ଭାଗ ନେଇ ଶାସକ ଦଳ ସଭ୍ୟ ଅମର ପ୍ରସାଦ ଶତପଥୀ କହିଛନ୍ତି, କୃଷି ହେଉଛି ଅର୍ଥନୀତିର ଆଧାର । ଓଡ଼ିଶା ପୂର୍ବରୁ ଖାଦ୍ୟଶସ୍ୟ ଆମଦାନୀ କରୁଥିବା ବେଳେ ଏବେ ଉତ୍ପାଦନ କ୍ଷେତ୍ରରେ ବଳକା ରାଜ୍ୟ ଭାବେ ପରିଗଣିତ ହୋଇଛି। ଓଡ଼ିଶା ଖାଦ୍ୟଶସ୍ୟ ଉତ୍ପାଦନ କରି ଅନ୍ୟ ରାଜ୍ୟକୁ କୃଷିଜାତ ସାମଗ୍ରୀ ପଠାଉଛି । ମତ୍ସ୍ୟ ଓ ପ୍ରାଣୀ ସମ୍ପଦ କ୍ଷେତ୍ରରେ ନିଯୁକ୍ତି ସୁଯୋଗ ସୃଷ୍ଟି ହେଉଛି । କୃଷି ଉଦ୍ୟୋଗୀକରଣ ଆବଶ୍ୟକ ଅଛି । ତେଣୁ ମେକ୍ ଇନ୍ ଓଡ଼ିଶା କନ୍କ୍ଲେଭ୍ ଭଳି ପୁଞ୍ଜିନିବେଶ ଆୟୋଜନ ମଧ୍ୟ ଓଡ଼ିଶା କରୁଛି। ରାଜ୍ୟ ସରକାର ଏକାଧିକ କାର୍ଯ୍ୟକ୍ରମ ହାତକୁ ନେଇଛନ୍ତି । ରାଜ୍ୟରେ ଉନ୍ନତ ପ୍ରଣାଳୀରେ ଚାଷ ହେଉଛି । ଆଶାଠାରୁ ଦୁଇଗୁଣ ଉତ୍ପାଦନ ହେଉଛି । ଏହା ସହିତ କାଳିଆ ଓ ବଳିଆ ଯୋଜନାରେ ଓଡ଼ିଶା ଏକମାତ୍ର ରାଜ୍ୟ, ଯେଉଁଠି ଚାଷୀଙ୍କ ଆକାଉଣ୍ଟକୁ ସିଧାସଳଖ ଟଙ୍କା ଦିଆଯାଉଛି । ଓଡ଼ିଶାରୁ ଚାଉଳ ଉତ୍ପାଦନ କରାଯାଇ ପିଡିଏସ୍ ବ୍ୟବସ୍ଥାରେ ଚାଉଳ ପହଞ୍ଚୁଛି। ମିଲେଟ୍ ମିଶନ ମାଧ୍ୟମରେ ଆଦିବାସୀମାନଙ୍କର ମାଣ୍ଡିଆ ଚାଷକୁ ମୂଲ୍ୟଯୁକ୍ତ ଓ ବଜାର ଆଭିମୁଖ୍ୟ କରାଯାଇଛି ବୋଲି ସେ କହିଛନ୍ତି।