ଭୁବନେଶ୍ୱର,୨୮।୩: ବହୁ ରାଷ୍ଟ୍ରୀୟ ସାମାଜିକ ପ୍ରତିଷ୍ଠାନ ୱାଲ୍ମାର୍ଟ ଫାଉଣ୍ଡେଶନ ପକ୍ଷରୁ ଏକ ୫ ବର୍ଷିଆ କୃଷି ରଣନୀତି ସମ୍ପର୍କରେ ଘୋଷଣା କରାଯାଇଛି। ବିଶେଷ କରି କୃଷକମାନଙ୍କ ଜୀବିକା ଉନ୍ନତ କରିବା ପ୍ରତି ଫାଉଣ୍ଡେଶନ ନିଜର ପ୍ରତିବଦ୍ଧତାକୁ ବିସ୍ତାର କରିବ, ଯାହା ସର୍ବନିମ୍ନ ୫୦% ମହିଳାଙ୍କ ସମେତ ୨୦୨୮ ସୁଦ୍ଧା ୧୦ ଲକ୍ଷ କ୍ଷୁଦ୍ରଚାଷୀଙ୍କ ନିକଟରେ ପହଞ୍ଚିବାକୁ ଲକ୍ଷ୍ୟ ରଖିଛି। ଏପରିକି ଦେଶର ପ୍ରମୁଖ କୃଷିଭିତ୍ତିକ ରାଜ୍ୟ ଉତ୍ତରପ୍ରଦେଶ, କର୍ନାଟକ, ପଶ୍ଚିମବଙ୍ଗ, ମହାରାଷ୍ଟ୍ର, ଆନ୍ଧ୍ରପ୍ରଦେଶ ଓ ଓଡ଼ିଶା ଭଳି ରାଜ୍ୟରେ ଚାଷୀମାନଙ୍କ ଆୟ ବୃଦ୍ଧି କରିବା ଲକ୍ଷ୍ୟ ସହିତ କୃଷି ବର୍ଗୀକରଣ ଓ ଏକୀକରଣ କ୍ଷେତ୍ରରେ କାର୍ଯ୍ୟରତ ଅଣଲାଭକାରୀ ସଂସ୍ଥାଗୁଡିକୁ ଆବଶ୍ୟକ ପରିମାଣର ଅନୁଦାନ ପ୍ରଦାନ କରାଯିବ। ସେହିଭଳି ୱାଲ୍ମାର୍ଟ ଫାଉଣ୍ଡେଶନ ଅନୁଦାନ ଫାର୍ମର ପ୍ରଡ୍ୟୁସର ଅର୍ଗାନାଇଜେଶନ (ଏଫ୍ପିଓ) ଗୁଡିକ ପାଇଁ କ୍ଷମତା ନିର୍ମାଣରେ ସହଯୋଗ କରିବା, ବଜାର ସଂଯୋଗ ପାଇଁ ପହଞ୍ଚକୁ ବିସ୍ତାର କରିବା ପାଇଁ ସ୍ଥାନୀୟ ଅନୁଦାନଗ୍ରାହୀଙ୍କୁ ସକ୍ଷମ କରିବା ଉପରେ ଗୁରୁତ୍ୱ ଦେବ। ଫାଉଣ୍ଡେଶନର ୫ ବର୍ଷିଆ ରଣନୀତି ସମେତ ଦୁଇଟି ନୂଆ ଅନୁଦାନର ଘୋଷଣା ମଧ୍ୟ କରାଯାଇଛି।
ଏ ସମ୍ପର୍କରେ କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ନରେନ୍ଦ୍ର ସିଂହ ତୋମାର କହିଛନ୍ତି, କୃଷି ଭାରତୀୟ ଅର୍ଥନୀତିର ମେରୁଦଣ୍ଡ ଏବଂ କ୍ଷୁଦ୍ରଚାଷୀଙ୍କ କଲ୍ୟାଣ ଭାରତ ସରକାରଙ୍କ ଶୀର୍ଷ ପ୍ରାଥମିକତା ମଧ୍ୟରୁ ଅନ୍ୟତମ। ୱାଲ୍ମାର୍ଟ ଫାଉଣ୍ଡେଶନର ଅଧ୍ୟକ୍ଷ କ୍ୟାଥ୍ଲିନ୍ ମ୍ୟାକ୍ଲାଫ୍ଲିନ୍ କହିଛନ୍ତି, ଭାରତରେ କ୍ଷୁଦ୍ରଚାଷୀଙ୍କ ପାଇଁ ବଜାର ପହଞ୍ଚକୁ ବିସ୍ତାର କରିବା ନେଇ ୱାଲ୍ମାର୍ଟ ଫାଉଣ୍ଡେଶନର ପ୍ରତିବଦ୍ଧତା, ସମସ୍ତ ହିତାଧିକାରୀଙ୍କ ପାଇଁ ମିଳିତ ମୂଲ୍ୟ ସୃଷ୍ଟି କରିବାରେ ସାହାଯ୍ୟ କରିପାରୁଥିବା ସମାଧାନଗୁଡିକୁ ଚିହ୍ନଟ କରିବା ନେଇ ଆମର ପ୍ରୟାସ ଉପରେ ନିର୍ମିତ ହୋଇଛି।