ଅଗରତାଲା,୮।୧୧ : ଆସନ୍ତା ବର୍ଷ ତ୍ରିପୁରାରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହା ପୂର୍ବରୁ ରାଜ୍ୟରେ ଭାଜପା ମେଣ୍ଟକୁ ଝଟ୍କା ଲାଗିଛି। ଭାଜପାର ସହଯୋଗୀ ଇଣ୍ଡିଜେନ୍ସ ପିପୁଲ୍ସ ଫ୍ରଣ୍ଟ ଅଫ ତ୍ରିପୁରା (ଆଇପିଏଫଟି) ଏକ ବଡ଼ ଅସୁବିଧାର ସମ୍ମୁଖୀନ ହୋଇଛି। ଆଇପିଏଫଟିର ବରିଷ୍ଠ ସଦସ୍ୟ ତଥା ଆଶାରାମବାଡି ବିଧାୟକ ମେୱାର କୁମାର ଜମାଟିଆ ବିଧାୟକ ପଦରୁ ଇସ୍ତଫା ଦେଇଛନ୍ତି। ମଙ୍ଗଳବାର ଜମାଟିଆ ତ୍ରିପୁରା ବିଧାନସଭା ବାଚସ୍ପତି ରତନ ଚକ୍ରବର୍ତ୍ତୀଙ୍କ ନିକଟରେ ଇସ୍ତଫା ପତ୍ର ଦାଖଲ କରିଛନ୍ତି। ସେ ଏବେ ଟିଆଇପିଆରଏରେ ଯୋଗଦେବାର ସମ୍ଭାବନା ରହିଛି।
ମେୱାର କୁମାର ଜମାଟିଆ ବିଧାୟକ ପଦରୁଙ୍କ ଇସ୍ତଫା ଦେବା ସହିତ ତ୍ରିପୁରା ବିଧାନସଭାରେ ଆଇପିଏଫଟି ସଂଖ୍ୟା ମାତ୍ର ପାଞ୍ଚକୁ ଖସି ଆସିଛି। ଏହାପୂର୍ବରୁ ଆଇପିଏଫଟି ନେତା ଧନଞ୍ଜୟ ତ୍ରିପୁରା ମଧ୍ୟ ବିଧାୟକ ପଦରୁ ଇସ୍ତଫା ଦେଇ ଟିଆଇପିଆରଏରେ ଯୋଗ ଦେଇଥିଲେ। ସେପ୍ଟେମ୍ବର ମାସରେ ଭାଜପା ନେତା ବାରବା ମୋହନ ତ୍ରିପୁରା ମଧ୍ୟ ବିଧାୟକ ପଦରୁ ଇସ୍ତଫା ଦେଇ ଟିଆଇପିଆରଏରେ ଯୋଗ ଦେଇଥିଲେ। ତ୍ରିପୁରାରେ ଭାଜପା-ଆଇପିଏଫଟି ଶାସକ ଦଳ ଛାଡିବାରେ ପାଇଁ ଜମାଟିଆ ହେଉଛନ୍ତି ସପ୍ତମ ବିଧାୟକ।