ଅହମ୍ମଦାବାଦ: ଦୁନିଆରେ ଏପରି ଅନେକ ପରିବାର ଅଛନ୍ତି ଯେଉଁମାନେ ଘରେ ପାଳିଥିବା ପଶୁମାନଙ୍କୁ ପରିବାରର ସଦସ୍ୟ ବୋଲି ମନେ କରନ୍ତି। ସେମାନେ ତାଙ୍କର ପ୍ରତ୍ୟେକ ଦିନକୁ ସ୍ବତନ୍ତ୍ର କରିବା ଲାଗି କିଛି ବି କରିବାକ ଦ୍ୱିଧା କରନ୍ତି ନାହିଁ। ଏବେ ଅହମ୍ମଦାବାଦର ଏକ ପରିବାର ଏହିପରି କାରଣକୁ ନେଇ ଚର୍ଚ୍ଚାରେ ରହିଛି। ସେମାନେ ପୋଷା କୁକୁର ‘ଏବି’ର ଜନ୍ମଦିନ ପାଇଁ ୭ ଲକ୍ଷ ଟଙ୍କା ଖର୍ଚ୍ଚ କରି ଭବ୍ୟ ପାର୍ଟିର ଆୟୋଜନ କରିଥିଲେ। ଏହାର ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ପୋଲିସ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଦିନକୁ ଦିନ କରୋନା ସଂକ୍ରମଣ ବୃଦ୍ଧି ପାଉଥିବା ବେଳେ କୁକୁର ଜନ୍ମଦିନ ପାଳିବାକୁ ଯାଇ କୋଭିଡ୍ କଟକଣା ଉଲ୍ଲଂଘନ କରାଯାଇଥିବା ପୋଲିସ କହିଛି। ଏହି ମାମଲାରେ ୩ଜଣଙ୍କୁ ଗିରଫ ମଧ୍ୟ କରାଯାଇଛି।
ଗୁଜରାଟର ଅହମ୍ମଦାବାଦ ଅନ୍ତର୍ଗତ ନିକୋଲ ଅଞ୍ଚଳରେ ପୋଷା କୁକୁର ‘ଏବି’ର ଜନ୍ମଦିନ ବେଶ ଆଡମ୍ବର ସହ ପାଳନ କରାଯାଇଥିଲା। ସାଜସଜ୍ଜା ଦେଖି ଏଥିରେ ଯୋଗ ଦେବାକୁ ଆସିଥିବା ଅତିଥିମାନଙ୍କ ହୋସ ଉଡିଯାଇଥିଲା। ଏହି ପାର୍ଟି ପାଇଁ ପ୍ରସିଦ୍ଧ ‘ମଧୁବନ ଗ୍ରିନ’ରେ ବିରାଟ ପ୍ଲଟ୍ ବୁକ୍ କରାଯାଇଥିଲା। ସେଥିରେ ସୁସଜ୍ଜିତ ଟେଣ୍ଟ (ତମ୍ବୁ) ଟଣାଯାଇ କୁକୁର ଏବିର ବଡ ବଡ ପୋଷ୍ଟର୍ ସବୁ ଲଗାଯାଇଥିଲା। ସେପଟେ ପାର୍ଟିର ମୁଖ୍ୟ ଆକର୍ଷଣ ପାଲଟିଥିବା କୁକୁର ମଧ୍ୟ ବେଶ ନିଆରା ଢଙ୍ଗରେ ସଜେଇ ହୋଇଥିଲା। ଜନ୍ମଦିନ ପାଳନ ଉପଲକ୍ଷେ ଆବି ଗୋଟାଏ କଳା ଗାଉନ ଏବଂ ଖଣ୍ଡେ ମଫଲର ପିନ୍ଧିଥିଲା ।
କୁକୁରର ଜନ୍ମଦିନ ପାର୍ଟିର ଭୋଜି ମଧ୍ୟ ଥିଲା ଖୁବ ବ୍ୟୟବହୁଳ ଏବଂ ସ୍ମରଣୀୟ। ଏସବୁ ଆୟୋଜନ ଗୋଟାଏ କୁକୁରର ଜନ୍ମଦିନ ପାଇଁ ହେଉଛି ଜାଣି ଅନେକେ ଲୋକେ ଚକିତ ହୋଇପଡିଥିଲେ। ଏତେ ବଡ ଗ୍ରାଣ୍ଡ ପାର୍ଟି ପାଇଁ କୁକୁରର ମାଲିକ ପାଖାପାଖି ୭ ଲକ୍ଷ ଟଙ୍କା ଖର୍ଚ୍ଚ କରିଥିଲେ। ଏହି ଘଟଣାର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା। ଭାଇରାଲ ହେବା ପରେ ପୁଲିସ ଆକ୍ସନ ମୋଡ୍କୁ ଆସିଛି। ଏହି ପାର୍ଟିରେ ଯୋଗଦେଇଥିବା ଅନେକ ବ୍ୟକ୍ତି ମାସ୍କ ପିନ୍ଧି ନଥିବା ଜାଣିବା ପରେ ପୁଲିସ ମହାମାରୀ ଆକ୍ଟ ଅନୁଯାୟୀ ୩ ଜଣଙ୍କୁ ଗିରଫ କରି ତଦନ୍ତ କରିଛି।