ଅହମ୍ମଦାବାଦ,୧୩।୧୦: ଶନିବାର ଭାରତ ଏବଂ ପାକିସ୍ତାନ ମଧ୍ୟରେ ବିଶ୍ୱକପ୍ ମ୍ୟାଚ ଖେଳାଯିବ। ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଉଭୟ ଦଳ ମୁହାଁମୁହିଁ ହେବେ। ଦିନିକିଆ ବିଶ୍ୱକପ୍ରେ ବର୍ତ୍ତମାନର ସଂସ୍କରଣରେ ଉଭୟ ଦଳର ଫର୍ମ ଉତ୍କୃଷ୍ଟ ରହିଛି। ଅଷ୍ଟ୍ରେଲିଆ ଏବଂ ଆଫଗାନିସ୍ତାନ ବିପକ୍ଷରେ ଭାରତ ବିଜୟ ହାସଲ କରିଛି। ଏଥି ସହିତ ପାକିସ୍ତାନ ନେଦରଲ୍ୟାଣ୍ଡ ଏବଂ ଶ୍ରୀଲଙ୍କାକୁ ପରାସ୍ତ କରିଛି। ବର୍ତ୍ତମାନ ରୋହିତ ଶର୍ମା ଏବଂ ବାବର ଆଜମ ନଜର ବିଜୟ ଉପରେ ରହିବ। ମ୍ୟାଚକୁ ନେଇ ପ୍ରଶଂସକମାନେ ଉତ୍ସାହ ଅଛନ୍ତି। ଏହି ସମୟରେ ପାଗକୁ ନେଇ ବଡ ଖବର ଆସିଛି।
ସୂଚନାଯୋଗ୍ୟ, ମ୍ୟାଚ ସମୟରେ ଷ୍ଟାଡିୟମରେ ଏକ ଲକ୍ଷରୁ ଅଧିକ ଦର୍ଶକ ଉପସ୍ଥିତ ରହିପାରନ୍ତି। ହେଲେ ସମସ୍ତଙ୍କ ଉତ୍ସାହକୁ ବର୍ଷା ନଷ୍ଟ କରିପାରେ। ଏହି ମ୍ୟାଚ ସମୟରେ ଅହମ୍ମଦାବାଦ ସହର ଏବଂ ଉତ୍ତର ଗୁଜରାଟରେ ହାଲୁକା ବର୍ଷା ହେବାର ପୂର୍ବାନୁମାନ କରିଛି ଭାରତ ପାଣିପାଗ ବିଭାଗ (ଆଇଏମଡି)।
ଆଇଏମଡି ସୂଚନା ଅନୁଯାୟୀ, ଅକ୍ଟୋବର ୧୪ଏବଂ ୧୪ରେ ଉତ୍ତର ଗୁଜରାଟ ଏବଂ ଅହମ୍ମଦାବାଦର କିଛି ଅଂଶରେ ହାଲୁକା ବର୍ଷା ହୋଇପାରେ। ପାଣିପାଗ ବିଭାଗ କହିଛି, ଆସନ୍ତା ପାଞ୍ଚ ଦିନ ମଧ୍ୟରେ ଗୁଜରାଟରେ ପାଗ ଶୁଖିଲା ରହିବ ବୋଲି ଆଶା କରାଯାଉଛି। ଅହମ୍ମଦାବାଦର ପାଣିପାଗ କେନ୍ଦ୍ରର ନିର୍ଦ୍ଦେଶକ ମନୋରାମା ମହାନ୍ତି କହିଛନ୍ତି, ଆକାଶ ମେଘୁଆ ରହିବ। ପରଦିନ ଅହମ୍ମଦାବାଦ ଏବଂ ଅନ୍ୟ ଉତ୍ତର ଜିଲାରେ ହାଲୁକା ବର୍ଷା ହୋଇପାରେ।