ନୂଆଦିଲ୍ଲୀ,୧୨ା୭(ପି.ଟି.): ଦିଲ୍ଲୀ ଏମ୍ସର ଜଣେ ୨୫ ବର୍ଷୀୟ ଜୁନିୟର ଡାକ୍ତର ରହୁଥିବା ହଷ୍ଟେଲର ଦଶମ ମହଲାରୁ ଡେଇଁ ଶୁକ୍ରବାର ଆତ୍ମହତ୍ୟା କରିଛନ୍ତି। ଅନୁରାଗ କୁମାର ନାମକ ଏହି ଜୁନିୟର ଡାକ୍ତର ମାନସିକ ଚିକିତ୍ସା ବିଭାଗରେ ପିଜି କରୁଥିଲେ। ତେବେ ସେ ୮ ମାସ ହେଲା ମାନସିକ ବିଷାଦ ମଧ୍ୟରେ ରହିଥିଲେ ବୋଲି କୁହାଯାଉଛି। ଡାକ୍ତରମାନେ ରହୁଥିବା ହଷ୍ଟେଲର ଦଶମ ମହଲାରୁ ଡେଇଁପଡିବା ପରେ ଗୁରୁତର ଅବସ୍ଥାରେ ତାଙ୍କୁ ଏମ୍ସ ଆଶୁ ଚିକିତ୍ସା ବିଭାଗରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କର ମୃତ୍ୟୁ ଘଟିଥିଲା ବୋଲି ଡିସିପି ଅତୁଲ କୁମାର ଠାକୁର କହିଛନ୍ତି। ସେ ତାଙ୍କ ମାନସିକ ଅବସାଦ ସମ୍ପର୍କରେ ଜୁନ୍ ୨୧ରେ ନିଜ ବ୍ଲଗ୍ରେ ଲେଖି ଶେୟାର କରିଥିଲେ। ଫେବୃୟାରୀଠାରୁ ତାଙ୍କ ମନରେ ଆତ୍ମହତ୍ୟା ପ୍ରବଣତା ସୃଷ୍ଟି ହୋଇଥିଲା ଓ ସେ ବିକଳ୍ପ ସନ୍ଧାନରେ ଥିଲେ।
