ନୂଆଦିଲ୍ଲୀ, ୨୦।୯ : ଆମର ପଡୋଶୀ ଦେଶଗୁଡିକରେ ସୁରକ୍ଷା ପରିବେଶ ନାହିଁ। ଏଭଳି ପରିସ୍ଥିତିରେ ଆମେ ସବୁବେଳେ ହାଇବ୍ରିଡ ଯୁଦ୍ଧ ପାଇଁ ପ୍ରସ୍ତୁତ ରହିବା ଉଚିତ ବୋଲି ଭାରତୀୟ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶଲ ବିବେକ ରାମ ଚୌଧୁରୀ ମଙ୍ଗଳବାର କହିଛନ୍ତି। ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ଦେଶ ଅନେକ ବିପଦର ସମ୍ମୁଖୀନ ହେଉଛି, ହାଇବ୍ରିଡ ଯୁଦ୍ଧରେ ବିଶେଷଜ୍ଞ ହେବା ଏକ ବଡ ଆହ୍ବାନ। ଦେଶ ଏଭଳି ଯୁଦ୍ଧ ପାଇଁ ପ୍ରସ୍ତୁତ ହେବା ଉଚିତ ବୋଲି ସେ ଚେତାବନୀ ଦେଇଛନ୍ତି। ରାଜଧାନୀ ଦିଲ୍ଲୀର ଇଣ୍ଡିଆ ଡିଫେନ୍ସ କନକ୍ଲେଭରେ ଯୋଗ ଦେଇ ସେ ଏସମ୍ପର୍କରେ ସୂଚନା ପ୍ରଦାନ କରିଛନ୍ତି।
ସେ ଦର୍ଶାଇଛନ୍ତି ଯେ ଦ୍ରୁତ ଅଥନୈତିକ ଅଭିବୃଦ୍ଧି ଦେଶଗୁଡ଼ିକୁ ସାମରିକ ପ୍ରଯୁକ୍ତିବିଦ୍ୟା ଏବଂ ସହଯୋଗୀ ଅନୁସନ୍ଧାନ ଏବଂ ବିକାଶରେ ବିପୁଳ ପରିମାଣର ବିନିଯୋଗ କରିବାକୁ ଏକ ସୁଯୋଗ ସୃଷ୍ଟି କରିଛି। ତେଣୁ ଅର୍ଥନୈତିକ, ବୈଷୟିକ ଏବଂ ସାମରିକ କ୍ଷେତ୍ରରେ ଦୁର୍ବଳ ସ୍ଥାନକୁ ସୁଦୃଢ଼ କରିବାର ଆବଶ୍ୟକତା ରହିଛି।
ସ୍ଥିରତା, ଅନ୍ତର୍ଭୁକ୍ତିକରଣ, ଅର୍ଥନୈତିକ ଅଭିବୃଦ୍ଧି ଏବଂ ନିରାପତ୍ତା ଲକ୍ଷ୍ୟ ସହିତ ଭାରତ ଦାୟିତ୍ୱବୋଧ ଭାବେ କାର୍ଯ୍ୟ କରିବା ପାଇଁ ପ୍ରତିବଦ୍ଧ। ସେ କହିଛନ୍ତି ଯେ ବର୍ତ୍ତମାନର ରାଜନୈତିକ ସ୍ଥିତିକୁ ଦୃଷ୍ଟିରେ ରଖି ଭାରତୀୟ ବାୟୁସେନା ପାଇଁ ପାରମ୍ପାରିକ, ଉପ-ପାରମ୍ପାରିକ ତଥା ଅଣ-ପାରମ୍ପାରିକ ଡୋମେନରେ ଏହାର ଦକ୍ଷତା ବୃଦ୍ଧି କରିବା ଜରୁରୀ।