ଭୋପାଳ,୨୮।୧ : ମଧ୍ୟପ୍ରଦେଶର ମୋରେନାଠାରେ ଏକ ଭୟଙ୍କର ଦୁର୍ଘଟଣାରେ ଦୁଇଟି ବାୟୁସେନା ଯୁଦ୍ଧ ବିମାନ ସୁଖୋଇ ୩୦ ଏବଂ ମିରାଜ ୨୦୦୦ ଦୁର୍ଘଟଣାଗ୍ରସ୍ତ ହୋଇଛି। ଉଭୟ ବିମାନ ଗ୍ବାଲିଅର ଏୟାରବେସରୁ ଉଡ଼ାଣ କରିଥିବା ଅଭ୍ୟାସ ବିମାନ ଥିଲା। ଦୁର୍ଘଟଣାର କାରଣ ଏପର୍ଯ୍ୟନ୍ତ ଜଣା ପଡିନାହିଁ। ଅନୁସନ୍ଧାନ ପରେ ଜଣାପଡିବ। ମିଡିଆ ରିପୋର୍ଟ ଅନୁଯାୟୀ, ଦୁର୍ଘଟଣା ସମୟରେ ସୁଖୋଇ ୩୦ ରେ ଦୁଇଜଣ ପାଇଲଟ ଏବଂ ମିରାଜ ୨୦୦୦ ରେ ଜଣେ ପାଇଲଟ ଥିଲେ।
ରିପୋର୍ଟ ଅନୁଯାୟୀ, ଦୁଇ ପାଇଲଟ ସୁରକ୍ଷିତ ଅଛନ୍ତି ଏବଂ ତୃତୀୟ ପାଇଲଟ ଶହୀଦ ହୋଇଛନ୍ତି। ଏହି ଦୁର୍ଘଟଣାର ତଦନ୍ତ ପାଇଁ ବାୟୁସେନା ଏକ କୋର୍ଟ ଅଫ ଇନକ୍ୱାରୀକୁ ନିର୍ଦ୍ଦେଶ ଦେଇଛନ୍ତି। ଏହି ଦୁର୍ଘଟଣା ଭାରତୀୟ ବାୟୁସେନା ପାଇଁ ଏକ ବଡ କ୍ଷତି ବୋଲି ବିବେଚନା କରାଯାଉଛି।
ସୂଚନାଯୋଗ୍ୟ,ଗୋଟିଏ ସୁଖୋଇ ୩୦ଏମ୍କେଆଇ ବିମାନର ମୂଲ୍ୟ ପ୍ରାୟ ୬୧ ନିୟୁତ ଡଲାର ଥିବାବେଳେ
ମିରାଜ ୨୦୦୦ ଯୁଦ୍ଧ ବିମାନର ମୂଲ୍ୟ ପ୍ରାୟ ୧୬୭ କୋଟି ଟଙ୍କା ରହିଛି।
