ଭଦୋଦରା, ୩୧ା୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଗୁଜରାଟର ଭଦୋଦରାରେ ଏୟାରବସ୍, ଟାଟା କନର୍ସୋଟିୟମ ଅଫ୍ ଟାଟା ଆଡଭାନ୍ସଡ ସିଷ୍ଟମ ଲିଃ (ଟିଏଏସ୍ଏଲ୍) ଏବଂ ଟିଏଏସ୍ଏଲ୍ ନେତୃତ୍ୱରେ ଟାଟା କନ୍ସଲ୍ଟାଣ୍ଟ ସର୍ଭିସ୍ (ଟିସିଏସ୍)ର ମିଳିତ ଉତ୍ପାଦନ ୟୁନିଟ୍ର ଶିଳାନ୍ୟାସ କରିଛନ୍ତି। ଏଥିରେ ଦେଶର ପ୍ରଥମ ସାମରିକ ପରିବହନ ଏୟାରକ୍ରାଫ୍ଟ ସି-୨୯୫ ଉତ୍ପାଦନ ୟୁନିଟ୍ ମଧ୍ୟ ରହିଛି। ପ୍ରଥମ କରି ୟୁରୋପ ବାହାରେ ଏବଂ କୌଣସି ଘରୋଇ କମ୍ପାନୀ ଦ୍ୱାରା ସି-୨୯୫ ଏୟାରକ୍ରାଫ୍ଟ ନିର୍ମାଣ ହେବାକୁ ଯାଉଛି। ଏହି ପ୍ରୋଜେକ୍ଟ ପାଇଁ ୨୧,୯୩୫ କୋଟି ଟଙ୍କା ବଜେଟ ରହିଛି।
ଅବସରରେ ପ୍ରଧାନମନ୍ତ୍ରୀ ମୋଦି କହିଥିଲେ, ଟ୍ରାନ୍ସପୋର୍ଟ ଏୟାରକ୍ରାଫ୍ଟ ଉତ୍ପାଦନ କେବଳ ଦେଶର ବାୟୁସେନାର ଶକ୍ତି ବୃଦ୍ଧି କରିବ ନାହିଁ, ଏହି ବିମାନ ନିର୍ମାଣର ଏକ ନୂଆ ଇକୋସିଷ୍ଟମ ସୃଷ୍ଟି କରିବ। ଖୁବଶୀଘ୍ର ଭାରତ ଯାତ୍ରୀବାହୀ ବିମାନ ମଧ୍ୟ ନିର୍ମାଣ କରିବ ଯେଉଁଥିରେ ‘ମେକ୍ ଇନ୍ ଇଣ୍ଡିଆ’ ଟ୍ୟାଗ୍ ରହିବ। ଏବେ ଭାରତ ବିମାନ ଚଳାଚଳ କ୍ଷେତ୍ରରେ ଦ୍ରୁତ ଅଭିବୃଦ୍ଧି କରୁଛି। ଆସନ୍ତା ୧୦ରୁ ୧୫ ବର୍ଷରେ ଭାରତ ୨ ହଜାରରୁ ଊର୍ଦ୍ଧ୍ୱ ଯାତ୍ରୀବାହୀ ଏବଂ କାର୍ଗୋ ଏୟାରକ୍ରାଫ୍ଟ ଆବଶ୍ୟକ କରିବ। ଆମେ କେତେ ଦ୍ରୁତଗତିରେ ବିକାଶ କରୁଛୁ ତାହା ଏଥିରୁ ପ୍ରତିଫଳିତ ହେଉଛି ବୋଲି ମୋଦି କହିଥିଲେ। ଉକ୍ତ ପ୍ରୋଜେକ୍ଟରେ ୭ ରାଜ୍ୟର ଶହେରୁ ଅଧିକ ଅଣୁ, କ୍ଷୁଦ୍ର ଏବ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) ଯୋଡ଼ିହେବେ। ୨୦୨୬ ସେପ୍ଟେମ୍ବରରେ ଭାରତରେ ପ୍ରଥମ ବିମାନ ନିର୍ମାଣ ଶେଷ ହୋଇସାରିଥିବ ବୋଲି କୁହାଯାଇଛି। ୨୦୩୧ ଅଗଷ୍ଟ ସୁଦ୍ଧା ଆଉ ୩୯ଟି ନିର୍ମାଣ ସରିବ। ପ୍ରତିବର୍ଷ ଏହି ୟୁନିଟ୍ରୁ ୮ ଏୟାରକ୍ରାଫ୍ଟ ନିର୍ମାଣ ପାଇଁ ଲକ୍ଷ୍ୟ ରଖାଯାଇଛି।
ସି-୨୯୫ର ବିଶେଷତ୍ୱ
ସ୍ପେନ୍ର କନ୍ଷ୍ଟ୍ରକିଓନେସ୍ ଏରୋନଟିକ୍ସ ଏସ୍ଏ କମ୍ପାନୀ ପ୍ରଥମେ ସି-୨୯୫ ବିମାନ ନିର୍ମାଣ କରିଥିଲା। ଏହି କମ୍ପାନୀ ଏବେ ଏୟାରବସ୍ର ଅଂଶ ଏବଂ ସ୍ପେନ୍ରେ ଥିବା ଏୟାରବସ୍ ପ୍ଲାଣ୍ଟ୍ରେ ସି-୨୯୫ ବିମାନ ନିର୍ମାଣ ହେଉଛି। ୨୦୨୧ ସେପ୍ଟେମ୍ବରରେ ଭାରତ ଏୟାରବସ୍ ଡିଫେନ୍ସ ଏବଂ ସ୍ପେସ୍ ସହ ୨୧,୯୩୫ କୋଟି ଟଙ୍କାରେ ୫୬ ଏୟାରକ୍ରାଫ୍ଟ ନିର୍ମାଣ ପାଇଁ ଚୁକ୍ତି କରିଥିଲା। ସି-୨୯୫ ବିମାନକୁ ଆଉ ୩୪ଟି ଦେଶ ମଧ୍ୟ ବ୍ୟବହାର କରିଥାନ୍ତି। ଏହି ଏୟାରକ୍ରାଫ୍ଟ ଘଣ୍ଟାପ୍ରତି ୪୮୦ କିଲୋମିଟର ବେଗରେ ଉଡ଼ିପାରିବ। ଏଥିରେ ଏକସଙ୍ଗରେ ୭୧ ଯାତ୍ରୀ କିମ୍ବା ୪୪ ପାରାଟ୍ରୁପର୍ସ କିମ୍ବା ୨୪ ସ୍କେଚର୍ସ ଯାଇପାରିବେ। ଏହା ୫ରୁ ୧୦ ଟନ୍ ଓଜନ ପରିବହନ କରିପାରିବ। ଏହା ଶର୍ଟ ଟେକ୍ଅଫ୍ ଏବଂ ଲ୍ୟାଣ୍ଡିଂ ମଧ୍ୟ କରିପାରିବ।