ନୂଆଦିଲ୍ଲୀ,୨୭ ।୨: ରୁଷିଆ-ୟୁକ୍ରେନ୍ ଯୁଦ୍ଧ ଭିତରେ ଫସି ରହିଥିବା ଭାରତୀୟଙ୍କୁ ଉଦ୍ଧାର କରିବା କାର୍ଯ୍ୟ କେନ୍ଦ୍ର ସରକାରଙ୍କ ପକ୍ଷରୁ ଜାରି ରହିଛି । ରବିବାର ଭୋର ପ୍ରାୟ ୨ଟା ୪୫ରେ ରୋମାନିଆର ବୁକାରେଷ୍ଟରୁ ବାହାରି ଏୟାର ଇଣ୍ଡିଆର ଦ୍ୱିତୀୟ ବିମାନ ନୂଆଦିଲ୍ଲୀରେ ପହଞ୍ଚିଛି । ବିମାନଟି ପହଞ୍ଚିବା ପରେ ଏଥିରେ ଥିବା ୨୫୦ ଭାରତୀୟଙ୍କୁ କେନ୍ଦ୍ର ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ସ୍ୱାଗତ ଜଣାଇଛନ୍ତି । ତେବେ ବିମାନଟି ଲ୍ୟାଣ୍ଡ କରିବା ପରେ ନିଜେ ସିନ୍ଧିଆ ବିମାନ ମଧ୍ୟକୁ ଯାଇ ଯାତ୍ରୀଙ୍କୁ ଗୋଲାପ ଫୁଲ ଦେଇ ସ୍ୱାଗତ କରିଥିଲେ । ଏହାସହ ସେ କହିଥିଲେ ୟୁକ୍ରେନରେ ଫସିଥିବା ସମସ୍ତ ଭାରତୀୟଙ୍କୁ ଜଣ ଜଣ କରି ସେ ସ୍ୱଦେଶ ଫରାଇ ଆଣିବାର ଗ୍ୟାରେଣ୍ଟି ଦେଉଛନ୍ତି । ଏ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟୁକ୍ରେନ ଓ ରୁଷିଆ ରାଷ୍ଟ୍ରପତିଙ୍କ ସହ କଥା ବି ହୋଇଛନ୍ତି । ଯେପର୍ଯ୍ୟନ୍ତ ୟୁକ୍ରେନରେ ଫସି ରହିଥିବା ପ୍ରତିଟି ଭାରତୀୟ ସ୍ୱଦେଶ ଫେରି ନାହାନ୍ତି ସେପର୍ଯ୍ୟନ୍ତ ମାଦି ସରକାର ଆଶ୍ୱସ୍ତ ହେବେ ନାହିଁ ବୋଲି ସେ କହିଛନ୍ତି । ସୂଚନାଯୋଗ୍ୟ, ୟୁକ୍ରେନରେ ଯୁଦ୍ଧ ଯୋଗୁ ଫସି ରହିଥିବା ଭାରତୀୟମାନେ ବସ ଯୋଗେ ହଙ୍ଗେରୀ ଓ ରୋମାନିଆ ଆସିବା ପରେ ସେମାନଙ୍କୁ ଏୟର ଇଣ୍ଡିଆର ସ୍ୱତନ୍ତ୍ର ବିମାନ ଯୋଗେ ସ୍ୱଦେଶ ଆଣିବାର ବ୍ୟବସ୍ଥା କରାଯାଇଛି ।