ନୂଆଦିଲ୍ଲୀ,୮।୮: କୋଭିଡ କଟକଣା ଓ ଅନ୍ୟାନ୍ୟ କାରଣ ପାଇଁ ଏୟାର ଇଣ୍ଡିଆ ସଞ୍ଚାଳନରୁ ବାହାରେ ଥିବା ୧୦ ବୃହତ୍ ବିମାନଙ୍କୁ ପୁଣି ଥରେ ସେବାରେ ନିୟୋଜିତ କରାଯିବ ବୋଲି ରବିବାର କମ୍ପାନୀ ପକ୍ଷରୁ ଘୋଷଣା କରାଯାଇଛି। ଏପରିକି ୨୦୨୩ ପୂର୍ବରୁ କିମ୍ବା ପ୍ରାରମ୍ଭରୁ କମ୍ପାନୀ ଉକ୍ତ ବୃହତ୍ ବିମାନକୁ ପୁଣି ଥରେ ସେବାରେ ସାମିଲ କରିବେ ବୋଲି ଜଣାପଡିଛି। ସେହିଭଳି ଭାରତରେ କମ୍ପାନୀର ବୃହତ୍ ନେଟୱର୍କ ରହିଛି, ସାରା ଦେଶରେ ୩୦ରୁ ଅଧିକ ବିମାନ ଉଡ଼ାଣ କରୁଥିବାବେଳେ ସଞ୍ଚାଳନରୁ ବାହାରେ ଥିବା କମ୍ପାନୀର ୧୦ ବୃହତ୍ ବିମାନକୁ ପୁଣିଥରେ ଯାତ୍ରୀ ସେବାରେ ସାମିଲ କରିବାକୁ ନିଷ୍ପତ୍ତି ନିଆଯାଇଛି। ଏୟାର ଇଣ୍ଡିଆର ଏହି ବୃହତ୍କାୟ ବିମାନଗୁଡିକର ଇନ୍ଧନ ଟ୍ୟାଙ୍କ ବହୁତ ବଡ଼ ହୋଇଥିବାରୁ ସେଗୁଡିକୁ ଭାରତ-ଆମେରିକା ଓ ଭାରତ-କାନାଡା ମଧ୍ୟରେ ଦୀର୍ଘ ଦୂରତାର ଅନ୍ତର୍ଦ୍ଦେଶୀୟ ମାର୍ଗରେ ଉଡାଣ କରାଇବା ସହଜ ହେବ। ବର୍ତ୍ତମାନ ଏୟାର ଇଣ୍ଡିଆର ୪୩ଟି ବୃହତ୍କାୟ ବିମାନ ରହିଛି। ସେଥିରୁ ୩୩ଟି ସଞ୍ଚାଳିତ ହେଉଥିବା ବେଳେ ୧୦ଟି ସଞ୍ଚାଳନରୁ ବାହାରେ ରହିଛି। ତେବେ ବର୍ତ୍ତମାନ ଏୟାର ଇଣ୍ଡିଆ ୨୮ଟି ବିମାନ ସଞ୍ଚାଳିତ କରୁଛି। ଏୟାର ଇଣ୍ଡିଆର କହିବା ଅନୁଯାୟୀ ୨୦୨୩ ଆରମ୍ଭ ସୁଦ୍ଧା ଏହାର ସମସ୍ତ ବିମାନ ସଞ୍ଚାଳନରେ ସାମିଲ କରାଯିବ। ସେହିପରି ଅଗଷ୍ଟ ୩୧ ପରେ ଦିଲ୍ଲୀ ଓ କାନାଡାର ଭାଙ୍କୋଭର ମଧ୍ୟରେ ବିମାନ ସେବା ଆରମ୍ଭ କରାଯିବ। ଏବେ ଦିଲ୍ଲୀ-ଭାଙ୍କୋଭର ମାର୍ଗରେ ସପ୍ତାହକୁ ୩ଟି ବିମାନ ସଞ୍ଚାଳିତ ହେଉଛି। ତେବେ ଭାରତ ଓ କାନାଡା ମଧ୍ୟରେ ଯାତାୟାତ ବୃଦ୍ଧିକୁ ନଜରରେ ରଖି ଦିଲ୍ଲୀ-ଭାଙ୍କୋଭର ମାର୍ଗରେ ବିମାନ ସଂଖ୍ୟା ବୃଦ୍ଧି କରିବାକୁ କମ୍ପାନୀ ବିଚାର କରୁଛି। ଦିଲ୍ଲୀ-ଭାଙ୍କୋଭର ବିମାନ ସଂଖ୍ୟା ବୃଦ୍ଧି ଅନ୍ତର୍ଜାତୀୟ ନେଟୱର୍କ ପରିସର ସମ୍ପ୍ରସାରଣରେ ପ୍ରଥମ ପଦକ୍ଷେପ ହେବ ବୋଲି ରବିବାର ଏୟାର ଇଣ୍ଡିଆର ନବନିଯୁକ୍ତ ସିଏମଡି କ୍ୟାମ୍ପବେଲ ୱିଲସନ କହିଛନ୍ତି।