ନୂଆଦିଲ୍ଲୀ,୧୭ ।୧୦: ବଦଳିଲାଣି ଦିଲ୍ଲୀ-ଏନସିଆରର ପାଣିପାଗ । ଏଠାରେ ସକାଳେ ଓ ସନ୍ଧ୍ୟାରେ ସାମନ୍ୟ ଥଣ୍ଡା ଅନୁଭୁତ ହେଲାଣି । ଏହାସହ ଦିନରେ ଖରାର ତାତି ବି ଅନୁଭୁତ ହେଉଛି । ହେଲେ ଗରମ ଏତେ ଅଧିକ ନାହିଁ । ରବିବାର ଏଠାରେ ପାଗ ଶୁଖିଲା ରହିଥିବା ବେଳେ ଖରା ହୋଇଥିଲା । ତାପମାତ୍ରାରେ ବି ସେମିତି ଅଧିକ ପରିବର୍ତ୍ତନ ହୋଇନାହିଁ । ପାଣିପାଗ ବିଭାଗର ସୂଚନା ଅନୁଯାୟୀ, ରବିବାର ଦିଲ୍ଲୀର ସର୍ବନିମ୍ନ ତାପମାତ୍ରା ୧୯.୧ ଡିଗ୍ରୀ ଓ ସର୍ବାଧିକ ତାପମାତ୍ରା ୩୨.୬ ଡିଗ୍ରୀ ରହିଥିଲା । ତେବେ ଅକ୍ଟୋବର ଶେଷ ସୁଦ୍ଧା ଏଠାରେ ଶୀତର ପ୍ରକୋପ ବଢିଯିବ ବୋଲି ଅନୁମାନ କରାଯାଇଛି ।
ଦିଲ୍ଲୀ-ଏନସିଆରରେ ବାୟୁ ପ୍ରଦୂଷଣ ଲାଗାତାର ଭାବେ ବଢିବାରେ ଲାଗିଛି । ସୋମବାର ସକାଳେ ଦିଲ୍ଲୀ-ଏନସିଆରରେ ବାୟୁର ଗୁଣବତ୍ତା ସୂଚକାଙ୍କ ଖରାପରୁ ଅତି ଖରାପ ଥିବା କୁହାଯାଇଛି । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ସୂଚନା ଅନୁଯାୟୀ, ଦିଲ୍ଲୀର ଆନନ୍ଦ ବିହାରରେ ସୋମବାର ସକାଳେ ବାୟୁର ଗୁଣବର୍ତ୍ତା ଅତି ଖରାପ ଶ୍ରେଣୀରେ ଆସିଯାଇଛି । ଏଠାକାର ଏୟାର କ୍ୱାଲିଟି ଇଣ୍ଡେକ୍ସ ୪୨୧ ରେକର୍ଡ କରାଯାଇଛି । ତେଣୁ ଏବେଠାରୁ ଦିଲ୍ଲୀ-ଏନ୍ସିଆରରେ ଥଣ୍ଡା ବଢିବା ସହ ବାୟୁ ପ୍ରଦୂଷଣର ମାତ୍ରାବି ବଢିବାରେ ଲାଗିଲାଣି ।