ନୂଆଦିଲ୍ଲୀ,୨୯।୧୦ : ଦିଲ୍ଲୀ-ଏନସିଆରରେ ବାୟୁ ଗୁଣବତ୍ତା ଗୁରୁତର ଶ୍ରେଣୀରେ ପହଞ୍ଚିବା ପରେ ବାୟୁ ଗୁଣବତ୍ତା ପରିଚାଳନା ଆୟୋଗ ଏନସିଆରରେ କାର୍ଯ୍ୟକାରୀ ହୋଇଥିବା ଗ୍ରେପ୍ର କଠୋରତାକୁ ଆହୁରି ବଢ଼ାଇ ଦେଇଛନ୍ତି। ଆୟୋଗ ଆବେଦନ କରିଛନ୍ତି ଯେ ଯଦି ସମ୍ଭବ ତେବେ ଘରୁ କାମ କରନ୍ତୁ କିମ୍ବା ବାୟୁ ପ୍ରଦୂଷଣ ସୃଷ୍ଟି କରୁ ନଥିବା ଯାନବାହନ ବ୍ୟବହାର କରନ୍ତୁ।
ଦିଲ୍ଲୀ-ଏନସିଆରରେ ବାୟୁ ଗୁଣବତ୍ତା ସୂଚକାଙ୍କ ଚଳିତ ଋତୁରେ ପ୍ରଥମ ଥର ପାଇଁ ଉଦ୍ବେଗଜନକ ସ୍ତରରେ ପହଞ୍ଚିଛି। ଏହାକୁ ଦୃଷ୍ଟିରେ ରଖି ପ୍ରଶାସନ ଏହାକୁ ନିୟନ୍ତ୍ରଣ କରିବା ପାଇଁ ସମସ୍ତ ଉଦ୍ୟମ କରୁଛି। ଏହି ପରିପ୍ରେକ୍ଷୀରେ ଆୟୋଗ ଶନିବାର ଗ୍ରେଡ ଦୁଇ ଶ୍ରେଣୀରୁ ଏହାକୁ ତୃତୀୟ ଶ୍ରେଣୀକୁ ବୃଦ୍ଧି କରିଛନ୍ତି।
କେତେକ ନିର୍ଦ୍ଦିଷ୍ଟ ସେବା ବ୍ୟତୀତ ଅନ୍ୟ ସମସ୍ତ ବିଭାଗରେ ନିର୍ମାଣ କାର୍ଯ୍ୟ ଉପରେ ପ୍ରତିବନ୍ଧକ ଲଗାଯାଇଛି। ଦିଲ୍ଲୀ-ଏନସିଆରରେ ପଡୁଥିବା ଜିଲାର ପ୍ରଶାସନଙ୍କୁ ନିଜ ନିଜ ଅଞ୍ଚଳରେ ବିଏସ-୩ ପେଟ୍ରୋଲ ଏବଂ ବିଏସ-୪ ଡିଜେଲ ଯାନ ଉପରେ ପ୍ରତିବନ୍ଧକ ଲଗାଇବାକୁ ଆୟୋଗ କହିଛନ୍ତି।
ଲୋକମାନେ ସାଧାରଣ ପରିବହନ କିମ୍ବା ଶେୟାର ରାଇଡ ବ୍ୟବହାର କରିବାକୁ ଆୟୋଗ ଅପିଲ କରିଛନ୍ତି। ଏହା ବ୍ୟତୀତ ସାଇକେଲ କିମ୍ବା ଚାଲିଚାଲି ଯିବାକୁ ଲୋକଙ୍କୁ କୁହାଯାଇଛି। ଯଦି କାର୍ଯ୍ୟ ପ୍ରଭାବିତ ନହୁଏ ତେବେ ଘରୁ ମଧ୍ୟ କାମ କରିବାକୂ ପରାମର୍ଶ ଦିଆଯାଇଛି। ଇନ୍ଧନର ବିକଳ୍ପ ଭାବରେ କାଠ କିମ୍ବା କୋଇଲା ନ ଜଳାଇବାକୁ କୁହାଯାଇଛି।
ରେଳ ଷ୍ଟେଶନ, ମେଟ୍ରୋ, ଡାକ୍ତରଖାନା, ବିମାନବନ୍ଦର ଇତ୍ୟାଦି ବିଭାଗଗୁଡିକୁ ଏହି କଟକଣାରୁ ଦୂରେଇ ରଖାଯାଇଛି।