ନୂଆଦିଲ୍ଲୀ,୧୪ା୧: ଦିଲ୍ଲୀ-ଏନ୍ସିଆର୍ରେ କୁହୁଡ଼ି ସହିତ ବାୟୁ ପ୍ରଦୂଷଣ ବୃଦ୍ଧି ହେତୁ ଗ୍ରେଡେଡ୍ ରେସ୍ପନ୍ସ ଆକ୍ସନ ପ୍ଲାନ୍ର ତୃତୀୟ ପର୍ଯ୍ୟାୟର ପ୍ରତିବନ୍ଧକ ତୁରନ୍ତ କାର୍ଯ୍ୟକାରୀ ହୋଇଛି। ଏହା ଅଧୀନରେ ୮-ପଏଣ୍ଟ ଯୋଜନା କାର୍ଯ୍ୟକାରୀ ହେବ। ସେଥିମଧ୍ୟରୁ ବିଏସ୍-୩ ପେଟ୍ରୋଲ ଏବଂ ବିଏସ୍-୪ ଡିଜେଲ ଯାନ ଉପରେ ପ୍ରତିବନ୍ଧକ ଅନ୍ତର୍ଭୁକ୍ତ। ଏହି ଅବଧି ମଧ୍ୟରେ ସହରରେ ସମସ୍ତ ଅନାବଶ୍ୟକ ନିର୍ମାଣ ଏବଂ ଭାଙ୍ଗିବା କାର୍ଯ୍ୟ ଉପରେ ପ୍ରତିବନ୍ଧକ ଲଗାଯିବ।
ରବିବାର ଏହି ପ୍ରତିବନ୍ଧକ ଘୋଷଣା କରି ବାୟୁ ଗୁଣବତ୍ତା ପରିଚାଳନା ଆୟୋଗ (ସିଏକ୍ୟୁଏମ୍) କହିଛନ୍ତି, ଶନିବାର ସନ୍ଧ୍ୟାଠାରୁ ଦିଲ୍ଲୀ-ଏନ୍ସିଆର୍ର ବାୟୁ ଗୁଣରେ ହଠାତ୍ ଖରାପ ଅବସ୍ଥାକୁ ଦୃଷ୍ଟିରେ ରଖି ଗ୍ରାପ୍ କାର୍ଯ୍ୟ ପାଇଁ ସିଏକ୍ୟୁଏମ୍ ଉପ କମିଟି ଜରୁରିକାଳୀନ ବୈଠକ ଡାକିଥିଲା। ରବିବାର ସକାଳେ ଉପ-କମିଟି ସମଗ୍ର ଏନ୍ସିଆରରେ ତୁରନ୍ତ ପ୍ରଭାବ ସହିତ ସଂଶୋଧିତ ଗ୍ରାପ୍ର ପର୍ଯ୍ୟାୟ-୩ ଅନୁଯାୟୀ ୮-ସୂତ୍ରୀୟ କାର୍ଯ୍ୟ ଯୋଜନା କାର୍ଯ୍ୟକାରୀ କରିବାକୁ ନିଷ୍ପତ୍ତି ନେଇଛି।
