ଥିରୁଭାନନ୍ତପୁରମ୍,୩୧ା୫: ବେଆଇନ ତଥା ଘୃଣ୍ୟ କାର୍ଯ୍ୟ ପାଇଁ ଜଣେ ଏୟାର ହୋଷ୍ଟେସଙ୍କୁ ଗିରଫ କରାଯିବା ଏହା ବୋଧହୁଏ ଦେଶରେ ପ୍ରଥମ ଘଟଣା ହୋଇପାରେ। ଏୟାର ହୋଷ୍ଟେସଙ୍କୁ କେବଳ ଗିରଫ କରାଯାଇ ନାହିଁ ବରଂ ୧୪ ଦିନ ପାଇଁ ନ୍ୟାୟିକ ହେପାଜତକୁ ବି ପଠାଯାଇଛି।
ପ୍ରଥମଥର ପାଇଁ ଜଣେ ଏୟାର ହୋଷ୍ଟେସ ଏପରି କିଛି କରୁଥିବା ଦେଖିବାକୁ ମିଳିଛି। ଏୟାର ହୋଷ୍ଟେସଙ୍କ ଏହି କାର୍ଯ୍ୟ ରେଭିନ୍ୟୁ ଇଣ୍ଟେଲିଜେନ୍ସ ନିର୍ଦ୍ଦେଶାଳୟ (ଡିଆର୍ଆଇ) ଦ୍ୱାରା କରାଯାଇଥିବା ଏକ ଅପରେଶନ ସମୟରେ ପ୍ରକାଶ ପାଇଥିଲା। ଏହି ସମୟରେ ଏହି ଏୟାର ହୋଷ୍ଟେସଙ୍କ ଏହି କାର୍ଯ୍ୟ ସାମ୍ନାକୁ ଆସିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ।
ଏହି ଘଟଣା କେରଳର କନ୍ନୁର ଅନ୍ତର୍ଜାତୀୟ ବିମାନବନ୍ଦରରେ ଘଟିଛି। ମସ୍କରରୁ କନ୍ନୁର ଅଭିମୁଖେ ଆସୁଥିବା ବିମାନରେ ସୁନା ଚୋରା ଚାଲାଣ ପାଇଁ ଉଦ୍ୟମ କରାଯାଉଥିବା ଡିଆରଆଇ ଗୁପ୍ତଚର ସୂଚନା ପାଇଥିଲା। ଏହି ପ୍ରୟାସରେ ବିମାନର ଏକ କ୍ୟାବିନ କ୍ରୁ ମଧ୍ୟ ଜଡ଼ିତ ଥିବା ଡିଆରଆଇ ଇଣ୍ଟେଲ ପାଇଥିଲେ। ଏହି ଇଣ୍ଟେଲ ଉପରେ ଆଧାର କରି ଡିିଆର୍ଆଇ ସମଗ୍ର କନ୍ନୁର ବିମାନବନ୍ଦରରେ ଏହାର ଜାଲ ବିସ୍ତାର କରିଥିଲା।
ବିମାନଟି କନ୍ନୁର ବିମାନବନ୍ଦରରେ ଅବତରଣ କରିବା ମାତ୍ରେ ଡିଆରଆଇ ଟିମ୍ କେବଳ ସମସ୍ତ କ୍ରୁ ସଦସ୍ୟଙ୍କୁ ଯାଞ୍ଚ ପାଇଁ ଅଟକାଇ ନ ଥିଲେ ବରଂ ସମସ୍ତ ଯାତ୍ରୀଙ୍କୁ ଯାଞ୍ଚ କରିଥିଲେ। ଏହି ସମୟରେ କୌଣସି ଯାତ୍ରୀଙ୍କ ନିକଟରୁ କିଛି ମିଳି ନ ଥିଲା। ଏହା ପରେ ଡିଆରଆଇ ଟିମ୍ ଏହି ବିମାନର କ୍ୟାବିନ କ୍ରୁଙ୍କ ବ୍ୟାଗ ଖୋଜିବା ଆରମ୍ଭ କଲା। ସେଥିରୁ ମଧ୍ୟ ସେମାନେ କିଛି ପାଇ ନ ଥିଲେ।
ଏହା ପରେ, ଏୟାର ହୋଷ୍ଟେସଙ୍କୁ ପଚରାଯାଇଥିଲା। ସେ ସ୍ବୀକାର କରିଥିଲେ ସେ ତାଙ୍କ ମଳଦ୍ୱାରରେ ସେ ସୁନା ଲୁଚାଇଛନ୍ତି। ଡିଆରଆଇ ସୂତ୍ର ଅନୁଯାୟୀ, ଡାକ୍ତରଙ୍କ ଉପସ୍ଥିତିରେ ଚୋରା ଚାଲାଣ କରୁଥିବା ଏହି ଏୟାର ହୋଷ୍ଟେସଙ୍କ ମଳଦ୍ୱାରରୁ ପ୍ରାୟ ୯୬୦ ଗ୍ରାମ ସୁନା ଜବତ କରାଯାଇଛି।
